'పుష్ప 2'తో గ్లోబల్ స్థాయిలో బాక్సాఫీస్ను షేక్ చేసిన ఐకాన్ స్టార్ అల్లు అర్జున్, తన తదుపరి సినిమాలతో కనీవినీ ఎరుగని సెన్సేషన్కు సిద్ధమవుతున్నారు. బ్లాక్బస్టర్ డైరెక్టర్ అట్లీ దర్శకత్వంలో రాబోతున్న సైన్స్ ఫిక్షన్ మూవీ 'రాకా'లో బన్నీ ఏకంగా త్రిపాత్రాభినయం చేయనున్నారు. ఆ వెంటనే కోలీవుడ్ క్రేజీ డైరెక్టర్ లోకేష్ కనగరాజ్తో చేయబోయే 'AA 23' ప్రాజెక్ట్లో కెరీర్లోనే తొలిసారిగా ఫుల్ లెంగ్త్ పవర్ఫుల్ పోలీస్ ఆఫీసర్గా కనిపించబోతున్నారనే వార్త ఇప్పుడు టాలీవుడ్ను ఊపేస్తోంది.
[FEATURED_IMAGE]'పుష్ప 2' సృష్టించిన సునామీతో ఐకాన్ స్టార్ అల్లు అర్జున్ క్రేజ్ పాన్ ఇండియా ఎల్లలు దాటి గ్లోబల్ స్థాయికి చేరింది. బాక్సాఫీస్ వద్ద రికార్డుల వేట పూర్తి చేసిన బన్నీ, ఇప్పుడు తన నెక్స్ట్ లైనప్ విషయంలో ఏమాత్రం కాంప్రమైజ్ కావడం లేదు. అభిమానుల అంచనాలకు ఏమాత్రం తగ్గకుండా, మునుపెన్నడూ టచ్ చేయని సరికొత్త జానర్లలో ప్రయోగాలు చేయడానికి సిద్ధమయ్యారు. ఇందులో భాగంగానే కోలీవుడ్ ఇండస్ట్రీని షేక్ చేసిన ఇద్దరు స్టార్ డైరెక్టర్లతో భారీ ప్రాజెక్టులను లైన్లో పెట్టారు.
హీరోలను డబుల్, ట్రిపుల్ రోల్స్లో చూపించడం డైరెక్టర్ అట్లీకి వెన్నతో పెట్టిన విద్య. 'మెర్సల్', 'జవాన్' లాంటి బ్లాక్బస్టర్స్లో ఇదే ఫార్ములాతో మ్యాజిక్ చేసిన అట్లీ, ఇప్పుడు అల్లు అర్జున్తో ఏకంగా ఒక భారీ సైన్స్ ఫిక్షన్ మూవీని తెరకెక్కించనున్నారు. 'రాకా' అనే వర్కింగ్ టైటిల్తో ప్రచారంలో ఉన్న ఈ సినిమాలో బన్నీ ముగ్గురు విభిన్న వ్యక్తులుగా కనిపించబోతున్నారని టాక్. ఇందులో తండ్రీకొడుకుల పాత్రలతో పాటు, కథను మలుపుతిప్పే భయంకరమైన విలన్ పాత్రను కూడా స్టైలిష్ స్టారే స్వయంగా పోషించనున్నట్లు తెలుస్తోంది.
అట్లీతో ఈ పాన్ ఇండియా ప్రాజెక్ట్ పూర్తి కాగానే, బన్నీ నేరుగా సెన్సేషనల్ డైరెక్టర్ లోకేష్ కనగరాజ్ క్యాంప్లోకి అడుగుపెట్టనున్నారు. సాధారణంగా లోకేష్ సినిమాలు అంటేనే డ్రగ్స్, వెపన్స్, మాఫియా, గ్యాంగ్స్టర్ డ్రామాలు గుర్తొస్తాయి. అయితే 'పుష్ప' సిరీస్లో బన్నీ ఇప్పటికే ఆ తరహా రస్టిక్ రోల్ చేయడంతో, మళ్లీ అలాంటి కథ రిపీట్ కాకుండా లోకేష్ ఒక పవర్ఫుల్ స్క్రిప్ట్ రెడీ చేస్తున్నట్లు సమాచారం. ఈ సినిమాలో అల్లు అర్జున్ ఒక సీరియస్ పోలీస్ ఆఫీసర్గా చార్జ్ తీసుకోబోతున్నారని ఇండస్ట్రీలో గట్టిగా వినిపిస్తోంది.
ఇటీవల ఒక ఇంటర్వ్యూలో మాట్లాడిన లోకేష్ కనగరాజ్.. 'కాక కాక', 'వెట్టైయాడు విళైయాడు', 'సామి' లాంటి పక్కా పోలీస్ స్టోరీలు వచ్చి చాలా కాలం అవుతోందని, అలాంటి ఒక పవర్ఫుల్ కాప్ మూవీ చేయాలని తన మనసులో ఉందని హింట్ ఇచ్చారు. ఈ మాటలతో అల్లు అర్జున్ ఫ్యాన్స్ అలర్ట్ అయిపోయారు. లోకేష్ ప్లాన్ చేస్తున్న ఆ కాప్ మూవీ 'ఏఏ 23' ప్రాజెక్టే అని ఫిక్స్ అవుతున్నారు.
తన కెరీర్లో అల్లు అర్జున్ ఇప్పటివరకు ఫుల్ లెంగ్త్ సీరియస్ పోలీస్ పాత్ర చేయలేదు. 'రేసుగుర్రం' సినిమాలో కొద్దిసేపు పోలీస్ గా కనిపించిన బన్నీ, ఇప్పుడు లోకేష్ మార్క్ డార్క్ యాక్షన్ థ్రిల్లర్లో ఖాకీ డ్రెస్ వేస్తే థియేటర్లు దద్దరిల్లడం ఖాయం. ఒకవైపు సైన్స్ ఫిక్షన్ విలన్గా, మరోవైపు యాక్షన్ ప్యాక్డ్ కాప్గా.. రాబోయే రోజుల్లో బాక్సాఫీస్ వద్ద ఐకాన్ స్టార్ సృష్టించబోయే విధ్వంసం మామూలుగా ఉండదని ట్రేడ్ వర్గాలు అంచనా వేస్తున్నాయి.
