అమెరికా జైల్లో చనిపోయిన ఒక ఫైనాన్షియర్.. ఇప్పుడు యూరప్ రాజకీయాలను శాసిస్తున్నాడు. జెఫ్రీ ఎప్స్టీన్ (Jeffrey Epstein) అంటే కేవలం లైంగిక నేరస్థుడు మాత్రమే కాదు, ప్రపంచంలోని అత్యంత సంపన్నులు, రాజకీయ నాయకులకు 'చీకటి మిత్రుడు'. అమెరికా న్యాయశాఖ ఇటీవల విడుదల చేసిన ఎప్స్టీన్ ఫైల్స్ (Epstein Files) ఇప్పుడు యూరప్ లో పెను ప్రకంపనలు సృష్టిస్తున్నాయి. ఈ చిట్టా బయటపడగానే బ్రిటన్ నుంచి నార్వే దాకా వికెట్లు టపాటపా రాలిపోతున్నాయి. అసలు ఆ ఫైల్స్ లో ఏముంది? ఎవరి జాతకాలు మారుతున్నాయి?
బ్రిటన్ లో భూకంపం.. రాచరికానికి మాయని మచ్చ!
ఈ ఫైల్స్ దెబ్బకు బ్రిటన్ లేబర్ పార్టీ సీనియర్ నేత పీటర్ మాండెల్సన్ (Peter Mandelson) పదవి ఊడింది. ఆయన పేరు ఎప్స్టీన్ లిస్ట్ లో ఉండటంతో పార్టీ అధినేత కైర్ స్టార్మర్ వేటు వేశారు. ఇక బ్రిటిష్ రాజకుటుంబానికి చెందిన ప్రిన్స్ ఆండ్రూ (Prince Andrew) మెడకు ఉచ్చు బిగుస్తోంది. అమెరికాలో విచారణకు హాజరు కావాలనే ఒత్తిడి పెరుగుతోంది. మరోవైపు, సారా ఫెర్గూసన్ కు 2011 వరకు ఎప్స్టీన్ తో సంబంధాలున్నాయని తేలడంతో ఆమె స్వచ్ఛంద సంస్థను మూసేశారు. రాజకుటుంబం పరువు గంగపాలైందంటే అతిశయోక్తి కాదు.
నార్వే, స్లోవేకియాలో విచారణలు.. రాజీనామాలు
నార్వే: మాజీ ప్రధాని థోర్బ్జోర్న్ జాగ్లాండ్ పై ఆర్థిక నేరాల విభాగం విచారణ మొదలుపెట్టింది. దౌత్యవేత్తలు మోనా జుల్, టెర్జే రోడ్-లార్సెన్ లకు ఎప్స్టీన్ ఏకంగా 10 మిలియన్ డాలర్లు (సుమారు రూ.83 కోట్లు) వారసత్వంగా ఇచ్చినట్లు తేలడం సంచలనమైంది.
స్లోవేకియా: ఎప్స్టీన్ తో లింకులు బయటపడటంతో జాతీయ భద్రతా సలహాదారు మిరోస్లావ్ లజ్కాక్ (Miroslav Lajčák) తన పదవికి రాజీనామా చేయక తప్పలేదు.
రష్యా లింకులు? పోలాండ్ ఆరా!
పోలాండ్, లాట్వియా, లిథువేనియా దేశాలు ఈ ఫైల్స్ ను చాలా సీరియస్ గా తీసుకున్నాయి. ఎప్స్టీన్ నెట్ వర్క్ లో తమ పౌరులు బాధితులుగా ఉన్నారా? లేక రష్యా నిఘా సంస్థలతో (Russian Intel) ఏమైనా చీకటి ఒప్పందాలు జరిగాయా? అనే కోణంలో దర్యాప్తు చేస్తున్నాయి.
అమెరికా సైలెంట్.. యూరప్ వయొలెంట్!
విచిత్రం ఏంటంటే.. ఎప్స్టీన్ అమెరికన్ అయినా, అక్కడ పెద్దగా చడీచప్పుడు లేదు. కానీ యూరప్ లో మాత్రం ఈ ఫైల్స్ రాజకీయ సునామీని తెస్తున్నాయి. బిలియనీర్లు, రాజకుటుంబీకులు, పొలిటీషియన్స్.. ఇలా ఎప్స్టీన్ నెట్ వర్క్ ఎంత బలంగా ఉందో ఈ ఘటనలు రుజువు చేస్తున్నాయి.
పాపం దాచినా దాగదు!
డబ్బు, అధికారం ఉంటే ఏం చేసినా చెల్లుతుంది అనుకునే గ్లోబల్ ఎలైట్ (Global Elite) కు ఇదో గట్టి ఎదురుదెబ్బ. ఎప్స్టీన్ చనిపోయినా.. అతను దాచిన రహస్యాలు ఇంకా ఎందరి పదవులు ఊడగొడతాయో చూడాలి.
