మబ్బులు పట్టి చిరుజల్లులు పడుతుంటే.. వేడి వేడి ఛాయ్ తాగుతూ కరకరలాడే సమోసా తింటుంటే ఆ మజానే వేరు కదూ? బయట కరకరలాడుతూ, లోపల నోరూరించే స్పైసీ మసాలాతో ప్రతి భారతీయుడి గుండెల్లో చెరగని స్థానం సంపాదించుకున్న ఈ స్ట్రీట్ ఫుడ్ గురించి ఇప్పుడు ఒక సంచలన నిజం బయటపడింది. మన దేశపు జాతీయ చిరుతిండిగా మనం ఫీలయ్యే ఈ 'సమోసా' అసలు మన భారతదేశానిదే కాదన్న వార్త ఇప్పుడు సోషల్ మీడియాను షేక్ చేస్తోంది! వినడానికి నమ్మశక్యంగా లేదా? అయితే ఆ జన్మరహస్యం ఎక్కడిదో ఈ కథనంలో చదివి తెలుసుకోండి.
పర్షియన్ గ్రంథాల్లో దాగున్న సమోసా చరిత్ర!
ప్రస్తుతం ఈ సమోసా మూలాలకు సంబంధించిన కథ నెట్టింట తెగ వైరల్ అవుతోంది. చరిత్ర, పురావస్తు శాస్త్రాలలో పీహెచ్డీ (PhD) చేసిన ప్రముఖ పరిశోధకుడు, రచయిత డాక్టర్ ఎం.ఎఫ్. ఖాన్ ఈ సంచలన విషయాలను తన సోషల్ మీడియా వేదికగా పంచుకున్నారు.
మొదట్లో అసలు సమోసా ఎలా ఉండేది? మన దేశపు పాక నిపుణులు దాని తయారీని, రుచిని తమదైన శైలిలో ఎలా మార్చేశారు? అన్న విషయాలను ఆయన సవివరంగా రాసుకొచ్చారు. సరిగ్గా క్రీస్తుశకం 1500 నుంచి 1510 మధ్య కాలంలో రాసిన ఒక పురాతన పర్షియన్ తాళపత్ర గ్రంథంలో ఈ సమోసా చరిత్ర సవివరంగా నిక్షిప్తమై ఉందని ఆయన వెల్లడించారు.
ఆలుగడ్డలు లేవు.. నాటి రాయల్ సమోసా వేరు!
ఆ పురాతన గ్రంథం ఆధారంగా చూసుకుంటే.. నేడు మనం అత్యధికంగా తినే ఈ వీధి ఆహారం ఏకంగా 500 ఏళ్ల నాటి వంటకంగా తేలింది. ప్రస్తుతం లండన్లోని ప్రఖ్యాత బ్రిటిష్ మ్యూజియంలో భద్రపరిచిన ఈ తాళపత్ర గ్రంథంలో, పర్షియన్ భాషలో ఈ వంటకం తయారీ గురించి రాసి ఉందని డాక్టర్ ఖాన్ తెలిపారు.
అయితే, నాటి సమోసాకు, నేటి సమోసాకు అస్సలు పొంతనే లేదు! అప్పట్లో ఈ చిరుతిండి చాలా భిన్నమైన రూపాన్ని, రుచిని కలిగి ఉండేది. నాటి పూర్వీకులు ఈ వంటకాన్ని.. కాల్చిన వంకాయ గుజ్జు, ఎండు అల్లం, గొర్రె మాంసం (మటన్) లాంటివి నూనెలో వేయించి, దాన్ని లోపలి స్టఫ్గా పెట్టి అద్భుతంగా వండేవారని ఆ గ్రంథంలో స్పష్టంగా పేర్కొన్నారు.
మన దేశపు మ్యాజిక్.. స్ట్రీట్ ఫుడ్ గా మార్పు!
కానీ ప్రస్తుతం మనం చూస్తున్న, తింటున్న సమోసాలు అందుకు పూర్తిగా విభిన్నం. ఇప్పుడు మనం వంకాయ, మాంసం బదులుగా బంగాళదుంపలు, ఉల్లిపాయల కూర వంటి వాటిని స్టఫ్గా పెట్టి వండేస్తున్నాం. పైగా దానికి జతగా నూనెలో వేయించిన పచ్చిమిర్చి ఇస్తుంటాం. నిజానికి నాటి ఒరిజినల్ సమోసాలో ఈ బంగాళదుంప, పచ్చిమిర్చి అనేవి అసలు ఉండేవే కాదని ఆయన స్పష్టం చేశారు.
ఆ తాళపత్రాల ఆధారంగా చూస్తే.. ఈ వంటకం మొఘల్ చక్రవర్తి అక్బర్, అలాగే మైసూరు పులి టిప్పు సుల్తాన్ల చేతుల మీదుగా ప్రయాణించి మన దేశంలోకి ప్రవేశించిందని ఆయన చెప్పారు.
వలస వచ్చిన వంటకం.. నెటిజన్ల పంచ్లు!
అంటే, ఒకప్పుడు ఇది కేవలం రాజుల కోటల్లో మాత్రమే దొరికే ఒక రాజరికపు వంటకం. కాలక్రమంలో అది సామాన్యుడికి చేరువై, నేడు వీధి దుకాణాల్లో ఫేమస్ స్నాక్స్ ఐటెంగా మారిపోయింది. రాజప్రాసాదాల నుంచి గల్లీ వరకు ఈ సమోసా చేసిన చారిత్రక ప్రయాణం నిజంగా అద్భుతం.
ఈ పోస్ట్ చూసిన నెటిజన్లు సైతం ఆశ్చర్యపోతూనే ఫన్నీగా కామెంట్లు పెడుతున్నారు. "అంటే ఈ సమోసా కూడా మన దేశంలోకి వలస వచ్చిందన్న మాట" అంటూ హాస్యస్ఫదంగా పోస్టులు పెడుతూ ఈ హిస్టరీని తెగ షేర్ చేస్తున్నారు.
కాలం మారుతున్న కొద్దీ రుచులు మారొచ్చు, అందులోని పదార్థాలు మారొచ్చు.. కానీ ఒక వంటకం మనుషుల మనసులను ఏలిన తీరు మాత్రం ఎప్పటికీ మారదు. ఏ దేశం నుంచి వచ్చినా, ఏ రాజులు తిన్నా.. ఆలుగడ్డ మసాలాతో మనోళ్లు దానికి వేసిన 'దేశీ టచ్' మాత్రం మామూలు కిక్ ఇవ్వదు. సమోసా మనది కాకపోయినా.. దాన్ని మన గుండెల్లో పెట్టుకుని ఓన్ చేసుకున్న తీరు అద్భుతం. ఇక మీదట సమోసా తినేటప్పుడు, 500 ఏళ్ల చరిత్రను తింటున్నామని గర్వంగా ఫీలవ్వండి!
Also Read:
మీలో టాలెంట్ ఉన్నా ఎందుకు వెనుకబడి ఉన్నారో తెలుసా? కారణం ఇదే!జీవితంలో ఎదురుదెబ్బ తగిలిందా? అయితే మళ్ళీ ఇలా బౌన్స్ బ్యాక్ అవ్వండి!
అతిగా ఆలోచించడం (Overthinking) ఆపడం ఎలా? సింపుల్ ట్రిక్స్
5 AM క్లబ్: ఉదయం 5 గంటలకే నిద్రలేస్తే జీవితం ఎలా మారుతుంది?
మోటివేషన్ కంటే సెల్ఫ్ డిసిప్లిన్ ఎందుకు గొప్పదో తెలుసా?
