ఎక్కడో వేల కిలోమీటర్ల దూరంలో ఉన్న ఇరాన్, ఇజ్రాయెల్ దేశాలు బాంబులు వేసుకుంటుంటే.. ఇక్కడ మన దేశంలో ఇన్వెస్టర్ల గుండెల్లో ఎందుకు బాంబులు పేలుతున్నాయి? సోమవారం ఉదయం మార్కెట్ ఓపెన్ అవ్వగానే జెట్ స్పీడ్లో సూచీలు ఎందుకు పాతాళానికి పడిపోయాయి? ఇరాన్ సుప్రీం లీడర్ ఖమేనీ మరణంతో రగులుతున్న పశ్చిమాసియా (Middle East).. భారతీయ స్టాక్ మార్కెట్లను కుదిపేస్తోంది. ఈ పతనం వెనుక ఉన్న అసలు కారణం ఏంటి? షేర్ మార్కెట్ పడిపోతే, అసలు అందులో పెట్టుబడులే పెట్టని సామాన్యుడికి వచ్చే నష్టం ఏంటో లాజిక్ తో సహా చూద్దాం.
సెన్సెక్స్, నిఫ్టీ.. బ్లడ్ బాత్
సోమవారం ఉదయం భారత స్టాక్ మార్కెట్లు భారీ నష్టాలతో ప్రారంభమయ్యాయి. అమెరికా, ఇజ్రాయెల్ దాడులకు ప్రతీకారంగా ఇరాన్ దుబాయ్, ఖతార్ లాంటి దేశాలపై దాడులకు దిగడంతో గల్ఫ్ ప్రాంతంలో భయానక వాతావరణం నెలకొంది. ఈ టెన్షన్ ఇన్వెస్టర్ల సెంటిమెంట్ను దారుణంగా దెబ్బతీసింది.
ప్రారంభంలోనే సెన్సెక్స్ ఏకంగా 1004 పాయింట్లు కోల్పోయి 80,294 వద్దకు పడిపోయింది. ఇక నిఫ్టీ 283 పాయింట్లు నష్టపోయి 24,886 వద్ద ట్రేడవుతోంది. ప్రీ-ఓపెన్ సెషన్లో అయితే పరిస్థితి మరింత దారుణంగా ఉండి, సెన్సెక్స్ 2700 పాయింట్లు పతనమవ్వడం ఇన్వెస్టర్లకు ముచ్చెమటలు పట్టించింది.
పడిపోతున్న రూపాయి.. మండుతున్న చమురు
ఈ స్టాక్ మార్కెట్ పతనం వెనుక ఒక చైన్ రియాక్షన్ ఉంది. ఇరాన్ దాడులతో ప్రపంచ చమురు మార్కెట్కు గుండెకాయ లాంటి హర్మూజ్ జలసంధి మూతపడింది. దీంతో ముడిచమురు (Crude Oil) బ్యారెల్ ధర 80 డాలర్లు దాటి భగ్గుమంది.
పెరిగిన ముడిచమురు ధరల ఎఫెక్ట్ మన ఇండియన్ కరెన్సీపై పడింది. డాలర్తో పోలిస్తే రూపాయి మారకం విలువ 24 పైసలు తగ్గి జీవితకాల కనిష్టమైన 91.32 వద్దకు పడిపోయింది. రూపాయి పతనం, ఆయిల్ రేట్ల పెంపు.. ఏషియన్ పెయింట్స్, మారుతీ సుజుకీ లాంటి దిగ్గజ కంపెనీల షేర్లను దారుణంగా దెబ్బతీశాయి.
సామాన్యుడికి నష్టం ఏంటి?
"నేను స్టాక్ మార్కెట్ లో పైసా కూడా పెట్టలేదు, నాకెందుకు నష్టం?" అని మీరు అనుకోవచ్చు. కానీ అసలు లాజిక్ ఇక్కడే ఉంది.
ముడిచమురు పెరిగితే మన దేశంలో పెట్రోల్, డీజిల్ రేట్లు పెరుగుతాయి.
రవాణా ఖర్చులు పెరిగిపోయి, నిత్యావసర వస్తువులు, కూరగాయల ధరలు మండిపోతాయి.
రూపాయి విలువ పడిపోవడంతో.. మనం విదేశాల నుంచి కొనే ఎలక్ట్రానిక్స్, స్మార్ట్ ఫోన్స్, మందుల ధరలు అమాంతం పెరిగిపోతాయి. అంటే పరోక్షంగా మీ జేబుకు చిల్లు పడుతుందన్నమాట!
అలర్ట్: ప్యానిక్ సెల్లింగ్ వద్దు!
యుద్ధం వచ్చిన ప్రతీసారి స్టాక్ మార్కెట్లు ఇలా పడిపోవడం, మళ్లీ సర్దుకోవడం సహజమే. గల్ఫ్లో ఉద్రిక్తతలు ఇప్పట్లో చల్లారేలా లేవు కాబట్టి మార్కెట్లలో వోలటాలిటీ (ఒడిదుడుకులు) కొనసాగుతాయి. ముడిచమురు ధరలు 100 డాలర్లకు చేరుకుంటాయనే భయంతో ఇన్వెస్టర్లు ప్యానిక్ సెల్లింగ్ (అమ్మకాలు) చేస్తున్నారు. కానీ సామాన్య పెట్టుబడిదారులు కంగారుపడి నష్టాలకు షేర్లు అమ్ముకోవద్దు. లాంగ్ టర్మ్ ఇన్వెస్టర్లకు ఇలాంటి కరెక్షన్స్ (పతనాలు) మంచి స్టాక్స్ ను తక్కువ ధరకు కొనుక్కునే అవకాశంగా (Buy on Dips) కూడా మారుతాయి. పరిస్థితులు చక్కబడే వరకు వేచి చూడటమే ఉత్తమమైన వ్యూహం!
