"నా నియోజకవర్గం" అంటూ రంగంలోకి దిగారు! పిఠాపురంపై పవన్ కళ్యాణ్ మాస్టర్ ప్లాన్.. ఇక రూపురేఖలు మారడం ఖాయం!
డిప్యూటీ సీఎం పవన్ కళ్యాణ్ తన నియోజకవర్గమైన పిఠాపురం అభివృద్ధిపై పూర్తిస్థాయిలో దృష్టి సారించారు. పిఠాపురాన్ని రాష్ట్రంలోనే ఒక ప్రధాన ఆధ్యాత్మిక, పర్యాటక కేంద్రంగా (Spiritual Tourism Hub) తీర్చిదిద్దేందుకు ప్రణాళికలను వేగవంతం చేశారు.
రూ. 20 కోట్లతో ఆలయాల అభివృద్ధి
తాజాగా పిఠాపురం ఏరియా డెవలప్‌మెంట్‌ అథారిటీ, దేవాదాయ శాఖ అధికారులతో పవన్ కళ్యాణ్ సమీక్షా సమావేశం నిర్వహించారు. ఈ సందర్భంగా, నియోజకవర్గంలోని 19 ఆలయాల సమగ్ర అభివృద్ధికి దేవాదాయ శాఖ కామన్ గుడ్ ఫండ్ (CGF) నుంచి రూ.20 కోట్లు మంజూరు చేయనున్నట్లు ఆయన ప్రకటించారు.
శక్తిపీఠానికి కొత్త శోభ
శక్తిపీఠం శ్రీ పురూహూతిక అమ్మవారు, శ్రీ కుక్కుటేశ్వర స్వామి, శ్రీపాద శ్రీవల్లభ పీఠం వంటి ప్రఖ్యాత ఆలయాలున్న పిఠాపురాన్ని ఆధ్యాత్మిక కేంద్రంగా తీర్చిదిద్దే పనులు వేగంగా ముందుకు తీసుకెళ్లాలని అధికారులను ఆదేశించారు. జీర్ణావస్థకు చేరిన ఆలయాలను కూడా గుర్తించామని, వాటికి పునరుజ్జీవం కల్పించడానికి ఈ నిధులు ఉపయోగపడతాయని పవన్ వివరించారు.
ప్రణాళికలు సిద్ధం
ఈ రూ.20 కోట్లను 'మ్యాచింగ్ గ్రాంట్‌' పద్ధతిలో కేటాయించేందుకు దేవాదాయ శాఖ సూత్రప్రాయంగా అంగీకరించిందని పవన్ తెలిపారు. ఆలయాల సమగ్ర అభివృద్ధికి సంబంధించిన ప్రణాళికలు ఇప్పటికే సిద్ధమయ్యాయని ఆయన అధికారులకు స్పష్టం చేశారు.
ఈ నిధుల విడుదలతో, పిఠాపురం రూపురేఖలు మారి, దేశంలోని ప్రముఖ ఆధ్యాత్మిక కేంద్రాల్లో ఒకటిగా నిలవడం ఖాయంగా కనిపిస్తోంది.
