రాత్రి ఎంతో సంతోషంగా విందు ఆరగించిన ఆ కుటుంబ సభ్యులు.. తెల్లవారేసరికి విగతజీవులయ్యారు! ప్రాణాలు తీసింది పుచ్చకాయే అని ప్రపంచమంతా వణికిపోతుంటే.. పోస్ట్మార్టం గదిలో బయటపడిన ఒక భయంకరమైన నిజం పోలీసులనే కాదు, సామాన్యులను సైతం ఉలిక్కిపడేలా చేస్తోంది. శరీరంలోని ప్రధాన అవయవాలు ఆకుపచ్చ రంగులోకి మారిపోయిన ఆ దారుణమైన మరణాల వెనుక దాగిన ఆ చీకటి రహస్యం ఏంటి?
మృత్యువును ఆహ్వానించిన ఆఖరి విందు
మొబైల్ రిపేర్ షాప్ నడుపుకునే అబ్దుల్లా డొకాదియా జీవితం ఎంతో ప్రశాంతంగా సాగుతోంది. భార్య, ఇద్దరు పిల్లలతో కలిసి గత శనివారం రాత్రి ఇంట్లో ఒక దావత్ ఏర్పాటు చేశాడు. మరో ఐదుగురు బంధువులను పిలిచి ఎంతో ఇష్టంగా మటన్ పులావ్ వడ్డించాడు. ఆ తర్వాత బంధువులు సంతోషంగా తిని వెళ్లిపోయారు. అర్ధరాత్రి సమయంలో అబ్దుల్లా కుటుంబం పుచ్చకాయ తిని నిద్రకు ఉపక్రమించింది. కానీ, ఆ నిద్రే వారికి శాశ్వత నిద్ర అవుతుందని వారెవరూ ఊహించలేదు. తెల్లవారుజామున 5 గంటల సమయంలో ఒకరి తర్వాత ఒకరికి వాంతులు, విరేచనాలు మొదలయ్యాయి. హుటాహుటిన ఆస్పత్రిలో చేరిన 12 గంటల వ్యవధిలోనే ఆ నాలుగు ప్రాణాలు గాల్లో కలిసిపోయాయి.
పుచ్చకాయపై వదంతులు..
ఒకే కుటుంబంలో నలుగురు అకస్మాత్తుగా మరణించడంతో మొదట అందరి వేళ్లూ పుచ్చకాయ వైపే చూపించాయి. బంధువులకు ఏమీ కాకపోవడం, వీరు మాత్రమే ఆ పుచ్చకాయ తినడంతో అది ఫుడ్ పాయిజన్ అని అందరూ బలంగా నమ్మారు. ఈ వార్త మహారాష్ట్ర అంతటా దావానలంలా వ్యాపించింది. వేసవిలో ప్రాణదాతగా భావించే పుచ్చకాయ ఏకంగా ట్రెండింగ్లోకి వచ్చి తీవ్ర భయాన్ని సృష్టించింది. అమ్మకాలు దారుణంగా పడిపోయాయి. కానీ, ఫోరెన్సిక్ రిపోర్టులు రావడంతో ఈ కేసు కథ పూర్తిగా అడ్డం తిరిగింది. ఆ మరణాలకు పుచ్చకాయకు ఎలాంటి సంబంధం లేదని, అందులో కల్తీ ఆనవాళ్లు లేవని మహారాష్ట్ర ఫుడ్ అండ్ డ్రగ్ అడ్మినిస్ట్రేషన్ (FDA) అధికారికంగా తేల్చి చెప్పింది.
ఆకుపచ్చగా మారిన అవయవాలు.. వణికిస్తున్న నిజాలు!
అది సాధారణ ఫుడ్ పాయిజన్ కాదని, అంతకుమించిన ఘోరం ఏదో జరిగిందని వైద్యులు స్పష్టం చేస్తున్నారు. ఆ నలుగురి మృతదేహాలకు నిర్వహించిన పోస్ట్మార్టంలో ఊహించని, గుండెలు పిండేసే నిజం వెలుగుచూసింది. వారి గుండె, కాలేయం (లివర్), మెదడు, పేగులు పూర్తిగా ఆకుపచ్చ రంగులోకి మారిపోయాయి! ఈ భయంకరమైన మార్పు వైద్యులను సైతం విస్మయానికి గురిచేసింది. ఇలా జరగాలంటే అత్యంత శక్తివంతమైన విష ప్రయోగం లేదా అత్యంత ప్రమాదకరమైన రసాయనాలు శరీరంలోకి వెళ్లి ఉండాలని నిపుణులు కుండబద్దలు కొడుతున్నారు.
మార్ఫిన్ జాడలు.. ఇదొక పక్కా స్కెచ్చా?
ఈ మిస్టరీని మరింత జటిలం చేస్తూ, అబ్దుల్లా శరీరంలో 'మార్ఫిన్' (Morphine) అనే అత్యంత శక్తివంతమైన పెయిన్ కిల్లర్ ఆనవాళ్లు బయటపడ్డాయి. డాక్టర్లు సూచిస్తే తప్ప వాడని ఈ మందు అతని శరీరంలోకి ఎలా వచ్చింది? కేవలం అతని బాడీలోనే మార్ఫిన్ ఉంటే, మిగతా ముగ్గురు ఎలా చనిపోయారు? బంధువులు క్షేమంగా ఉండి, ఈ నాలుగు ప్రాణాలు మాత్రమే పోవడం వెనుక.. ఆహారంలో లేదా పానీయంలో ఉద్దేశపూర్వకంగా ఎవరైనా విషం కలిపారా అన్న అనుమానాలు బలంగా వినిపిస్తున్నాయి. పుచ్చకాయ కలుషితం కాకపోతే, వారేదైనా పురుగుల మందు తాగారా? లేక ఎవరైనా కక్షగట్టి విషాన్ని ఇంజెక్ట్ చేశారా? అనే కోణంలో పోలీసుల దర్యాప్తు వేగవంతమైంది.
మృత్యు రహస్యం.. ఆ నివేదికల పైనే ఆధారాలు
సాధారణ కల్తీకి, అత్యంత క్రూరమైన విష ప్రయోగానికి మధ్య ఉన్న సన్నని గీతను ఫోరెన్సిక్ కెమికల్ ఎనాలసిస్ మాత్రమే చెరపగలదు. రసాయన పరీక్షల కోసం ఆ అవయవాలను ల్యాబ్కు పంపారు. ఆ ఫలితాలు వస్తేనే ఈ దారుణ మరణాల వెనుక ఉన్న ఆ అదృశ్య హంతకుడు ఎవరో తేలుతుంది.
నవ్వుతూ తిన్న ఆఖరి ముద్దలో మృత్యువు ఏ క్రూరమైన రూపంలో దాగి ఉందో తేలేవరకు.. ముంబైని కమ్మేసిన ఈ ఆకుపచ్చ అవయవాల మిస్టరీ వీడదు!
Also Read:
మమతా బెనర్జీకి సుప్రీం షాక్: కౌంటింగ్ సిబ్బంది నియామకంపై కీలక తీర్పు!సామాన్యుడికి బిగ్ షాక్.. గ్యాస్ సిలిండర్, పెట్రోల్ ధరల బాదుడు షురూ!
పోలీస్ వలయంలో ఏడు ప్రాంతాలు: కోల్కతాలో ఉత్కంఠ రేపుతున్న ఎన్నికల కౌంటింగ్
ఈవీఎంల ట్యాంపరింగ్ కలకలం: అర్ధరాత్రి స్ట్రాంగ్ రూమ్లో దీదీ హైడ్రామా!
రాత్రంతా నిద్రపోకండి, మే 4న మనదే విజయం: టీఎంసీ శ్రేణులకు మమత పిలుపు
