1979 ఇస్లామిక్ విప్లవం తర్వాత దశాబ్దాలుగా ఉప్పు-నిప్పులా రగులుతున్న రెండు బద్ధ శత్రు దేశాలు కలుసుకున్న మహా ఘట్టం ఇది! ఒకరినొకరు నాశనం చేసుకోవాలని చూసిన అగ్రరాజ్యం అమెరికా, ఇరాన్లు ఏకంగా 47 ఏళ్ల సుదీర్ఘ విరామం తర్వాత తొలిసారిగా అత్యున్నత స్థాయిలో ఒకే టేబుల్ పైకి వచ్చాయి. ఫిబ్రవరి 28న ఇరాన్పై అమెరికా-ఇజ్రాయెల్ దాడులతో మొదలై, ప్రపంచ ఇంధన మార్కెట్లను కుదిపేసిన పశ్చిమాసియా మహా సంగ్రామానికి ముగింపు పలికే చారిత్రక శాంతి చర్చలకు శనివారం పాకిస్థాన్ రాజధాని ఇస్లామాబాద్ వేదికగా నిలిచింది!
అమెరికా దిగివచ్చింది.. ఫ్రీజ్ అయిన నిధుల విడుదల!
అమెరికా ఉపాధ్యక్షుడు జేడీ వాన్స్ స్వయంగా ఈ హై-వోల్టేజ్ డెలిగేషన్ను నడిపిస్తుండగా, ఆయన వెనుక ప్రత్యేక ప్రతినిధి స్టీవ్ విట్కాఫ్, జారెడ్ కుష్నర్ లాంటి కీలక వ్యక్తులు ఉన్నారు. ఇటు ఇరాన్ ఏమాత్రం తగ్గకుండా పార్లమెంట్ స్పీకర్ మొహమ్మద్ బఘేర్ గాలిబాఫ్, విదేశాంగ మంత్రి అబ్బాస్ అరాగ్చీలతో కూడిన బలమైన బృందాన్ని రంగంలోకి దించింది.
అయితే ఇరాన్ ఈ చర్చలకు రావడానికి అసలు కారణం అమెరికా దిగిరావడమే! ఇరాన్ తన 10-పాయింట్ల ప్లాన్లో ప్రధానంగా డిమాండ్ చేసినట్లుగా.. ఫ్రీజ్ చేసిన తమ దేశ నిధులను అమెరికా అధికారికంగా విడుదల చేసేందుకు అంగీకరించిన తర్వాతే వారు ఈ భేటీకి వచ్చారని 'అల్ జజీరా' వార్తా సంస్థ సంచలన నివేదిక బయటపెట్టింది.
ఫేస్-టు-ఫేస్ ఢీ.. ఎవరి పంతం వారిదే!
ఇస్లామాబాద్లో ఉత్కంఠభరితంగా సాగిన ఈ ముఖాముఖి భేటీ అనంతరం, రెండు దేశాల ప్రతినిధులు లిఖితపూర్వక ప్రతిపాదనలను మార్చుకున్నారని 'తస్నిమ్ న్యూస్', 'అల్ జజీరా' సంస్థలు స్పష్టం చేశాయి. అయితే ఈ శాంతి చర్చల్లో తాము ఏమాత్రం తలవంచలేదని ఇరాన్ కఠిన స్వరంతో హెచ్చరిస్తోంది. తమ జాతీయ ప్రయోజనాలను కాపాడుకునేందుకు కట్టుబడి ఉన్నామని కుండబద్దలు కొట్టింది.
ఇదే విషయంపై ఇరాన్ అధ్యక్షుడు మసూద్ పెజెష్కియాన్ 'ఎక్స్' (X) వేదికగా గర్జించారు. "పాకిస్థాన్ చేరుకున్న మా ఉన్నత స్థాయి బృందం ఇరాన్ ప్రయోజనాలకు అత్యంత బలమైన కాపలాదారు. ఎంతో ధైర్యంతో వారు ఈ చర్చల్లో పాల్గొంటున్నారు. ఏది ఏమైనా, మా ప్రజలకు మేము చేసే సేవ ఒక్క క్షణం కూడా ఆగదు" అని ఆయన ఘాటుగా స్పందించారు.
పాక్ మాస్టర్ ప్లాన్.. ముగింపు ఏంటి?
ఈ మహా ఘట్టానికి పాకిస్థాన్ మధ్యవర్తిత్వం వహిస్తోంది. పాక్ ప్రధాని షెహబాజ్ షరీఫ్.. ఇరు దేశాల ప్రతినిధులతో వేర్వేరుగా సమావేశమయ్యారు. పశ్చిమాసియాలో 'శాశ్వత శాంతి' నెలకొల్పాలన్నదే తమ బలమైన కోరిక అని ఆయన స్పష్టం చేశారు. ఈ చారిత్రక సమావేశంలో పాక్ ఉప ప్రధాని ఇషాక్ దార్, ఆర్మీ చీఫ్ ఫీల్డ్ మార్షల్ అసిమ్ మునీర్, హోంమంత్రి మొహ్సిన్ నఖ్వీ సైతం స్వయంగా పాల్గొన్నారు.
మొదటి విడత చర్చలు ముగిసిన తర్వాత పాక్ విదేశాంగ కార్యాలయం ఒక అధికారిక ప్రకటన విడుదల చేసే అవకాశం ఉందని, అన్నీ సానుకూలంగా జరిగితే ఈ చర్చలు మరింత ప్రత్యక్ష రూపంలోకి మారవచ్చని ఒక సీనియర్ అధికారి పీటీఐ (PTI) వార్తా సంస్థకు వెల్లడించారు. ఫిబ్రవరి 28న అంటుకున్న ఈ మహా మంటలకు బ్రేక్ వేస్తూ.. ఏప్రిల్ 8న పాకిస్థాన్ చొరవతో కుదిరిన రెండు వారాల కాల్పుల విరమణ ఒప్పందం నడుమ ఈ చారిత్రక చర్చలు జరుగుతుండటం గమనార్హం.
ఏప్రిల్ 8 నాటి శాంతి విరామంతో మొదలైన ఈ ఇస్లామాబాద్ మథనం.. దశాబ్దాల పగకు ముగింపు పలుకుతుందా, లేక మరో భీకర మూడో ప్రపంచ యుద్ధానికి ఆజ్యం పోస్తుందా అనేది కాలమే తేల్చాలి!
