ఎఫ్‌-1 వీసా తిరస్కరణ: భారతీయులే అధికం, ఆందోళనలో విద్యార్థులు!

అమెరికాలో F-1 విద్యార్థి వీసాలు తిరస్కరణకు గురైన వారిలో ఇండియన్‌ స్టూడెంట్సే ఎక్కువగా ఉన్నారు. 50 శాతానికి పైగా భారతీయ విద్యార్ధుల F-1 విద్యార్థి వీసాలు తిరస్కరణకు గురికావడం ఆందోళన కలిగిస్తోంది. దీనిపై వెంటనే కేంద్రం జోక్యం చేసుకుని అమెరికాతో చర్చలు జరపాలని కాంగ్రెస్ డిమాండ్‌ చేసింది. మార్చి నెలలో 1,000 మంది విదేశీ విద్యార్ధుల వీసాలను రిజెక్ట్‌ చేసింది ట్రంప్‌ సర్కార్‌.

భారతీయ విద్యార్థుల వీసా కష్టాలు రెట్టింపు

అమెరికాలో భారతీయ విద్యార్ధుల వీసా కష్టాలు మరింత ఎక్కువయ్యాయి. F-1 విద్యార్థి వీసాలు రిజెక్ట్‌ అయిన వారిలో 50 శాతానికి పైగా భారతీయ విద్యార్ధులే ఉన్నారని అమెరికా లాయర్స్‌ అసోసియేషన్‌ స్వయంగా వెల్లడించింది. విద్యార్ధులు మరియు విశ్వవిద్యాలయాల నుండి సేకరించిన డేటా ఆధారంగా ఈ నివేదికను విడుదల చేశారు. గత నెలలో డోనాల్డ్ ట్రంప్‌ ప్రభుత్వం ఏకంగా 1,000 మంది విదేశీ విద్యార్ధుల వీసాలను తిరస్కరించింది.

వీసా తిరస్కరణల్లో భారతీయులే టాప్

భారతీయ విద్యార్ధుల 50 శాతం F-1 విద్యార్థి వీసాలు రిజెక్ట్‌ కాగా, 14 శాతంతో చైనా విద్యార్ధులు రెండో స్థానంలో ఉన్నారు. దక్షిణ కొరియా, నేపాల్‌ మరియు బంగ్లాదేశ్‌కు చెందిన ఎక్కువ మంది విద్యార్ధుల వీసాలు కూడా రద్దు చేసినట్టు అమెరికా ఇమ్మిగ్రేషన్ లాయర్స్ అసోసియేషన్ (AILA) ప్రకటించింది. 2023-24 విద్యా సంవత్సరంలో అమెరికాకు ఉన్నత విద్యను అభ్యసించడానికి వెళ్లిన వారిలో భారతీయ విద్యార్ధులే అత్యధికంగా ఉన్నారు. ఆ ఏడాదిలో అమెరికాకు మొత్తం 11 లక్షల 26,690 మంది విద్యార్ధులు వెళ్లగా, వారిలో 3 లక్షల 31,602 మంది భారతీయ విద్యార్ధులు ఉన్నారు. 2 లక్షల 77 వేల మంది చైనా విద్యార్ధులతో వారు రెండో స్థానంలో ఉన్నారు.

కేంద్రం జోక్యం చేసుకోవాలని కాంగ్రెస్ డిమాండ్

అమెరికాలో భారతీయ విద్యార్ధుల వీసా సమస్యలపై కాంగ్రెస్ పార్టీ తీవ్ర ఆందోళన వ్యక్తం చేసింది. ఎలాంటి సరైన కారణాలు లేకుండానే వీసాలు తిరస్కరిస్తున్నట్టు సమాచారం వస్తోందని కాంగ్రెస్‌ పార్టీ నేత జైరాం రమేశ్‌ ఆందోళన వ్యక్తం చేశారు. ఈ విషయంపై విదేశాంగశాఖ మంత్రి జైశంకర్‌ వెంటనే అమెరికాతో చర్చలు జరపాలని కాంగ్రెస్ డిమాండ్‌ చేసింది. చిన్న చిన్న కారణాలతో భారతీయ విద్యార్ధులను వెనక్కి పంపిస్తున్నారని ఆరోపణలు వస్తున్నాయి. పార్కింగ్‌ వివాదాలు, సీటు బెల్ట్‌ పెట్టుకోకపోవడం, పోలీసులు ఆపినా వాహనాన్ని ఆపకపోవడం వంటి ఆరోపణలతో విద్యార్ధులను వెనక్కి పంపిస్తున్నారని సమాచారం. ఈ నేపథ్యంలోనే వీసాల రద్దుకు సంబంధించిన సమస్యలను ఎదుర్కొంటున్న భారతీయ విద్యార్థులతో అమెరికాలోని భారత రాయబార కార్యాలయాలు సంప్రదిస్తున్నాయని, వారికి సాధ్యమైనంత మద్దతు ఇస్తున్నాయని విదేశాంగ మంత్రిత్వ శాఖ (MEA) తెలిపింది. అమెరికాలోని భారతీయ విద్యార్థులు తమ వీసాల రద్దుపై స్థానిక అధికారుల నుండి సమాచారం అందుకున్న తర్వాత MEA ప్రతినిధి రణధీర్ జైస్వాల్ ఈ వ్యాఖ్యలు చేశారు.

ట్రంప్ పాలనలో మరింత కష్టాలు తప్పవా?

F-1 వీసా అనేది నాన్‌-ఇమిగ్రేంట్‌ వీసా. ప్రపంచవ్యాప్తంగా ఉన్న విద్యార్థులు అమెరికాలో ఫుల్‌ టైమ్‌ ఎడ్యుకేషన్‌ను అభ్యసించేందుకు ఈ వీసా అనుమతినిస్తుంది. అమెరికాలోని విద్యా సంస్థలు ఏటా రెండుసార్లు ప్రవేశాలను అనుమతిస్తాయి. ఆగస్టు – డిసెంబర్‌ సెమిస్టర్‌ సమయంలోనే మన విద్యార్థులు అధికంగా వెళ్తుంటారు. ఇప్పుడు ట్రంప్ ప్రభుత్వం అధికారంలోకి రావడంతో విద్యార్థి వీసాల సంఖ్యలో మరింత కోత పడుతుందనే భయాలు నెలకొన్నాయి. ట్రంప్ తన మొండి వైఖరికి పేరుగాంచిన వ్యక్తి కాబట్టి, విద్యార్థి వీసాలకు కోత పడితే పైచదువులు చదవాలనుకునే విద్యార్థులకు కష్టాలు తప్పవని నిపుణులు అంటున్నారు. అదే జరిగితే, మన భారతీయ విద్యార్థులు కూడా పెద్ద ఎత్తున నష్టపోతారు. ఈసారి స్టూడెంట్‌ వీసాల సంఖ్య భారీగా తగ్గుతోంది. ట్రంప్ అధికారంలో ఉండటం మరియు ఆయన కఠినమైన విధానాల వల్ల స్టూడెంట్‌ వీసాల సంఖ్య గణనీయంగా తగ్గిపోయింది. ఈ పరిస్థితిని మన విద్యార్థులు ఎలా ఎదుర్కొంటారో చూడాలి.