ఎండల తీవ్రత ఎలా ఉన్నా.. ఈసారి టాలీవుడ్ బాక్సాఫీస్ మాత్రం మామూలుగా హీటెక్కడం లేదు. ఐపీఎల్ ఫీవర్ ను కూడా తట్టుకుని నిలబడేలా మన నిర్మాతలు సమ్మర్ ప్లాన్ రెడీ చేశారు. ఒకప్పుడు సమ్మర్ అంటే పెద్ద హీరోల సినిమాల సందడి ఉండేది. మధ్యలో కాస్త తగ్గినా.. ఈ ఏడాది 2026 వేసవి మాత్రం సినిమా లవర్స్ కు పండగే అని చెప్పాలి.
ముఖ్యంగా మెగా ఫ్యామిలీ నుంచి ఒకరు కాదు ఇద్దరు కాదు.. ఏకంగా అరడజను సినిమాలు క్యూలో ఉన్నాయి. పవర్ స్టార్ నుంచి గ్లోబల్ స్టార్ వరకు అందరూ రంగంలోకి దిగుతున్నారు. మరి మార్చి నుంచి మే వరకు థియేటర్లను షేక్ చేయబోయే ఆ సినిమాలు ఏవి? రాకీ భాయ్ యష్ ఈసారి ఏం చేయబోతున్నాడు?
మార్చి నెల ప్రారంభంతోనే సినిమాల జాతర మొదలుకానుంది. మార్చి 6న లావణ్య త్రిపాఠి నటించిన 'సతీ లీలావతి', శివాజీ-లయ కాంబినేషన్ లో వస్తున్న 'సాంప్రదాయని సుప్పిని సుద్దపూసని' వంటి చిన్న చిత్రాలతో వేసవి సందడి షురూ అవుతుంది. ఇక మార్చి 13న బాక్సాఫీస్ వద్ద అసలు సిసలైన వార్ జరగనుంది. బాలీవుడ్ లో రూ.1300 కోట్లు కొల్లగొట్టిన సినిమాకు సీక్వెల్ గా వస్తున్న 'ధురంధర్ 2' (Dhurandhar 2) పాన్ ఇండియా స్థాయిలో విడుదల కానుంది.
అదే రోజున కేజీఎఫ్ హీరో యష్ నటించిన మోస్ట్ ఎవైటెడ్ మూవీ 'టాక్సిక్' (Toxic) కూడా బరిలోకి దిగుతోంది. గీతూ మోహన్ దాస్ దర్శకత్వంలో వస్తున్న ఈ యాక్షన్ డ్రామాపై భారీ అంచనాలు ఉన్నాయి. యష్ క్రేజ్ ముందు బాలీవుడ్ సీక్వెల్ నిలబడుతుందా అన్నది ఆసక్తికరం.
ఇక మెగా అభిమానులు ఎప్పుడెప్పుడా అని ఎదురుచూస్తున్న సమయం రానే వచ్చింది. గతేడాది 'ఓజీ'తో రికార్డులు తిరగరాసిన పవర్ స్టార్ పవన్ కళ్యాణ్, ఈసారి 'ఉస్తాద్ భగత్ సింగ్' (Ustaad Bhagat Singh) గా మార్చి 26న థియేటర్లలోకి రానున్నారు.
హరీశ్ శంకర్ మార్క్ డైలాగ్స్, పవన్ మేనరిజం వెరసి ఈ సినిమా మాస్ జాతరను తలపించడం ఖాయం. వాస్తవానికి ఈ సినిమా ఏప్రిల్ లేదా మే లో రావాల్సి ఉన్నా, రామ్ చరణ్ సినిమా రిలీజ్ డేట్ అడ్జస్ట్ మెంట్ వల్ల పవన్ మార్చిలోనే దిగిపోతున్నారు. దీంతో మార్చి ఎండింగ్ అదిరిపోవడం గ్యారెంటీ.
ఏప్రిల్ నెల కూడా సినిమా ప్రేమికులకు ఫుల్ మీల్స్ పెడుతోంది. ఏప్రిల్ 3న శర్వానంద్ బైక్ రేసింగ్ సినిమా 'బైకర్' (Biker), సంగీత్ శోభన్ నటించిన 'రాకాస' విడుదల కానున్నాయి. ఇక ఏప్రిల్ 10న మరో ఆసక్తికరమైన పోటీ ఉంది. నిఖిల్ సిద్ధార్థ నటించిన పాన్ ఇండియా పీరియాడిక్ మూవీ 'స్వయంభు' (Swayambhu), అడివి శేష్ థ్రిల్లర్ 'డెకాయిట్' (Dacoit) ఒకే రోజున తలపడనున్నాయి. విభిన్న కథాంశాలతో వస్తున్న ఈ రెండు సినిమాలపై యువతలో మంచి క్రేజ్ ఉంది.
వేసవి వినోదానికి ముగింపు మాత్రం అదిరిపోయేలా ప్లాన్ చేశారు. ఏప్రిల్ 30న గ్లోబల్ స్టార్ రామ్ చరణ్, బుచ్చిబాబు సానా కాంబినేషన్ లో వస్తున్న పీరియాడిక్ స్పోర్ట్స్ డ్రామా 'పెద్ది' (Peddi) గ్రాండ్ గా రిలీజ్ కానుంది. వృద్దీ సినిమాస్ నిర్మిస్తున్న ఈ సినిమాపై పాన్ ఇండియా స్థాయిలో భారీ అంచనాలు ఉన్నాయి.
ఇవే కాకుండా మెగాస్టార్ చిరంజీవి 'విశ్వంభర', అఖిల్ 'లెనిన్', సాయి దుర్గాతేజ్ 'సంబరాల యేటి గట్టు' కూడా సమ్మర్ రేసులో ఉండే అవకాశం ఉంది. మొత్తానికి ఈ సమ్మర్ మెగా హీరోల ఆధిపత్యంతో బాక్సాఫీస్ కలెక్షన్ల వర్షం కురవడం ఖాయం.
ఐపీఎల్ ను మించిన కిక్!
క్రికెట్ స్టేడియంల కంటే సినిమా థియేటర్లే ఈ సమ్మర్ లో ఎక్కువగా నిండబోతున్నాయి. మెగా హీరోల స్పీడ్ చూస్తుంటే పాత రికార్డులు గల్లంతు అవ్వడం ఖాయం.
