రూ.350 కోట్ల సునామీ ఇప్పుడు మీ ఇంట్లోకి.. 7 భాషల్లో 'శంకర వర ప్రసాద్' సందడి! ఓటీటీ డేట్ ఫిక్స్
ఈ సంక్రాంతికి బాక్సాఫీస్ దగ్గర మెగాస్టార్ చిరంజీవి సృష్టించిన విధ్వంసం అంతా ఇంతా కాదు. రికార్డులను తిరగరాస్తూ, ఏకంగా రూ.350 కోట్లు కొల్లగొట్టి టాలీవుడ్ లో 'రీజనల్ ఇండస్ట్రీ హిట్'గా నిలిచిన సినిమా ‘మన శంకర వర ప్రసాద్ గారు’. థియేటర్లలో సీటీమార్ కొట్టించిన ఈ ఫ్యామిలీ ఎంటర్టైనర్ ఇప్పుడు మీ నట్టింట్లో సందడి చేయడానికి రెడీ అయ్యింది. థియేటర్లో మిస్ అయిన వారికి, మళ్లీ మళ్లీ చూడాలనుకునే వారికి ఇది పండగ లాంటి వార్త. మెగాస్టార్ మార్క్ కామెడీని ఏడు భాషల్లో ఆస్వాదించడానికి సిద్ధంగా ఉండండి.
రికార్డుల రారాజు.. బాక్సాఫీస్ బాద్షా
అనిల్ రావిపూడి మార్క్ టైమింగ్ కి మెగాస్టార్ మ్యానరిజమ్స్ తోడైతే ఫలితం ఎలా ఉంటుందో ఈ సినిమా నిరూపించింది. చిరంజీవి కెరీర్లోనే అత్యధిక వసూళ్లు సాధించిన చిత్రంగా ఇది సరికొత్త చరిత్ర సృష్టించింది. కేవలం మాస్ ఆడియెన్స్ నే కాకుండా క్లాస్, ఫ్యామిలీ ఆడియెన్స్ ను కూడా థియేటర్లకు రప్పించడంలో ఈ చిత్రం సక్సెస్ అయ్యింది. నయనతార గ్లామర్, విక్టరీ వెంకటేష్ సర్ ప్రైజ్ గెస్ట్ రోల్ సినిమాకు హైలైట్ గా నిలిచాయి. సాహు గారపాటి, సుష్మిత కొణిదెల నిర్మాణ విలువలు, భీమ్స్ సిసిరోలియో మాస్ బీట్స్ సినిమా రేంజ్ ను పెంచేశాయి.
ఫిబ్రవరి 11 నుంచి జీ5లో పండగ
థియేటర్లలో విడుదలై నాలుగు వారాలు కాకముందే ఈ బ్లాక్ బస్టర్ ఓటీటీలోకి వచ్చేస్తోంది. ప్రముఖ ఓటీటీ సంస్థ జీ5 (ZEE5) ఈ సినిమా డిజిటల్ హక్కులను భారీ ధరకు సొంతం చేసుకుంది. ఫిబ్రవరి 11 నుంచి ఈ సినిమా స్ట్రీమింగ్ కానుంది. ఇక్కడ అసలు విశేషం ఏమిటంటే, ఈ చిత్రాన్ని పాన్ ఇండియా స్థాయిలో ఏడు భాషల్లో రిలీజ్ చేస్తున్నారు. తెలుగుతో పాటు హిందీ, తమిళ్, కన్నడ, మలయాళం, మరాఠీ, బెంగాలీ భాషల్లో కూడా ‘శంకర వర ప్రసాద్’ అందుబాటులోకి రానున్నారు. ప్రాంతీయ భాషా చిత్రంగా విడుదలై ఇండస్ట్రీ హిట్ కొట్టిన ఈ సినిమా, ఓటీటీలో మాత్రం నేషనల్ లెవెల్ లో సందడి చేయబోతోంది.
బాక్సాఫీస్ బద్దలు కొట్టింది.. ఇక ఓటీటీ వంతు!
సంక్రాంతి విందు మిస్ అయిన వారికి ఇది ఫ్రెష్ ట్రీట్. ఫిబ్రవరి 11న రిమోట్ చేతిలో పట్టుకుని రెడీగా ఉండండి, మెగాస్టార్ మీ డ్రాయింగ్ రూమ్ లోకి వచ్చేస్తున్నారు.
