"అమెరికా వెళ్లాలి.. సాఫ్ట్వేర్ ఉద్యోగం చేయాలి.." ఇది లక్షల మంది భారతీయ యువత కల. కానీ ఆ కల ఇక కల్లగానే మిగిలిపోనుందా? అగ్రరాజ్యంలో మనోళ్లకు రెడ్ కార్పెట్ కాదు కదా.. రెడ్ సిగ్నల్ పడే ప్రమాదం కనిపిస్తోంది. అమెరికాలో విదేశీ నిపుణులకు లైఫ్ లైన్ లాంటి H-1B వీసాలను (H-1B Visas) పూర్తిగా రద్దు చేయాలంటూ అక్కడి పార్లమెంట్లో ఒక బిల్లు ప్రత్యక్షమైంది. అదే 'ఎక్సైల్ యాక్ట్' (EXILE Act). ఇది కనుక చట్టంగా మారితే.. అమెరికాలో ఉన్న, వెళ్లాలనుకుంటున్న భారతీయ టెకీల పరిస్థితి ఏంటి?
అమెరికన్ల కోసమే.. 'ఎక్సైల్' అస్త్రం!
రిపబ్లికన్ పార్టీకి చెందిన గ్రెగ్ స్యూబ్ (Greg Steube) ప్రతినిధుల సభలో ఈ సంచలన బిల్లును ప్రవేశపెట్టారు. దీని పేరు 'ఎండింగ్ ఎక్స్ప్లాయిటేటివ్ ఇంపోర్టెడ్ లేబర్ ఎగ్జెంప్షన్స్ యాక్ట్' (EXILE Act).
ప్రధాన డిమాండ్: ఇమ్మిగ్రేషన్ చట్టాన్ని సవరించి, 2027 ఆర్థిక సంవత్సరం నుంచి H-1B వీసాల సంఖ్యను 'సున్నా' (Zero)కు తగ్గించాలి.
వాదన: కార్పొరేట్ కంపెనీలు తక్కువ జీతాలకు వచ్చే విదేశీయులను తీసుకుని, అమెరికన్ యువత పొట్ట కొడుతున్నాయి. మన శ్రామిక శక్తిని పణంగా పెట్టి విదేశీయులకు లాభం చేకూర్చకూడదు అని గ్రెగ్ వాదిస్తున్నారు.
టార్గెట్ ఇండియా & చైనా!
ఈ బిల్లు ప్రధానంగా భారతీయులనే టార్గెట్ చేసినట్లు కనిపిస్తోంది. ప్రస్తుతం జారీ అవుతున్న H-1B వీసాల్లో 80 శాతానికి పైగా భారత్, చైనా దేశాలకు చెందినవారే పొందుతున్నారని గ్రెగ్ స్యూబ్ గణాంకాలను బయటపెట్టారు. టెక్నాలజీ, మెడిసిన్ రంగాల్లో మన ఆధిపత్యం తగ్గించడమే దీని వెనుక ఉన్న అసలు ప్లాన్.
మైక్రోసాఫ్ట్, డిస్నీ ఉదాహరణలతో..
విదేశీయుల వల్ల అమెరికన్లు ఎలా నష్టపోతున్నారో చెప్పడానికి గ్రెగ్ కొన్ని ఉదాహరణలు కూడా ఇచ్చారు.
టెక్ రంగం: 2025లో మైక్రోసాఫ్ట్ (Microsoft) 9,000 మందికి H-1B వీసాలు ఇప్పించుకుంది. కానీ అదే సమయంలో 16,000 మందికి పైగా ఉద్యోగులను తొలగించింది.
వైద్య రంగం: 5,000 మంది విదేశీ డాక్టర్ల రాకతో.. 10,000 మంది అమెరికన్ డాక్టర్లకు రెసిడెన్సీ ప్రోగ్రామ్స్ లో సీట్లు దక్కలేదు.
ఇతర సంస్థలు: డిస్నీ, ఫెడెక్స్ వంటి సంస్థలు కూడా లోకల్స్ ను తీసేసి, H-1B వీసాదారులను నియమించుకున్నాయని ఆయన ఆరోపించారు.
ఇది కేవలం బిల్లు మాత్రమే.. కానీ ప్రమాద ఘంటిక!
ప్రస్తుతానికి ఇది ఒక ప్రతిపాదన మాత్రమే. చట్టంగా మారడానికి చాలా దశలు ఉంటాయి. కానీ అమెరికా రాజకీయాల్లో "అమెరికన్లకే తొలి ప్రాధాన్యం" అనే నినాదం బలపడుతోంది. ఇది భారతీయ ఐటీ రంగానికి ఒక హెచ్చరిక లాంటిది.
