‘రంగస్థలం’ లాంటి ఇండస్ట్రీ హిట్ తర్వాత గ్లోబల్ స్టార్ రామ్ చరణ్, క్రియేటివ్ డైరెక్టర్ సుకుమార్ కాంబోలో రాబోతున్న 'RC17' మూవీ కోసం యావత్ దేశం ఆసక్తిగా ఎదురుచూస్తోంది. అయితే వందల కోట్లతో తెరకెక్కే పాన్ ఇండియా ప్రాజెక్టుల కోసం సాధారణంగా బాలీవుడ్ భామల వెంట పడటం మన దర్శక నిర్మాతలకు అలవాటు. కానీ సుకుమార్ మాత్రం దానికి భిన్నంగా.. చరణ్ సరసన నటించేందుకు ఓ అచ్చమైన తెలుగమ్మాయిని ఎంపిక చేసే ఆలోచనలో ఉన్నారన్న వార్త ఇప్పుడు టాలీవుడ్ వర్గాల్లో పెను సంచలనంగా మారింది.
[FEATURED_IMAGE]బాలీవుడ్ భామలు కాదు.. పక్కా లోకల్!
మైత్రీ మూవీ మేకర్స్ బ్యానర్‌పై అత్యంత భారీ బడ్జెట్‌తో తెరకెక్కనున్న 'ఆర్‌సీ 17' అనౌన్స్ అయినప్పటి నుంచే హీరోయిన్ ఎవరన్న దానిపై రకరకాల ఊహాగానాలు మొదలయ్యాయి. మొదట చైల్డ్ ఆర్టిస్ట్‌గా మెప్పించిన సారా అర్జున్ హీరోయిన్‌గా నటించబోతోందని వార్తలు వచ్చాయి. ఆ తర్వాత ‘సాయి’ ఫేమ్‌ అనీత్ పడ్డా పేరు కూడా బలంగా వినిపించింది. అయితే ఇప్పుడు అనూహ్యంగా ఈ రేసులోకి తెలుగు అమ్మాయి సాత్విక వీరవల్లి పేరు వచ్చి చేరింది.
ఒక్క సినిమా రిలీజ్ అవ్వకుండానే..
చరణ్ లాంటి గ్లోబల్ స్టార్ సరసన నటించే రేసులో ఉన్న సాత్విక.. ఇప్పటివరకు వెండితెరపై ఒక్క సినిమాతో కూడా ప్రేక్షకుల ముందుకు రాలేదు. దుల్కర్ సల్మాన్ హీరోగా నటిస్తున్న ‘ఆకాశంలో ఒక తార’ సినిమాతో ఆమె హీరోయిన్‌గా పరిచయం కాబోతోంది. దీనికి తోడు అక్కినేని నాగచైతన్య 25వ చిత్రంలోనూ ఆమెకే అవకాశం దక్కిందన్న టాక్ ఉంది. ఈ రెండు సినిమాలు రిలీజ్ కాకముందే.. ఇప్పుడు ఏకంగా రామ్ చరణ్ సినిమా లిస్ట్‌లో ఆమె పేరు చేరడం ఇండస్ట్రీని ఆశ్చర్యపరుస్తోంది.
'రామలక్ష్మి'ని మించిన పాత్ర ఉంటుందా?
'రంగస్థలం' సినిమాలో రామలక్ష్మిగా సమంతను ఎవరూ ఊహించని డీగ్లామర్ రోల్‌లో చూపించి మెప్పించాడు సుకుమార్. తన కథకు, పాత్రకు న్యాయం చేసే నటీనటులనే ఆయన ఎక్కువగా నమ్ముతాడు. మరి ఇప్పుడు వినిపిస్తున్న సారా అర్జున్, అనీత్ పడ్డా, సాత్విక వీరవల్లి.. ఈ ముగ్గురిలో సుకుమార్ లెక్కలకు ఎవరు సరిపోతారో చూడాలి. త్వరలోనే ఈ ప్రాజెక్ట్ సెట్స్‌పైకి వెళ్లేందుకు సన్నాహాలు జరుగుతున్నాయి.
లోకల్ టాలెంట్‌కు గేమ్ ఛేంజర్
పాన్ ఇండియా సినిమాల పేరుతో కోట్ల రూపాయలు రెమ్యునరేషన్ ఇచ్చి ముంబై హీరోయిన్లను దిగుమతి చేసుకుంటున్న ఈ టైమ్‌లో.. ఒకవేళ సుకుమార్ నిజంగానే ఒక తెలుగమ్మాయిని మెయిన్ లీడ్‌గా తీసుకుంటే, అది ఇండస్ట్రీకి ఓ పెద్ద గేమ్ ఛేంజర్ అవుతుంది. స్టార్ డమ్ కంటే కంటెంట్, యాక్టింగ్ టాలెంట్ ముఖ్యమని నమ్మే సుకుమార్ లాంటి డైరెక్టర్.. సాత్విక లాంటి కొత్త నటి చేతిలో చరణ్ సినిమా పెడితే అది తెలుగు హీరోయిన్ల దశ తిరిగిపోయినట్లే! అయితే అధికారిక ప్రకటన వచ్చే వరకు ఫ్యాన్స్ ఈ సస్పెన్స్‌ను భరించక తప్పదు.
