మనం తీసుకునే ప్రతి ఆహారంలోని కేలరీలను కరిగించడానికి మన శరీరానికి కొంత సమయం, శ్రమ పడుతుంది. మనం తినే ఆహారానికి, చేయాల్సిన వ్యాయామానికి మధ్య సమతుల్యత లేకపోతే, ఆ కేలరీలు కొవ్వుగా మారి, బరువు పెరగడానికి కారణమవుతాయి. పోషకాహార నిపుణుల లెక్కల ప్రకారం, గంటకు 5 కి.మీ. వేగంతో నడవడం వల్ల నిమిషానికి 4-7 కిలో కేలరీలు ఖర్చవుతాయి. అంటే, మీరు 400 కేలరీల భోజనం తింటే, దానిని కరిగించడానికి సుమారు 60-90 నిమిషాల నడక అవసరం.
రోజూ తినే ఆహారం సంగతేంటి?
మనం రోజూ తినే ప్రధాన వంటకాలైన అన్నం, చపాతీల విషయానికి వస్తే, ఒక కప్పు అన్నంలో ఉండే కేలరీలను జీర్ణం చేసుకోవడానికి 53 నిమిషాలు నడవాలి. అదేవిధంగా, మూడు చపాతీలలో ఉండే కేలరీలను బర్న్ చేయడానికి 70 నిమిషాల నడక అవసరం. ఆరోగ్యకరమైనదిగా భావించే రెండు గోధుమ పరాఠాలు తిన్నా, వాటిని కరిగించడానికి కూడా 70 నిమిషాలు నడవాల్సి వస్తుంది.
నోరూరించే స్నాక్స్.. భారీ నడక
ఇక నోరూరించే స్నాక్స్, ఫాస్ట్ ఫుడ్స్ విషయంలో ఈ లెక్కలు మరింత భయపెడతాయి. ఉదాహరణకు, మీరు ఇష్టంగా తినే రెండు సమోసాలలో ఏకంగా 522 కేలరీలు ఉంటాయి. వీటిని కరిగించడానికి మీరు సుమారు 135 నిమిషాలు (రెండు గంటల పదిహేను నిమిషాలు) నడవాల్సి ఉంటుంది. రుచికరమైన ఆలూ పూరీ (444 కేలరీలు) కోసం 85 నిమిషాలు, ఒక బర్గర్ కోసం 75 నిమిషాలు, మరియు ఫ్రెంచ్ ఫ్రైస్ కోసం గంట పాటు నడవాలి. ఆరోగ్యకరమైనదిగా భావించే దహీ చాట్‌లో 450 కేలరీలు ఉంటాయి, వీటిని బర్న్ చేయడానికి ఏకంగా 115 నిమిషాలు (దాదాపు రెండు గంటలు) నడవాలి.
బిర్యానీ, నూడుల్స్ లెక్కలు
చాలా మంది ఇష్టపడే ఒక ప్లేట్ చికెన్ బిర్యానీలో సుమారు 420 కేలరీలు ఉంటాయి. వీటిని కరిగించడానికి 80 నుండి 90 నిమిషాల నడక తప్పనిసరి. అలాగే, తక్కువ సమయంలో తినే ఇన్‌స్టంట్ నూడుల్స్‌లో 400 కేలరీలు ఉంటాయి, వీటిని బర్న్ చేయడానికి 80 నిమిషాల నడక అవసరం.
మనం ఇష్టంగా తినే ప్రతి ఆహారం వెనుక ఇంత భారీ కేలరీల లెక్క దాగి ఉంది. కాబట్టి, ఆహారం విషయంలో ఇష్టంతో పాటు, దాని వల్ల కలిగే పరిణామాలపై కూడా అవగాహన కలిగి ఉండటం, వాటిని కరిగించడానికి తగిన వ్యాయామం చేయడం ఆరోగ్యానికి చాలా ముఖ్యమని నిపుణులు సూచిస్తున్నారు.
ఈ లెక్కలు చూసిన తర్వాత, మీకిష్టమైన ఫుడ్ తినే ముందు కేలరీల గురించి ఆలోచిస్తారా? మీరు రోజూ ఎంతసేపు నడుస్తారు? కామెంట్లలో పంచుకోండి.
