యూట్యూబ్ వీడియోలతో కెరీర్ మొదలుపెట్టి 'లిటిల్ హార్ట్స్' సినిమాతో సిల్వర్ స్క్రీన్‌పై మంచి గుర్తింపు తెచ్చుకున్న యంగ్ హీరో మౌళి.. తన స్క్రిప్ట్ సెలెక్షన్ విషయంలో తీసుకుంటున్న నిర్ణయాలు ఇండస్ట్రీలో ఆసక్తి రేపుతున్నాయి. తన కొత్త సినిమా 'దొంగ నా కొడుకు' ప్రమోషన్స్‌లో బిజీగా ఉన్న ఈ యంగ్ టాలెంట్, ఇతర కుర్ర హీరోల్లాగా తాను కేవలం మాస్, కమర్షియల్ ఫార్మాట్‌కే పరిమితం కానని కుండబద్దలు కొట్టాడు. జోనర్ ఏదైనా కథ బాగుంటేనే గ్రీన్ సిగ్నల్ ఇస్తానంటూ మౌళి చెప్పిన మాటలు నెట్టింట వైరల్ అవుతున్నాయి.
[FEATURED_IMAGE]ఆ భ్రమలు నాకు లేవు!
సాధారణంగా యూట్యూబ్ నుంచి లేదా షార్ట్ ఫిల్మ్స్ నుంచి ఇండస్ట్రీకి వచ్చే యంగ్ యాక్టర్స్ చాలా త్వరగా కమర్షియల్ మాస్ హీరో అనిపించుకోవాలని ఉవ్విళ్లూరుతుంటారు. కానీ, 'లిటిల్ హార్ట్స్' సినిమాతో తొలి అడుగులోనే మెప్పించిన మౌళి ఆలోచనా విధానం మాత్రం పూర్తిగా భిన్నంగా ఉంది. ఫలానా తరహా సినిమాలు మాత్రమే చేయాలనే మైండ్ సెట్ తనకి అస్సలు లేదని ఆయన తేల్చి చెప్పాడు.
కథే నా ఫస్ట్ ఛాయిస్
తాజాగా తన కొత్త చిత్రం ‘దొంగ నా కొడుకు’ ప్రమోషన్స్‌లో పాల్గొన్న మౌళి ఫ్యూచర్ ప్రాజెక్టుల గురించి క్లారిటీ ఇచ్చాడు. కథలు వినేటప్పుడు తాను ఎప్పుడూ ఓపెన్-మైండ్‌తో ఉంటానని స్పష్టం చేశాడు. మనం ముందే ఒక ఫార్మాట్ ఫిక్స్ చేసుకుని కథలు వెతికితే, మంచి స్క్రిప్టులు మిస్ అయ్యే ప్రమాదం ఉందని ఎంతో మెచ్యూర్డ్‌గా సమాధానం ఇచ్చాడు.
ఏ జోనర్ అయినా రెడీ..
కథ ఏదైనా సరే, వింటున్నప్పుడు ఇంట్రెస్టింగ్‌గా ఉండి, చూసేవాళ్లకు బోర్ కొట్టకుండా ఉంటే చాలు అని మౌళి తన కండిషన్ చెప్పాడు. కామెడీ, డ్రామా, ఎమోషన్ అని తేడా లేకుండా కంటెంట్ బాగుంటే భారీ కమర్షియల్ సినిమా అయినా చేయడానికి తనకు ఎలాంటి అభ్యంతరం లేదని చెప్పుకొచ్చాడు. ఎలాంటి బ్యాక్‌గ్రౌండ్ లేకుండా వచ్చి విభిన్నమైన కథలతో దూసుకుపోతున్న మౌళి.. తన తాజా చిత్రంతో బాక్సాఫీస్ వద్ద ఎలాంటి మ్యాజిక్ చేస్తాడోనని అభిమానులు ఆసక్తిగా ఎదురుచూస్తున్నారు.
