పాప్ రారాజు మైఖేల్ జాక్సన్ మార్వెల్ సంస్థను కొనుగోలు చేయాలని భావించిన ఆసక్తికర విషయం మరోసారి తెరపైకి వచ్చింది. 1990ల దశకంలో మార్వెల్ తీవ్ర ఆర్థిక సంక్షోభంతో దివాలా అంచున ఉన్న సమయంలో, ఆ సంస్థను దక్కించుకోవడంతో పాటు తనకిష్టమైన 'స్పైడర్ మ్యాన్' పాత్రలో స్వయంగా నటించాలని ఆయన కలలు కన్నారు. అయితే ఈ భారీ ఒప్పందం పట్టాలెక్కకపోవడంతో ఆయన ఆశలు నెరవేరలేదని జాక్సన్ మేనల్లుడు తాజ్ జాక్సన్ తాజాగా వెల్లడించారు.
[FEATURED_IMAGE]
పాప్ సంగీతంతో ప్రపంచాన్ని ఉర్రూతలూగించిన మైఖేల్ జాక్సన్కు సూపర్ హీరోల ప్రపంచం అన్నా, ముఖ్యంగా మార్వెల్ అన్నా విపరీతమైన పిచ్చి. 1990వ దశకం నాటికి మార్వెల్ కామిక్ పుస్తకాల అమ్మకాలు పడిపోయి సంస్థ తీవ్ర అప్పుల్లో కూరుకుపోయింది. 1996లో ఏకంగా దివాలా తీసిన మార్వెల్, న్యూయార్క్ స్టాక్ ఎక్స్ఛేంజ్ నుంచి కూడా బయటకు వచ్చేసిన ఆ క్లిష్ట పరిస్థితిని జాక్సన్ తనకు అనుకూలంగా మార్చుకోవాలని ప్లాన్ చేశారు.
మార్వెల్ను కొనుగోలు చేసి ఆ సంస్థకు మళ్లీ ప్రాణం పోయాలని మైఖేల్ జాక్సన్ తన సోదరులతో తరచూ చర్చించేవారని ఆయన మేనల్లుడు తాజ్ జాక్సన్ వెల్లడించారు. ఈ భారీ ప్రాజెక్టులో లెజెండరీ క్రియేటర్ స్టాన్ లీని కూడా భాగస్వామిని చేయాలని ఆయన భావించారు. అయితే, ఏమైందో ఏమో కానీ ఈ డీల్ చివరికి కార్యరూపం దాల్చలేదు. ఒకవేళ ఈ ఒప్పందం జరిగి ఉంటే మైఖేల్ జాక్సన్ మార్వెల్ అధినేతగా హాలీవుడ్ బాక్సాఫీస్ వద్ద సరికొత్త చరిత్ర సృష్టించేవారు.
మైఖేల్ జాక్సన్ ఈ సంస్థను కొనుగోలు చేయాలనుకోవడం వెనుక మరో బలమైన కోరిక కూడా దాగి ఉంది. ఆయనకు స్పైడర్ మ్యాన్ పాత్ర అంటే ఎనలేని అభిమానం కావడంతో, హక్కులు దక్కించుకుని ఆ సూపర్ హీరోగా తానే స్వయంగా తెరపైకి రావాలని తీవ్రంగా ఆశపడ్డారు. ప్రపంచ స్థాయి క్రేజ్ ఉన్న మైఖేల్ జాక్సన్ నిజంగానే స్పైడర్ మ్యాన్ సూట్ వేసుకుని ఉంటే అప్పట్లో అది గ్లోబల్ బాక్సాఫీస్ వద్ద అతిపెద్ద సంచలనంగా మారేది.
ఆయన డీల్ విఫలమైన తర్వాత మార్వెల్ 'బ్లేడ్', 'ఎక్స్ మెన్' లాంటి చిత్రాలతో కోలుకుని, 2002లో టోబీ మాగ్వైర్ 'స్పైడర్ మ్యాన్'తో బ్లాక్ బస్టర్ హిట్ కొట్టింది. తాజాగా స్పైడర్ మ్యాన్ సిరీస్ నుంచి మరో కొత్త సినిమా వస్తున్న తరుణంలో మైఖేల్ జాక్సన్ పాత స్టోరీ మళ్లీ వైరల్ అవుతోంది. ఒకవేళ నాడు ఆ డీల్ ఓకే అయి, మైఖేల్ జాక్సన్ స్పైడర్ మ్యాన్గా ఎంట్రీ ఇచ్చి ఉంటే మార్వెల్ సినిమాటిక్ యూనివర్స్ రూపురేఖలు ఇంకెంత భిన్నంగా ఉండేవో కదా అని ఫ్యాన్స్ ఆశ్చర్యపోతున్నారు.
