మీ ఫోన్‌లో రీల్స్ చూస్తూ టైమ్ పాస్ చేస్తున్నారా? ఆగండి! అదే ఫోన్‌తో ఇంట్లోనే కూర్చుని నెలకు 50 వేలు సంపాదించే అవకాశం మీ చేతుల్లోనే ఉంది.
ఈ కాలంలో ఫోన్‌ లేని వారు లేరు, కానీ చాలా మంది దాన్ని కేవలం టైమ్ పాస్ కోసమే వాడుతున్నారు. అయితే, అదే స్మార్ట్‌ ఫోన్‌ను సరిగ్గా వాడుకుంటే, ముఖ్యంగా మహిళలు ఇంట్లోంచి కాలు బయటపెట్టకుండా నెలకు రూ.50 వేల వరకు సంపాదించుకోవచ్చు.
మీ ఫోనే మీ ఆఫీస్.. ఇన్ ఫ్లుయెన్సర్ అవ్వండి!
సోషల్ మీడియాను ఉపయోగించుకొని చక్కటి ఆదాయం పొందే అవకాశాలు ఎన్నో ఉన్నాయి. అందులో ముఖ్యమైనది 'సోషల్ మీడియా ఇన్ ఫ్లుయెన్సర్' (Social Media Influencer) గా మారడం. మహిళలు ఇంటి వద్ద ఉంటూనే తమకు నచ్చిన రంగంలో (వంట, టైలరింగ్, బ్యూటీ టిప్స్) తమ నైపుణ్యాన్ని ప్రపంచానికి పరిచయం చేస్తూ ఆదాయం పొందవచ్చు.
టైలరింగ్ స్కిల్ ఉందా?
ఉదాహరణకు, మీరు మంచి లేడీస్ టైలర్ అయితే, మీ టైలరింగ్ స్కిల్స్‌ను స్మార్ట్‌ఫోన్ కెమెరా ద్వారా రికార్డు చేయండి. ఇప్పుడు ఆ వీడియోలను ఒక యూట్యూబ్ ఛానల్ లేదా ఇన్‌స్టాగ్రామ్ పేజీలో పోస్ట్ చేయడం ద్వారా చక్కటి ఆదాయం సంపాదించవచ్చు. ఆన్‌లైన్ ద్వారా టైలరింగ్ క్లాసులు చెప్పడం వల్ల యూట్యూబ్‌లో మంచి వ్యూస్ పొందే అవకాశం ఉంటుంది.
యూట్యూబ్ మానిటైజేషన్.. ఆదాయం ఎలా?
మీ యూట్యూబ్ ఛానల్ ద్వారా డబ్బు సంపాదించాలంటే, దానికి మానిటైజేషన్ (Monetization) అవ్వాలి. యూట్యూబ్ నిబంధనల ప్రకారం, మీ ఛానల్‌కు 1,000 మంది సబ్‌స్క్రైబర్లు, 4,000 గంటల వాచ్ టైమ్ (గత 12 నెలల్లో) అవసరం. ఈ లక్ష్యం పూర్తయిన తర్వాత, మీ ఛానల్‌కు మానిటైజేషన్ పూర్తవుతుంది. అప్పటి నుండి మీ వీడియోలపై యాడ్స్ రావడం ద్వారా మీకు ప్రతి నెలా డాలర్లలో డబ్బు వస్తుంది.
యాడ్స్ మాత్రమే కాదు.. బ్రాండ్ ప్రమోషన్స్!
యూట్యూబ్ యాడ్స్ ద్వారా వచ్చే ఆదాయం ఒక ఎత్తైతే, బ్రాండ్ ప్రమోషన్ల ద్వారా వచ్చే ఆదాయం మరో ఎత్తు. మీ ఛానల్ కాస్త పాపులర్ అయ్యాక, మీ నైపుణ్యానికి సంబంధించిన కంపెనీలు మిమ్మల్ని సంప్రదిస్తాయి. ఉదాహరణకు, మీది టైలరింగ్ ఛానల్ అయితే.. కుట్టు మిషన్ కంపెనీలు, దారం కంపెనీలు, కొత్త డిజైన్ల బట్టల కంపెనీలు వారి బ్రాండ్ ప్రమోషన్‌ కోసం మిమ్మల్ని సంప్రదించవచ్చు. అందుకోసం వారు భారీగా డబ్బులు చెల్లిస్తారు.
కాబట్టి, మీ చేతిలో ఉన్న స్మార్ట్‌ ఫోన్‌ను కేవలం రీల్స్ చూడటానికి కాకుండా, మీలో ఉన్న నైపుణ్యాన్ని ప్రపంచానికి చూపించడానికి వాడితే.. ఇంట్లోనే కూర్చుని మంచి ఆదాయం సంపాదించవచ్చు.
