ట్రాఫిక్ చలాన్లు: చంద్రబాబు కొత్త రూల్! ముందు అవగాహన

 రోడ్డుపై ఎక్కడపడితే అక్కడ ఆపి చలాన్లు వేస్తున్నారా? ఇకపై ఆ భయం అక్కర్లేదు! స్వయంగా ముఖ్యమంత్రి చంద్రబాబే ఈ కీలక సూచనలు చేశారు.

నిబంధనలు కఠినంగా అమలు చేయాలని ఎప్పుడూ సూచించే ముఖ్యమంత్రి చంద్రబాబు.. ఈ సారి కాస్త ప్రజల పట్ల కరుణతో వ్యవహరించాలని అధికారులకు సూచించడం ఆసక్తికరంగా మారింది.

చలాన్లు కాదు.. ముందు అవగాహన!

రోడ్డు ప్రమాదాల నివారణపై ఆర్టీజీఎస్ (RTGS)లో ముఖ్యమంత్రి చంద్రబాబు సమీక్షించారు. పోలీసులు ఎక్కడపడితే అక్కడ వాహనదారులను ఆపి ట్రాఫిక్ చలాన్లు విధించడాన్ని సీఎం తప్పుబట్టారు.

"భారీ ఎత్తున చలానాలు వేయాలి" అన్న అధికారుల ప్రతిపాదనలను సీఎం తిరస్కరించారు. చలానాలు వేసి ప్రజలను భయ భ్రాంతులకు గురి చేయడం సరికాదని స్పష్టం చేశారు. నిబంధనల ఉల్లంఘనలపై ప్రజలకు అవగాహన కల్పించిన తర్వాతే చలానా విధించే అంశాన్ని పరిశీలించాలని అధికారులను సూచించారు.

అధికారులకు సీఎం 3-స్టెప్ ప్లాన్!

హెల్మెట్ లేకుండా వాహనాలు నడపడం వల్లే ఎక్కువ ప్రమాదాలు జరుగుతున్నాయని అధికారులు ఈ సమావేశంలో సీఎం దృష్టికి తెచ్చారు.

దీనిపై సీఎం స్పందిస్తూ, ముందుగా హెల్మెట్లు, సీట్ బెల్ట్ లేకుండా వాహనాలు నడిపే వారికి దాని ఆవశ్యకతను వివరించాలని చెప్పారు. నిబంధనలను ఉల్లంఘిస్తున్నారనే విషయాన్ని మొదట వారి ఫోన్లకు మెసేజీల రూపంలో పంపాలని సూచించారు. ఆ తర్వాత కూడా వారు నిబంధనలు ఉల్లంఘిస్తుంటే, అప్పుడు చలానాలు వేయాలని స్పష్టం చేశారు.

దీని వల్ల, "తాను తప్పు చేసినందు వల్లే చలానా పడింది" అనే భావన నిబంధనలు ఉల్లంఘించిన వారికి కలుగుతుందని సీఎం చెప్పారు. ఈ విధానంలో కేరళ రాష్ట్రాన్ని ఆదర్శంగా తీసుకోవాలని సూచించారు.

ప్రమాదాలపై SOP.. వారం రోజుల్లోగా!

ఈ సందర్భంగా ఇటీవల కాలంలో జరిగిన వరుస రోడ్డు ప్రమాదాలు, తొక్కిసలాట, అగ్ని ప్రమాదాలు వంటి అంశాలను సీఎం ప్రస్తావించారు. ఇలాంటివి భవిష్యత్తులో జరగకుండా ఉండేలా పూర్తి స్థాయిలో అధ్యయనం చేసి, నిర్మాణాత్మక ప్రణాళికను తయారు చేయాలని నిర్దేశించారు.

దీనికి సంబంధించి ఎస్ఓపీలను (SOPs) సిద్ధం చేసి వారం రోజుల్లోగా అందివ్వాలని సీఎం అధికారులను ఆదేశించారు. జన సమూహాల్లో తొక్కిసలాటలు జరగకుండా 'క్రౌడ్ మేనేజ్మెంట్‌'ను పటిష్టంగా అమలు చేయాలన్నారు.

ప్రమాదాల నివారణకు కేవలం జరిమానాలే మార్గం కాదని, ప్రజల్లో అవగాహన పెంచడం ద్వారానే శాశ్వత పరిష్కారం లభిస్తుందని ముఖ్యమంత్రి అధికారులకు దిశానిర్దేశం చేశారు.