Mohammed Siraj T20 World Cup: స్పెయిన్ ట్రిప్ క్యాన్సిల్.. వరల్డ్ కప్ కన్ఫర్మ్! సూర్య భాయ్ ఫోన్ కాల్ తో సీన్ రివర్స్
మనిషి ఒకటి తలిస్తే.. దైవం మరొకటి తలిచింది అంటారు. మహమ్మద్ సిరాజ్ (Mohammed Siraj) విషయంలో అది అక్షరాలా నిజమైంది. చేతిలో స్పెయిన్ ఫ్లైట్ టికెట్లు, మనసులో ఫుట్బాల్ మ్యాచ్ చూసే ఉత్సాహం.. అంతలోనే ఒక ఫోన్ కాల్, సీన్ మొత్తం మారిపోయింది. "మియా.. బ్యాగులు సర్దుకో, ముంబైకి వచ్చేయ్" అంటూ అవతలి నుంచి వచ్చిన ఆర్డర్ సిరాజ్ జీవితంలోనే మర్చిపోలేని మలుపు తిప్పింది. అసలు సిరాజ్ ఎక్కడికి వెళ్లాలి? ఎక్కడికి వచ్చాడు? ఆ ఫోన్ కాల్ వెనుక ఉన్న స్టోరీ ఏంటి?
'జోక్ చేయకు భాయ్'.. సూర్య కాల్ తో షాక్!
హర్షిత్ రాణా గాయపడటంతో టీమిండియాలోకి సిరాజ్ ఎంపిక ఒక సినిమా స్టోరీలా జరిగింది. ఈ విషయాన్ని సిరాజ్ స్వయంగా బయటపెట్టాడు. "రెండు రోజుల క్రితం సూర్యకుమార్ యాదవ్ (Suryakumar Yadav) నాకు ఫోన్ చేశాడు. 'మియా, బ్యాగులు సర్దుకుని వెంటనే ముంబైకి వచ్చేయ్' అన్నాడు. నేను నమ్మలేదు. 'భాయ్, జోక్ చేయకు.. ఇది జరిగే పని కాదు' అని చెప్పాను. కానీ అతను సీరియస్ గా 'నేను నిజమే చెబుతున్నా, రెడీ అవ్వు' అన్నాడు" అని సిరాజ్ ఆశ్చర్యకరమైన విషయాన్ని పంచుకున్నాడు.
రియల్ మాడ్రిడ్ మ్యాచ్ ప్లాన్.. మధ్యలో ట్విస్ట్
నిజానికి సిరాజ్ ఫిబ్రవరి 15న స్పెయిన్ లో జరిగే రియల్ మాడ్రిడ్ (Real Madrid) ఫుట్బాల్ మ్యాచ్ చూసేందుకు ప్లాన్ చేసుకున్నాడు. టికెట్లు కూడా బుక్ అయిపోయాయి. ఇంతలో సెలక్టర్ ప్రగ్యాన్ ఓఝా కూడా ఫోన్ చేసి వరల్డ్ కప్ ఎంపిక గురించి చెప్పడంతో సిరాజ్ ఆనందానికి అవధులు లేకుండా పోయాయి. "నేను రెస్ట్ తీసుకుందాం అనుకున్నా. రెండు నాలుగు రోజుల మ్యాచ్ లు ఆడి అలసిపోయాను. కానీ దేవుడు నా కోసం వరల్డ్ కప్ రాసిపెట్టాడు" అని సిరాజ్ ఎమోషనల్ అయ్యాడు.
ముంబై ఫ్లైట్ లో కలలా అనిపించింది..
గత కొంతకాలంగా టీ20లకు దూరంగా ఉన్న సిరాజ్, తనకు మళ్లీ వరల్డ్ కప్ ఛాన్స్ వస్తుందని కలలో కూడా ఊహించలేదు. అందుకే స్ట్రెంగ్త్ అండ్ కండిషనింగ్ కోచ్ మెసేజ్ చేసినప్పుడు కూడా తనకు రెస్ట్ కావాలని అడిగాడు. కానీ విధి అతన్ని మళ్లీ టీమిండియా డ్రెస్సింగ్ రూమ్ కి చేర్చింది. "ముంబైకి ఫ్లైట్ లో వస్తుంటే ఇదంతా ఒక కలలా అనిపించింది" అని తన సంతోషాన్ని వ్యక్తం చేశాడు.
అవకాశం ఎప్పుడు తలుపు తడుతుందో చెప్పలేం!
రియల్ మాడ్రిడ్ మ్యాచ్ మిస్ అయినా.. అంతకంటే పెద్దదైన వరల్డ్ కప్ మ్యాచ్ ఆడే ఛాన్స్ దక్కింది. దేశం కోసం ఆడే అవకాశం ముందు ఏ ట్రిప్ అయినా చిన్నదే కదా!
