టాలీవుడ్ అగ్ర నిర్మాత దిల్ రాజు 2028 సంక్రాంతి బరిపై ఇప్పుడే కర్చీఫ్ వేశారు. బ్లాక్బస్టర్ దర్శకుడు అనిల్ రావిపూడితో తన బ్యానర్లో మరో భారీ ప్రాజెక్ట్ ఉండబోతోందని, ఈ సినిమా 2028 సంక్రాంతికి ప్రేక్షకుల ముందుకు రానుందని ఆయన అధికారికంగా ప్రకటించారు. ఈ ప్రాజెక్ట్లో నందమూరి బాలకృష్ణ నటించనున్నారనే ప్రచారంపై స్పందించిన దిల్ రాజు, కథ లాక్ అయిన తర్వాతే హీరోను ఫైనల్ చేస్తామని స్పష్టం చేశారు.
[FEATURED_IMAGE]
సంక్రాంతి బరిలో దిగి బాక్సాఫీస్ వద్ద బ్లాక్బస్టర్లు కొట్టడం టాలీవుడ్ అగ్ర నిర్మాత దిల్ రాజుకు వెన్నతో పెట్టిన విద్య. పండగ సీజన్లో ఫ్యామిలీ ఆడియన్స్ పల్స్ పట్టుకోవడంలో ఆయనది ప్రత్యేక శైలి. తాజాగా రణబీర్ కపూర్, సాయి పల్లవి, యశ్ కాంబినేషన్లో నితీశ్ తివారీ తెరకెక్కించి 1,000 కోట్ల క్లబ్లో చేరిన పౌరాణిక చిత్రం ‘రామాయణ’ సక్సెస్ మీట్లో దిల్ రాజు పాల్గొన్నారు. ఈ వేదికపై తన ఫ్యూచర్ ప్రాజెక్టుల గురించి మాట్లాడుతూ, 2028 సంక్రాంతి రేసులో తాను ఉండబోతున్నట్లు కుండబద్దలు కొట్టారు.
విజయవంతమైన దర్శకుడు అనిల్ రావిపూడితో శ్రీ వెంకటేశ్వర క్రియేషన్స్ బ్యానర్లో నెక్స్ట్ సినిమా ఉండబోతోందనే వార్తలపై మీడియా అడిగిన ప్రశ్నకు దిల్ రాజు సూటిగా బదులిచ్చారు. “అవును, మా సంస్థలో అనిల్ రావిపూడితో కచ్చితంగా ఒక సినిమా ఉంది. ఆ ప్రాజెక్ట్ 2027లో పట్టాలెక్కుతుంది. 2028 సంక్రాంతి బరిలో నిలపాలని ప్లాన్ చేస్తున్నాం” అని ఆయన క్లారిటీ ఇచ్చారు.
అయితే, ఈ క్రేజీ కాంబినేషన్లో హీరో నందమూరి బాలకృష్ణ అంటూ ఇండస్ట్రీలో జోరుగా సాగుతున్న ప్రచారంపై కూడా దిల్ రాజు స్పందించారు. “అనిల్ రావిపూడి వర్కింగ్ స్టైల్ మీకు తెలిసిందే. ఆయన ముందుగా ఒక కథ అనుకున్న తర్వాత, దానికి ఏ హీరో సెట్ అవుతారో చూసి నిర్ణయం తీసుకుంటారు. ప్రస్తుతం అనిల్ చేస్తున్న సినిమా 2027 జనవరి 12న సంక్రాంతికి రానుంది. ఆ సినిమా పూర్తయిన తర్వాత ఆయన నాకో ఐడియా చెప్తారు. ఆ ఐడియా విన్న తర్వాతే ఏ హీరోతో వెళ్లాలనేది నిర్ణయిస్తాం” అని వివరించారు.
హీరో ఎవరన్నది ఇంకా ఖరారు కాలేదని, సోషల్ మీడియాలో రకరకాల రూమర్స్ వస్తున్నాయని ఆయన చెప్పారు. ఒక ప్రాజెక్ట్ సెట్స్పై ఉన్నప్పుడు తాను దర్శకులపై ఎలాంటి ఒత్తిడి తీసుకురానని, అనిల్ ప్రస్తుతం చేస్తున్న సినిమా సూపర్ హిట్ అవ్వాలన్నదే తన మొదటి ప్రాధాన్యత అని దిల్ రాజు తేల్చి చెప్పారు. హీరో ఎవరనేది ప్రస్తుతానికి సస్పెన్స్ అయినప్పటికీ, దిల్ రాజు-అనిల్ రావిపూడిల కాంబో 2028 సంక్రాంతికి కన్ఫర్మ్ కావడంతో ఇండస్ట్రీలో భారీ అంచనాలు మొదలయ్యాయి.

