సాధారణంగా సినిమా వాళ్లంటే కోట్లకు పడగలెత్తే వాళ్లని, వాళ్లకు ఆర్థిక కష్టాలు ఉండవని సామాన్యులు అనుకుంటూ ఉంటారు. అందులోనూ ఇండస్ట్రీని శాసించే మోహన్ బాబు లాంటి లెజెండరీ నటుడి కూతురికి డబ్బు కష్టాలు ఉంటాయంటే ఎవరైనా నమ్ముతారా? కానీ వెండితెర వెలుగుల వెనుక ఉండే చీకటి కోణం వేరు. ఒక తప్పు నిర్ణయం, ఒకే ఒక్క ప్లాప్ సినిమా.. స్టార్ కిడ్ నైనా సరే అప్పుల ఊబిలోకి నెట్టేస్తుంది. ఇందుకు తాజా ఉదాహరణ మంచు లక్ష్మి (Manchu Lakshmi). నిర్మాతగా మారి చేతులు కాల్చుకున్న ఆమె.. ఐదేళ్ల క్రితం చేసిన అప్పులను ఇప్పటికీ తీరుస్తూనే ఉన్నానని చెప్పడం ఇప్పుడు ఇండస్ట్రీలో హాట్ టాపిక్. అసలు మంచు లక్ష్మి తీసుకున్న ఆ కఠిన నిర్ణయం ఏంటి? ఆమెకు ఆర్థిక పాఠం నేర్పిన ఆ సినిమా ఏది?
మంచు లక్ష్మి గురించి ప్రత్యేకంగా పరిచయం అక్కర్లేదు. నటిగా, యాంకర్ గా తనకంటూ ప్రత్యేక ఇమేజ్ క్రియేట్ చేసుకున్నారు. ‘అనగనగా ఓ ధీరుడు’లో విలనిజం పండించి నంది అవార్డు అందుకున్న ఆమె.. ‘గుండెల్లో గోదారి’ వంటి సినిమాలతో విమర్శకుల ప్రశంసలు పొందారు. అంతవరకు బాగానే ఉన్నా.. ఎప్పుడైతే ఆమె ‘నిర్మాత’ అవతారం ఎత్తారో అప్పుడే కష్టాలు మొదలయ్యాయి. లక్ష్మీప్రసన్న పిక్చర్స్ బ్యానర్పై ‘దొంగాట’, ‘ఊ కొడతారా ఉలిక్కి పడతారా’ వంటి సినిమాలు నిర్మించారు. కానీ ఆశించిన ఫలితం దక్కలేదు. ముఖ్యంగా ‘దక్ష’ సినిమా ఆమెను ఆర్థికంగా కోలుకోలేని దెబ్బతీసినట్లు తెలుస్తోంది.
తాజాగా జరిగిన ఓ ప్రమోషనల్ ఈవెంట్లో మంచు లక్ష్మి చేసిన వ్యాఖ్యలు ఆమెలోని ఆవేదనను బయటపెట్టాయి. "నిర్మాతగా నా అధ్యాయం ముగిసింది. ఐదేళ్ల క్రితం నేను నిర్మించిన ఒక సినిమా వల్ల వచ్చిన నష్టాలను, అప్పులను ఇప్పటికీ భరిస్తూనే ఉన్నాను. ఆ వడ్డీలు కడుతూనే ఉన్నాను" అని ఆమె ఓపెన్ గా చెప్పేశారు. ఒక సినిమా వైఫల్యం వ్యక్తిగత జీవితాన్ని, ఆర్థిక పరిస్థితిని ఎంతలా దిగజార్చుతుందో తనకు ఆ అనుభవం ద్వారా తెలిసివచ్చిందని ఆమె ఎమోషనల్ అయ్యారు. అందుకే ఇకపై సినిమాలు నిర్మించే ఆలోచనే లేదని, ఆ సాహసం మళ్లీ చేయనని తేల్చిచెప్పారు.
ప్రస్తుతం ఎవరైనా కథ చెప్పడానికి వస్తే.. కథ కంటే ముందు "నిర్మాత ఎవరు? డబ్బులు ఉన్నాయా?" అని అడుగుతున్నారట. గట్టి నిర్మాత ఉంటేనే నటిస్తానని కండిషన్ పెడుతున్నారు. నటిగా సంపాదించిన డబ్బుతో పాత అప్పులు తీర్చుకుంటున్నానని చెప్పడం నిజంగా గమనార్హం. ప్రస్తుతం ఆమె వెబ్ సిరీస్ లు, ఇతర భాషా చిత్రాలపైనే పూర్తి ఫోకస్ పెట్టారు. ప్యాషన్ వేరు, బిజినెస్ వేరు అని గ్రహించిన మంచు లక్ష్మి.. నిర్మాతగా రిటైర్మెంట్ ప్రకటించి, నటిగా మాత్రం బిజీ అవుతున్నారు.
సినిమా అంటే పిచ్చి ఉండాలి.. కానీ ఆస్తిని కరిగించేంత కాదు!
మంచు లక్ష్మి అనుభవం కొత్తగా ఇండస్ట్రీకి వచ్చే వారికి ఒక గుణపాఠం. తండ్రి బ్యాక్ గ్రౌండ్ ఉన్నా సరే.. బాక్సాఫీస్ దగ్గర లెక్క తేలకపోతే అప్పులు ఎవరినీ వదలవు. క్రియేటివిటీకి, కమర్షియాలిటీకి తేడా తెలియకపోతే నిర్మాత జేబులు ఖాళీ అవ్వడం ఖాయం.
