తెలంగాణ రాజకీయాల్లో కాంగ్రెస్, బీఆర్ఎస్ మధ్య యుద్ధం అసెంబ్లీ గేట్లు దాటి కోర్టు మెట్లెక్కింది. ఎమ్మెల్యేల అనర్హత వేటు విషయంలో ఇప్పటికే సుప్రీంకోర్టులో పోరాటం నడుస్తుండగా, ఇప్పుడు వ్యవహారం 'పర్సనల్' టర్న్ తీసుకుంది. స్పీకర్ గడ్డం ప్రసాద్ కుమార్ను లక్ష్యంగా చేసుకుని బీఆర్ఎస్ నేతలు చేస్తున్న విమర్శలు శృతిమించాయనే వాదన వినిపిస్తోంది. ముఖ్యంగా వికారాబాద్ మాజీ ఎమ్మెల్యే మెతుకు ఆనంద్ చేసిన వ్యాఖ్యలు స్పీకర్ కు తీవ్ర ఆగ్రహం తెప్పించాయి. నన్ను 'బుల్లెట్ రాజు' అంటావా? లంచాలు తీసుకున్నానని ఆరోపిస్తావా? అంటూ స్పీకర్ గడ్డం ప్రసాద్ సీరియస్ యాక్షన్ కు దిగారు. ఏకంగా రూ. 10 కోట్లు పరువు నష్టం దావా వేస్తానని నోటీసులు పంపడం ఇప్పుడు హాట్ టాపిక్ గా మారింది. అసలు ఈ గొడవ ఎక్కడి వరకు వెళ్తుంది?
లంచాలు.. బుల్లెట్ రాజు.. అసలు గొడవ ఇదే
వికారాబాద్ మాజీ ఎమ్మెల్యే, బీఆర్ఎస్ నేత మెతుకు ఆనంద్ ఈ నెలలో నిర్వహించిన పలు ప్రెస్ మీట్లలో స్పీకర్ గడ్డం ప్రసాద్ కుమార్పై సంచలన వ్యాఖ్యలు చేశారు. స్పీకర్ను 'బుల్లెట్ రాజు' అని సంబోధించడమే కాకుండా, ఆయన ఉద్యోగులు, కాంట్రాక్టర్ల నుంచి లంచాలు తీసుకుంటున్నారని తీవ్ర ఆరోపణలు చేశారు. అంతేకాకుండా, ఎమ్మెల్యేల అనర్హత పిటిషన్ల విషయంలో జాప్యం చేయడానికి స్పీకర్ వందల కోట్లు లంచంగా తీసుకున్నారని ఆనంద్ ఆరోపించారు. వికారాబాద్ మున్సిపాలిటీని తన గుప్పిట్లో పెట్టుకుని ఇష్టారాజ్యంగా వ్యవహరిస్తున్నారని విమర్శించారు. ఈ వ్యాఖ్యలే ఇప్పుడు స్పీకర్ ఆగ్రహానికి కారణమయ్యాయి. రాజ్యాంగబద్ధమైన పదవిలో ఉన్న తనను ఇలా అవమానించడం సరికాదని ఆయన మండిపడ్డారు.
వారం రోజులే టైమ్.. లేకపోతే కోర్టుకే!
మెతుకు ఆనంద్ వ్యాఖ్యలపై స్పీకర్ గడ్డం ప్రసాద్ కుమార్ తీవ్రంగా స్పందించారు. తనను మానసికంగా క్షోభకు గురిచేసినందుకు, తన పరువుకు భంగం కలిగించినందుకు తక్షణమే క్షమాపణ చెప్పాలని డిమాండ్ చేశారు. మెతుకు ఆనంద్కు లీగల్ నోటీసులు పంపిన స్పీకర్, వారం రోజుల్లోగా మీడియా ముఖంగా బహిరంగ క్షమాపణ చెప్పాలని అల్టిమేటం జారీ చేశారు. లేనిపక్షంలో చట్ట ప్రకారం రూ. 10 కోట్లు పరువు నష్టం దావా వేస్తానని, న్యాయపరమైన చర్యలు తీసుకుంటానని హెచ్చరించారు. అట్టడుగు స్థాయి నుంచి వచ్చి శాసన వ్యవస్థలో అత్యున్నతమైన స్పీకర్ హోదాను దక్కించుకున్న తనపై ఇలాంటి నిరాధారమైన ఆరోపణలు చేయడం దుర్మార్గమని ఆయన ఆవేదన వ్యక్తం చేశారు.
రాజ్యాంగ పదవికి అవమానం
జనవరి 19న ఆనంద్ చేసిన వ్యాఖ్యలు కేవలం వ్యక్తిగత దూషణలు కావని, అది మొత్తం శాసన వ్యవస్థనే అవమానించడమని స్పీకర్ పేర్కొన్నారు. నిత్యం ప్రజా సమస్యల పరిష్కారం కోసం, వికారాబాద్ నియోజకవర్గ అభివృద్ధి కోసం తాను కృషి చేస్తుంటే, ఓర్వలేక ఇలాంటి ఆరోపణలు చేస్తున్నారని విమర్శించారు. తాను నిధులను మంజూరు చేయిస్తుంటే, ఆనంద్ మాత్రం తనపై బురద జల్లడమే పనిగా పెట్టుకున్నారని ఆగ్రహం వ్యక్తం చేశారు. మొత్తానికి ఈ వ్యవహారం ఇక్కడితో ఆగుతుందా లేక మాజీ ఎమ్మెల్యే కూడా న్యాయపోరాటానికి సిద్ధమవుతారా అనేది చూడాలి.
మాట జారితే మూల్యం చెల్లించుకోక తప్పదు!
రాజకీయ విమర్శలు హద్దు దాటితే పరిణామాలు ఎంత తీవ్రంగా ఉంటాయో చెప్పడానికి ఇదో ఉదాహరణ. రాజ్యాంగ పదవుల్లో ఉన్నవారిపై ఆరోపణలు చేసేటప్పుడు ఆధారాలు లేకపోతే.. కోర్టు మెట్లు ఎక్కక తప్పదు.
