అర్ధరాత్రి.. ఒంటరిగా నడుస్తున్న ఒక యువతి.. చుట్టూ నిర్మానుష్యమైన రోడ్డు! ఈ దృశ్యం చూడగానే సామాన్యుడిగా మీకు వెంటనే ఏమనిపిస్తుంది? కచ్చితంగా ఏదో కీడు జరుగుతుందనే భయం వెన్నాడుతుంది. కానీ, ఆ భయాలన్నింటినీ పటాపంచలు చేస్తూ, అర్ధరాత్రి వేళ హైదరాబాద్ నగరం మహిళలకు ఎంతటి సురక్షితమైనదో ఒక యువతి తన ప్రత్యక్ష అనుభవంతో కళ్లకు కట్టినట్లు వివరించారు. నెట్టింట వైరల్ అవుతున్న ఆమె నైట్ వాక్ కథ ఏంటో తెలిస్తే.. ప్రతి హైదరాబాద్ వాసి గర్వంతో తలెత్తి నిలబడేలా చేస్తుంది!
ముంబై కలల నగరం.. కానీ హైదరాబాద్ సేఫ్ షెల్టర్!
లీషా అనే యువతికి ఒకప్పుడు ముంబై అంటే ప్రాణం. భవిష్యత్తులో అక్కడే స్థిరపడాలని ఆమె ఎన్నో కలలు కన్నది. వాస్తవానికి హైదరాబాద్ అంటే కేవలం ఒక పాతబస్తీ మాత్రమేనని, తన డ్రీమ్ డెస్టినేషన్ ముంబై అని ఆమె అనుకునేది.
కానీ, ఉద్యోగ రీత్యా ఆమె భాగ్యనగరంలో అడుగుపెట్టాక ఆమె ఆలోచనా విధానం, నగరాల పట్ల ఆమెకున్న దృక్పథం పూర్తిగా మారిపోయాయి. హైదరాబాద్ ఎంతో అందమైన నగరమని, ముఖ్యంగా మహిళలకు అత్యంత సురక్షితమైన ప్రాంతమని ఆమె బల్లగుద్ది చెబుతోంది.
రాత్రి 11 గంటలకు.. 4 కిలోమీటర్ల ఒంటరి ప్రయాణం!
ఇటీవల రాత్రి 11 గంటల సమయంలో తాను ఒంటరిగా ఇంటికి నడుచుకుంటూ వెళ్తున్నప్పుడు ఎదురైన ఒక అద్భుతమైన అనుభవాన్ని వివరిస్తూ లీషా ఇన్స్టాగ్రామ్లో ఒక వీడియో పోస్ట్ చేసింది. రాత్రి పూట ఏకంగా నాలుగు కిలోమీటర్ల దూరం ఒంటరిగా నడిచినా సరే.. తనకు ఏ కోశానా భయం వేయలేదని ఆమె సగర్వంగా ప్రకటించింది.
ఆ నడిరాత్రి ప్రయాణంలో రోడ్డుపై ఎవరూ తనను ఏడిపించలేదని, ఎలాంటి అసభ్యకరమైన కామెంట్లు (క్యాట్ కాలింగ్) చేయలేదని ఆమె స్పష్టం చేసింది. హైదరాబాద్ నగరం మహిళల పాలిట ఎంత సురక్షితమైనదో తన వీడియో ద్వారా యావత్ ప్రపంచానికి గర్వంగా తెలియజేసింది.
అద్భుతమైన వాతావరణం.. మర్యాదపూర్వకమైన మనుషులు!
భాగ్యనగరం అందాలను, ఇక్కడి మౌలిక వసతులను ఆమె ప్రశంసలతో ముంచెత్తింది. నగరంలో మధ్యాహ్నం పూట కాస్త వేడిగా అనిపించినా, రాత్రి వేళల్లో వాతావరణం ఎంతో ఆహ్లాదకరంగా, చల్లగా ఉంటుందని వివరించింది.
దీనికి తోడు హైదరాబాద్లో మౌలిక సదుపాయాలు (ఇన్ఫ్రాస్ట్రక్చర్) అద్భుతంగా అభివృద్ధి చెందాయని ఆమె పేర్కొంది. అన్నిటికంటే ముఖ్యంగా ఇక్కడి ప్రజలు ఎంతో మర్యాదపూర్వకంగా మెలుగుతారని, ప్రతి ఒక్కరూ కచ్చితంగా హైదరాబాద్ను సందర్శించి తీరాలని ఆమె మనస్ఫూర్తిగా సూచించింది.
నెట్టింట వైరల్.. ఆసక్తికరమైన కామెంట్ల వర్షం!
"రాత్రిపూట నాలుగు కిలోమీటర్లు నడిచినా.. ఇంత సురక్షితంగా ఎప్పుడూ అనిపించలేదు" అనే క్యాప్షన్తో ఆమె పంచుకున్న ఈ వీడియో ఇప్పుడు సోషల్ మీడియాలో దావానలంలా వ్యాపించింది. దీనిపై నెటిజన్ల నుంచి భిన్నమైన స్పందనలు వ్యక్తమవుతున్నాయి. కొందరు ఆమె అభిప్రాయంతో ఏకీభవిస్తుండగా, మరికొందరు నగర భద్రతపై తమ సొంత అనుభవాలను పంచుకుంటున్నారు.
"నేను కూడా ఇటీవలే హైదరాబాద్కు వచ్చాను, మీ మాటలతో నేను పూర్తిగా కనెక్ట్ అయ్యాను" అని ఒక నెటిజన్ కామెంట్ చేయగా.. "హైదరాబాద్ ఒక అద్భుతమైన నగరం" అని మరొకరు ప్రశంసించారు. ఇక మూడో నెటిజన్ అయితే.. "ఒక్కసారి మా హైదరాబాద్కు వస్తే.. ఇక ఈ నగరాన్ని విడిచి వెళ్లలేరు" అంటూ తన నగర ప్రేమను చాటుకున్నాడు.
కళ్లు చెదిరే భవనాలు, ఐటీ కంపెనీలు రావడం మాత్రమే కాదు.. ఒక ఆడపిల్ల అర్ధరాత్రి నిర్భయంగా రోడ్డుపై నడిచినప్పుడే ఆ నగరం నిజమైన అభివృద్ధి సాధించినట్లు! భాగ్యనగరంలో ఆ భద్రత ఉందని ఒక యువతి చెప్పిన తీరు.. మన పాలకుల కృషిని, హైదరాబాద్ పోలీసుల నిఘాను మరోసారి నిరూపించింది!
