గబ్బర్ సింగ్ కాంబో రిపీట్.. 'ఉస్తాద్' వచ్చేస్తున్నాడు! రిలీజ్ డేట్ ఫిక్స్, శివరాత్రికి స్పెషల్ గిఫ్ట్
దశాబ్దం దాటినా ‘గబ్బర్ సింగ్’ మేనియా ఇంకా తగ్గలేదు. ఇప్పుడు అదే మ్యాజిక్ రీక్రియేట్ చేయడానికి బాబాయ్, హరీష్ శంకర్ మళ్లీ వస్తున్నారు. పవర్ స్టార్ పవన్ కళ్యాణ్ (Pawan Kalyan) అభిమానులు ఎప్పుడెప్పుడా అని ఎదురుచూస్తున్న ‘ఉస్తాద్ భగత్ సింగ్’ (Ustaad Bhagat Singh) రిలీజ్ డేట్ వచ్చేసింది. మార్చి ఎండల్లో పవర్ స్టార్ హీట్ ఎలా ఉండబోతోందో తెలుసా? అసలు శివరాత్రికి రాబోయే ఆ స్పెషల్ సర్ ప్రైజ్ ఏంటి?
మార్చి 26న బాక్సాఫీస్ వేట
ఎన్నాళ్ళో వేచిన ఉదయం రానే వచ్చింది. మైత్రీ మూవీ మేకర్స్ ఈ సినిమా విడుదల తేదీని అధికారికంగా ప్రకటించారు. 2026 మార్చి 26న ప్రపంచవ్యాప్తంగా ‘ఉస్తాద్’ థియేటర్లలో దిగబోతున్నాడు. ఈ ప్రకటనతో పాటు రిలీజ్ చేసిన పవన్ కళ్యాణ్ పవర్ఫుల్ పోస్టర్ ఇప్పుడు సోషల్ మీడియాను షేక్ చేస్తోంది. పవన్ కళ్యాణ్ మాస్ అవతారంలో కనిపిస్తుంటే.. ఫ్యాన్స్ కు పూనకాలు వస్తున్నాయి. ‘గబ్బర్ సింగ్’ వంటి ఇండస్ట్రీ హిట్ తర్వాత వీరిద్దరి కలయికలో వస్తున్న సినిమా కావడంతో అంచనాలు ఆకాశాన్ని తాకుతున్నాయి.
శివరాత్రికి డీఎస్పీ మాస్ బీట్?
రాక్ స్టార్ దేవి శ్రీ ప్రసాద్ (DSP) ఇప్పటికే ‘దేఖ్ లేంగే సాలే’ పాటతో ఫ్యాన్స్ కు కావాల్సిన మాస్ కిక్ ఇచ్చారు. ఇప్పుడు అంతకు మించిన అప్డేట్ రాబోతోంది. ఫిబ్రవరి 15న మహాశివరాత్రి పర్వదినం సందర్భంగా సినిమా నుంచి రెండో పాటను విడుదల చేయాలని చిత్ర బృందం ప్లాన్ చేస్తోంది. దీనికి సంబంధించిన అధికారిక ప్రకటన త్వరలోనే రానుంది. ఈ పాటతో సినిమా ప్రమోషన్ల వేగాన్ని పీక్స్ కు తీసుకెళ్లాలని హరీష్ శంకర్ భావిస్తున్నారు. శివరాత్రికి పవన్ కళ్యాణ్ పాట అంటే థియేటర్లలో డ్యాన్సులు ఖాయం.
భారీ తారాగణం.. బలమైన స్క్రీన్ ప్లే
ఈ సినిమాలో పవన్ సరసన డాన్సింగ్ క్వీన్ శ్రీలీల, అందాల రాశీ ఖన్నా హీరోయిన్లుగా నటిస్తున్నారు. ప్రముఖ దర్శకుడు దశరథ్ స్క్రీన్ప్లే అందిస్తుండటం సినిమాకు మరో బలం. అశుతోష్ రాణా, గౌతమి, నాగ మహేష్, ‘కేజీఎఫ్’ ఫేమ్ అవినాష్ వంటి భారీ తారాగణంతో ఈ చిత్రాన్ని తెరకెక్కిస్తున్నారు. మైత్రీ మూవీ మేకర్స్ ఎక్కడా రాజీ పడకుండా ఈ చిత్రాన్ని నిర్మిస్తున్నారు.
