ఏడాదికి రెండు సినిమాలు ఇస్తానన్న మాటను డార్లింగ్ ప్రభాస్ నిలబెట్టుకోలేకపోయారని ఆయన ఫ్యాన్స్ తెగ ఫీల్ అవుతున్నారు. కట్ చేస్తే.. ఆ నిరాశను మొత్తం ఒకేసారి తీర్చేస్తూ వచ్చే ఏడాది బాక్సాఫీస్ దగ్గర పాన్ ఇండియా జాతర చేయడానికి ప్రభాస్ రెడీ అయ్యారు. వందల కోట్లు బడ్జెట్ పెట్టి తీసే ఒక భారీ సినిమా రావడానికే మూడేళ్లు పడుతున్న ఈ రోజుల్లో.. ఒకే ఏడాది ఏకంగా మూడు సినిమాలతో ఒక ఇండియన్ సూపర్ స్టార్ థియేటర్లలోకి దిగడం అనేది మామూలు విషయం కాదు. ఇంతకీ ఇండియన్ బాక్సాఫీస్ రికార్డులను తిరగరాయబోతున్న ఆ మూడు భారీ ప్రాజెక్టుల అప్‌డేట్స్ ఏంటో చూద్దాం.
[FEATURED_IMAGE]ఆ ముచ్చట ఈ ఏడాదితో తీరినట్లేనా?
ఏడాదికి కనీసం రెండు సినిమాలు విడుదల చేస్తానని డార్లింగ్ ప్రభాస్ తన అభిమానులకు గతంలో మాటిచ్చారు. కానీ ప్రాక్టికల్‌గా ఆ హామీని నిలబెట్టుకోలేకపోయారు. గతేడాది ప్రభాస్ నుంచి ఒక్క కొత్త సినిమా కూడా రాలేదు. పోనీ ఈ ఏడాదైనా రెండు వస్తాయని ఫ్యాన్స్ ఆశపడితే.. కేవలం మారుతి డైరెక్షన్‌లో వస్తున్న ‘రాజా సాబ్’తోనే సరిపెట్టుకోవాల్సిన పరిస్థితి ఏర్పడింది.
డిసెంబర్ నుంచి మార్చికి వెళ్లిన 'ఫౌజీ'
అయితే వచ్చే ఏడాది మాత్రం ప్రభాస్ ఫ్యాన్స్‌కు డబుల్ కాదు, ఏకంగా ట్రిపుల్ ట్రీట్ ఇవ్వనున్నారు. అందులో మొదటిది హను రాఘవపూడి దర్శకత్వంలో తెరకెక్కుతున్న హిస్టారికల్ యాక్షన్ డ్రామా ‘ఫౌజీ’. ఈ సినిమా వాస్తవానికి ఈ ఏడాది డిసెంబర్‌లోనే విడుదల కావాల్సి ఉంది. కానీ షూటింగ్, పోస్ట్ ప్రొడక్షన్ పనుల వల్ల వాయిదా పడి, వచ్చే ఏడాది మార్చి 19న థియేటర్లలోకి రాబోతోంది.
దీపావళికి 'స్పిరిట్' బాణసంచా
సందీప్ రెడ్డి వంగా - ప్రభాస్ అనే క్రేజీ కాంబో గురించి దేశవ్యాప్తంగా చర్చే నడుస్తోంది. వీరిద్దరి కలయికలో వస్తున్న ‘స్పిరిట్’ మూవీ కూడా రిలీజ్ డేట్ మార్చుకున్నట్లు తెలుస్తోంది. 'ఫౌజీ' మార్చిలో రాబోతుండటంతో.. 'స్పిరిట్' మూవీని ఏకంగా 2027 దీపావళి పండుగకు తీసుకురావాలని మేకర్స్ భారీ ప్లాన్ చేస్తున్నారు.
ట్రిపుల్ ట్రీట్‌గా 'బాహుబలి' ఎంట్రీ
ఈ రెండు లైవ్ యాక్షన్ సినిమాలతో పాటు ప్రభాస్ జాబితాలోకి మరో ప్రెస్టీజియస్ ప్రాజెక్ట్ చేరింది. ఎస్ఎస్ రాజమౌళి సృష్టించిన అద్భుతమైన బాహుబలి ప్రపంచాన్ని ఇప్పుడు యానిమేషన్ రూపంలో తీసుకువస్తున్నారు. ‘బాహుబలి: ది ఎటర్నల్ వార్ – పార్ట్ 1’ పేరుతో వస్తున్న ఈ యానిమేషన్ మూవీని కూడా వచ్చే ఏడాదే విడుదల చేయాలని మేకర్స్ ప్లాన్ చేస్తున్నారు. దీంతో ప్రభాస్ ఖాతాలో ఏకంగా మూడు సినిమాలు పడినట్లే!
కల్కి 2, సలార్ 2 లైనప్..
ప్రస్తుతం సెట్స్‌పై ఉన్న భారీ ప్రాజెక్ట్ ‘కల్కి 2’ షూటింగ్ శరవేగంగా జరుగుతోంది. మరోవైపు సెన్సేషనల్ డైరెక్టర్ ప్రశాంత్ నీల్ ఇటీవలే వెల్లడించినట్లుగా ‘సలార్ 2’ షూటింగ్ వచ్చే ఏడాది జూన్ నుంచి లాంఛనంగా ప్రారంభం కానుంది. ప్రభాస్ కెరీర్‌లోనే ఈ రెండు ప్రాజెక్టులు అత్యంత కీలకం కానున్నాయి. ఇక వీటి తర్వాత ప్రభాస్ నెక్స్ట్ ఏ డైరెక్టర్‌తో జతకట్టబోతున్నాడన్నది ఆసక్తికరంగా మారింది. వచ్చే ఏడాది దీనిపై కొత్త ప్రకటనలు రానున్నాయి.
మూడేళ్లకో సినిమా తీసే స్టార్ హీరోలు ఉన్న మన ఇండస్ట్రీలో.. ప్రభాస్ లాంటి గ్లోబల్ స్టార్ నుంచి ఒకే ఏడాది ఫౌజీ, స్పిరిట్, బాహుబలి యానిమేషన్ లాంటి మూడు సినిమాలు రావడం కచ్చితంగా ఒక హిస్టారిక్ మూమెంట్ అవుతుంది. ఈ లైనప్ కేవలం ప్రభాస్ ఫ్యాన్స్‌కే కాదు, వేల కోట్లు టర్నోవర్ జరిగే ఇండియన్ బాక్సాఫీస్‌కు ఒక సంజీవని లాంటిది. ఈ ట్రిపుల్ ధమాకాతో పాత పాన్ ఇండియా రికార్డులన్నీ చెరిగిపోవడం, కొత్తవి క్రియేట్ అవ్వడం గ్యారెంటీ!
