ఆకాశంలో ఆధిపత్యం కోసం జరుగుతున్న యుద్ధం.. ఇప్పుడు ఏకంగా మన పక్కనే ఉన్న హిందూ మహాసముద్రంలోకి ఎంటర్ అయింది. శ్రీలంక తీరంలో ఇరాన్ యుద్ధ నౌక 'ఐరిస్ డెనా'ను సముద్రం అడుగు నుంచి జలాంతర్గామితో పేల్చేసినట్లు అగ్రరాజ్యం అమెరికా అధికారికంగా ప్రకటించి ప్రపంచాన్ని వణికించింది. ఇంత పవర్ ఫుల్ దేశాలు మన ఇంటి పక్కనే వాణిజ్య మార్గాల్లో ఇలాంటి భయంకరమైన దాడులకు దిగితే ఏమవుతుంది? షిప్పింగ్ దెబ్బతిని, మన దేశంలోకి వచ్చే క్రూడాయిల్ సప్లై ఆగిపోయి.. పెట్రోల్, నిత్యావసరాల ధరలు మండిపోతాయి. అసలు ఈ 'సైలెంట్ డెత్' ఆపరేషన్ ఎలా జరిగింది? రాబోయే పెట్రోల్ కష్టాల నుంచి సామాన్యుడు ఎలా బయటపడాలో ఇప్పుడు డీటెయిల్డ్గా తెలుసుకుందాం.
రెండో ప్రపంచ యుద్ధం తర్వాత ఇదే తొలిసారి!
శ్రీలంక తీరంలో ఇరాన్ యుద్ధ నౌక మునిగిపోవడం వెనుక ఉన్న అసలు నిజాన్ని అమెరికా రక్షణ మంత్రి పీటర్ హెగ్సెత్ (Pete Hegseth) అధికారికంగా ధ్రువీకరించారు. తమ జలాంతర్గామితో (Submarine) దాడి చేసి ఆ నౌకను సముద్రంలో కలిపేశామని ఆయన సగర్వంగా ప్రకటించారు.
ఈ దాడిని 'నిశ్శబ్ద మరణం' (Silent Death) గా అభివర్ణించిన హెగ్సెత్.. రెండో ప్రపంచ యుద్ధం తర్వాత ఒక శత్రు నౌకపై సముద్రం అడుగు నుంచి జరిగిన తొలి దాడి ఇదేనని స్పష్టం చేశారు. ఈ ప్రకటనతో అగ్రరాజ్యం నేరుగా రంగంలోకి దిగిందని తేలిపోయింది.
విశాఖ నుంచి వెళ్తుండగా.. 150 మంది జలసమాధి
మన విశాఖపట్నంలో జరిగిన మిలాన్ (MILAN) ఇంటర్నేషనల్ ఫ్లీట్ రివ్యూలో పాల్గొని ఫిబ్రవరి 17న తిరుగు పయనమైన 'ఐరిస్ డెనా' నౌక.. శ్రీలంకలోని గాలే తీరం సమీపంలో ఈ అమెరికా దాడికి గురైంది.
దీనికి రక్షణగా ఐరెస్ మక్రాన్ అనే మరో నౌక వస్తున్నా.. అమెరికా వేసిన స్కెచ్ నుంచి దానిని కాపాడలేకపోయింది. దాడి సమయంలో నౌకలో 189 మంది ఉండగా, 150 మంది గల్లంతైనట్లు తెలుస్తోంది. ప్రస్తుతం శ్రీలంక నేవీ 32 మందిని రక్షించి గాలే ఆసుపత్రికి తరలించింది. సముద్రంలో కొన్ని మృతదేహాలను కూడా వెలికితీసినట్లు శ్రీలంక అధికారులు వెల్లడించారు.
అరాంకోపై ఇరాన్ డ్రోన్ దాడి.. భగ్గుమంటున్న గల్ఫ్
ఒకపక్క ఇరాన్ కొత్త సుప్రీం లీడర్ మొజ్తబా ఖమేనీని కూడా చంపేస్తామని ఇజ్రాయెల్ బహిరంగంగా హెచ్చరికలు జారీ చేసింది. అటు ఇరాన్ కూడా ఏమాత్రం వెనక్కి తగ్గకుండా ప్రతీకార దాడులను తీవ్రం చేస్తోంది.
తాజాగా సౌదీ అరేబియా ప్రభుత్వ చమురు సంస్థ అయిన 'అరాంకో రిఫైనరీ' (రాస్ తనూరా) పై డ్రోన్లతో దాడికి యత్నించింది. అయితే, సౌదీ ఎయిర్ డిఫెన్స్ వ్యవస్థలు ఈ దాడిని సమర్థవంతంగా అడ్డుకున్నాయని ప్రకటించాయి. గల్ఫ్ దేశాల్లోని అమెరికా స్థావరాలు, ఆస్తులే లక్ష్యంగా ఇరాన్ ఇప్పుడు పూర్తిస్థాయి దాడులకు దిగుతోంది.
రెండో ప్రపంచ యుద్ధం నాటి ఆపరేషన్లను అమెరికా మళ్ళీ రిపీట్ చేస్తోందంటేనే పరిస్థితి ఎంత భయానకంగా ఉందో అర్థం చేసుకోవచ్చు. సముద్ర వాణిజ్య మార్గమైన హిందూ మహాసముద్రంలో యుద్ధ నౌకలు పేలిపోవడం, సౌదీ చమురు సంస్థలపై దాడులు జరగడం.. ఈ రెండు పరిణామాలు గ్లోబల్ ఆయిల్ మార్కెట్లను కుదిపేస్తాయి. రవాణా (Shipping) ఖర్చులు పెరిగిపోయి, రాబోయే రోజుల్లో మన దేశంలో ద్రవ్యోల్బణం (Inflation) రికార్డు స్థాయికి చేరుకునే ప్రమాదం ఉంది. కాబట్టి సామాన్యులు కేవలం వీటిని వార్తల్లా చూడకుండా.. రాబోయే ఆర్థిక అనిశ్చితిని దృష్టిలో ఉంచుకుని అత్యవసర నిధిని (Emergency Fund) మెయింటైన్ చేయడం, ఇంధన పొదుపు పాటించడం ఎంతో ముఖ్యం.
