[FEATURED_IMAGE]
రవి నంబూరి దర్శకత్వంలో కిరణ్ అబ్బవరం, గౌరీ ప్రియ జంటగా నటించిన ఈ క్యూట్ లవ్ స్టోరీ జూలై 24న థియేటర్లలోకి వచ్చింది. ఎలాంటి భారీ ఆర్భాటాలు లేకుండా విడుదలై, కేవలం పాజిటివ్ మౌత్ టాక్తో ఏకంగా రూ.60 కోట్లకు పైగా వసూళ్లు రాబట్టి ట్రేడ్ వర్గాలను ఆశ్చర్యపరిచింది. తాజాగా ఈ మూవీ డిజిటల్ ప్రీమియర్కు డేట్ లాక్ చేసుకుని, ఆగస్టు 21 నుంచి ప్రముఖ ఓటీటీ సంస్థ సోనీ లివ్లో స్ట్రీమింగ్ కాబోతోంది. తెలుగుతో పాటు హిందీ, తమిళ, కన్నడ, మలయాళ భాషల్లో మేకర్స్ దీనిని అందుబాటులోకి తీసుకువస్తున్నారు.
కథ విషయానికి వస్తే, కాలేజ్ రోజుల నుంచి మూడేళ్లుగా ప్రేమించుకున్న అజయ్ (త్రిగుణ్), నివేదిత (గౌరీ ప్రియ) పెళ్లి పీటల వరకు వెళ్తారు. అనూహ్యంగా పెళ్లి రోజే అజయ్ మరో అమ్మాయితో పారిపోవడంతో నివేదిత డిప్రెషన్లోకి వెళ్లిపోతుంది. ఆ చేదు నిజాన్ని తట్టుకోలేక మద్యానికి బానిసవ్వడంతో పాటు, తన ఆఫీస్ వర్క్ను కూడా గాలికి వదిలేస్తుంది.
సరిగ్గా అప్పుడే ఆ అమ్మాయి జీవితంలోకి ఒక గెస్ట్లా ఎంట్రీ ఇస్తాడు అనాథ యువకుడు స్టీవెన్ శంకర్ (కిరణ్ అబ్బవరం). తాను చనిపోయే లోపు కనీసం ఒక్కసారైనా సిల్వర్ స్క్రీన్ మీద డైరెక్టర్గా తన పేరు చూసుకోవాలని తపించే యువకుడతను. ఒక సినిమా పిచ్చోడి రాకతో, డిప్రెషన్లో ఉన్న నివేదిత మైండ్సెట్ ఎలా మారింది? స్టీవెన్ కల నెరవేరిందా లేదా అన్నది తెరపై చూడాల్సిందే.
ఒక వ్యక్తి మనల్ని మోసం చేసినంత మాత్రాన ప్రపంచం అంతమైపోదు, పరిచయం లేని కొత్త వ్యక్తుల ద్వారా కూడా మన జీవితం మళ్లీ గాడిన పడుతుందని ఈ చిత్రం చాలా కన్విన్సింగ్గా చెబుతుంది. సున్నితమైన భావోద్వేగాలను ఫన్ వేలో ప్రజెంట్ చేసిన ఈ ఫ్రెష్ ఫీల్ గుడ్ మూవీని ఈ బుధవారం నుంచి ఎలాంటి మొహమాటం లేకుండా ఫ్యామిలీతో కలిసి ఓటీటీలో చూసి ఎంజాయ్ చేయొచ్చు.
