దర్శకధీరుడు ఎస్.ఎస్. రాజమౌళి, సూపర్ స్టార్ మహేష్ బాబు కాంబినేషన్లో తెరకెక్కుతున్న గ్లోబల్ అడ్వెంచర్ చిత్రం ‘వారణాసి’ షూటింగ్ పూర్తయిందని చిత్రబృందం అధికారికంగా ప్రకటించింది. సినిమా ప్రస్తుతం సీజీ (CG), రీ-రికార్డింగ్ పనులతో కీలక పోస్ట్ ప్రొడక్షన్ దశలోకి అడుగుపెట్టిందని, త్వరలోనే డబ్బింగ్ కార్యక్రమాలు మొదలుకానున్నాయని మేకర్స్ వెల్లడించారు. అయితే అసలైన బ్లాస్ట్ కోసం మరికొంత సమయం వేచి చూడాలంటూ టీమ్ ఇచ్చిన హింట్ ఇప్పుడు సోషల్ మీడియాలో తీవ్ర ఉత్కంఠ రేపుతోంది.
[FEATURED_IMAGE]
‘బాహుబలి’, ‘ఆర్ఆర్ఆర్’ వంటి సంచలన చిత్రాలతో భారతీయ సినిమా ఖ్యాతిని ఆస్కార్ వేదికపై నిలిపిన దర్శకధీరుడు ఎస్.ఎస్. రాజమౌళి, ఇప్పుడు సూపర్ స్టార్ మహేష్ బాబుతో కలిసి ‘వారణాసి’ అనే గ్లోబల్ అడ్వెంచర్ ఎపిక్ను తీర్చిదిద్దుతున్నారు. ప్రియాంక చోప్రా, పృథ్వీరాజ్ సుకుమారన్ కీలక పాత్రల్లో నటిస్తున్న ఈ ప్రతిష్టాత్మక ప్రాజెక్ట్పై ప్రపంచవ్యాప్తంగా భారీ అంచనాలు నెలకొన్నాయి. సరిగ్గా ఏడాది క్రితం ఈ సినిమా టైటిల్ రివీల్ ఈవెంట్ దేశవిదేశాల్లోని సినీ ప్రియుల దృష్టిని ఆకర్షించగా, తాజాగా చిత్రబృందం ఇచ్చిన మరో అప్డేట్ అభిమానుల్లో కొత్త జోష్ నింపింది.
షూటింగ్ కంప్లీట్.. పోస్ట్ ప్రొడక్షన్ షురూ!
అభిమానులను సర్ప్రైజ్ చేస్తూ ‘వారణాసి’ అధికారిక ఎక్స్ (X) ఖాతా ద్వారా మేకర్స్ కీలక సమాచారాన్ని పంచుకున్నారు. ఈ చిత్రానికి సంబంధించిన షూటింగ్ పూర్తియిందని స్పష్టం చేశారు. ప్రస్తుతం భారీ స్థాయిలో విజువల్ ఎఫెక్ట్స్ (CG) పనులతో పాటు రీ-రికార్డింగ్ పనులు శరవేగంగా జరుగుతున్నాయని తెలిపారు. ఇంకా డబ్బింగ్ కార్యక్రమాలు ప్రారంభం కావాల్సి ఉందని పేర్కొంటూ, సినిమా నిర్మాణం అత్యంత కీలకమైన పోస్ట్ ప్రొడక్షన్ దశలోకి ప్రవేశించిందని క్లారిటీ ఇచ్చారు.
‘‘అసలైన బ్లాస్ట్ కోసం వేచి చూడండి’’.. జక్కన్న సర్ప్రైజ్ ఏంటి?
అయితే ఈ అప్డేట్లో అన్నింటికంటే ఎక్కువగా ఆకట్టుకున్న అంశం చివర్లో చిత్రబృందం పెట్టిన ట్విస్ట్. ‘‘ఇది అప్డేట్ అని మీరు అనుకుంటే ఇది అప్డేట్.. లేదంటే అసలైన బ్లాస్ట్ కోసం మరికొంత సమయం వేచి చూడాల్సిందే’’ అనే అర్థం వచ్చేలా టీమ్ ఆసక్తికర వ్యాఖ్యలు చేసింది. ఈ ఒక్క హింట్తో మహేష్ బాబు, రాజమౌళి అభిమానుల్లో ఉత్కంఠ తారాస్థాయికి చేరింది.
అసలు రాజమౌళి బృందం ఇవ్వబోయే ఆ ‘అసలైన బ్లాస్ట్’ ఏంటనే దానిపై నెట్టింట జోరుగా చర్చ నడుస్తోంది. సినిమా నుంచి భారీ గ్లింప్స్ వీడియోను విడుదల చేయబోతున్నారా, లేక మహేష్ బాబు ‘రుద్ర’ పాత్ర సహా ప్రధాన పాత్రల లుక్స్, కథా నేపథ్యానికి సంబంధించిన కీలక వివరాలను బయటపెట్టబోతున్నారా అనే ఆసక్తి నెలకొంది. ఈ చిన్న పోస్ట్తోనే సోషల్ మీడియాలో ‘వారణాసి’ పేరు మరోసారి నేషనల్ వైడ్ ట్రెండింగ్లోకి దూసుకెళ్లింది.

