అమరావతి.. ఆంధ్రుడి గుండెచప్పుడు, తెలుగువాడి ఆత్మగౌరవం! ఎన్నో ఆటుపోట్లు, మరెన్నో రాజకీయ కల్లోలాలను తట్టుకుని నిలబడిన ఆ మహా నగర నిర్మాణానికి ఇప్పుడు అసలైన చట్టబద్ధత లభించింది. ఏపీకి ఒకటే రాజధాని.. అది అమరావతి మాత్రమే! అంగుళం కదిలించే దమ్ము ఎవరికీ లేదంటూ ముఖ్యమంత్రి నారా చంద్రబాబు నాయుడు అసెంబ్లీ సాక్షిగా చేసిన సింహగర్జన.. ఇప్పుడు యావత్ రాష్ట్రంలో నూతనోత్సాహాన్ని నింపుతోంది.
క్వాంటమ్ వ్యాలీగా అమరావతి.. మోదీ చేతుల మీదుగానే ప్రారంభం!
రాజధాని అమరావతిలో జరుగుతున్న ప్రతి ఒక్క నిర్మాణ పనినీ 2028 నాటికి సంపూర్ణంగా పూర్తి చేస్తామని, ప్రధాని నరేంద్ర మోదీ చేతుల మీదుగానే ఈ మహా నగరాన్ని అట్టహాసంగా ప్రారంభిస్తామని ముఖ్యమంత్రి చంద్రబాబు నాయుడు స్పష్టం చేశారు. అమెరికాలో టెక్నాలజీకి కేరాఫ్ అడ్రస్గా ఉన్న సిలికాన్ వ్యాలీ మాదిరిగా.. ఇండియాలో 'క్వాంటమ్ వ్యాలీ' అంటే అది కచ్చితంగా మన అమరావతినే అని ప్రపంచం అనుకునేలా దీనిని అభివృద్ధి చేసి తీరుతామని ఆయన ప్రకటించారు. నాడు రాజధాని శంకుస్థాపనకు వచ్చిన ప్రధాని మోదీ.. స్వయంగా యమునా నది పవిత్ర జలాలను, సాక్షాత్తూ పార్లమెంట్ ఆవరణలోని పవిత్ర మట్టిని తెచ్చి ఈ రాజధాని ప్రాంతాన్ని పునీతం చేశారని సీఎం సగర్వంగా గుర్తుచేశారు.
అంగుళం కదిలించలేరు.. చారిత్రాత్మక తీర్మానానికి ఆమోదం!
అమరావతి అనేది ఎవరిపైనా ఆధారపడని ఒక స్వయం సమృద్ధి ప్రాజెక్టు అని ఆయన అసెంబ్లీలో పునరుద్ఘాటించారు. అమరావతికి తిరుగులేని చట్టబద్ధత కల్పించాలని కేంద్రాన్ని కోరేందుకు.. చంద్రబాబు ప్రభుత్వం శనివారం ప్రత్యేక శాసనసభ సమావేశాన్ని అత్యంత ప్రతిష్ఠాత్మకంగా నిర్వహించింది. రాష్ట్ర విభజన చట్టంలోని సెక్షన్-5(2)ను సవరిస్తూ.. కొత్తగా ‘ఎట్ అమరావతి’ అనే పదాన్ని అందులో చేర్చడంతో పాటు, సీఆర్డీఏ నోటిఫై చేసిన ప్రాంతాలను కూడా రాజధాని పరిధిలోకి వర్తింపజేసేలా చట్ట సవరణ కోరుతూ సీఎం చంద్రబాబు సభలో ఒక చారిత్రాత్మక తీర్మానాన్ని ప్రవేశపెట్టారు.
సభలో సుదీర్ఘ చర్చ అనంతరం.. మూజువాణి ఓటుతో ఈ తీర్మానం ఏకగ్రీవంగా ఆమోదం పొందినట్లు స్పీకర్ అయ్యన్నపాత్రుడు సగర్వంగా ప్రకటించారు. అంతకుముందు ఈ తీర్మానంపై జరిగిన వేడివేడి చర్చకు సీఎం చంద్రబాబు జవాబిస్తూ.. "అమరావతిని ఇకపై ఎవరూ టచ్ చేయలేరు. కనీసం అంగుళం కూడా కదిలించే పరిస్థితి ఎప్పటికీ రాదు. ఏపీకి ఉన్నది ఒక్కటే రాజధాని. అది అమరావతి మాత్రమే.. అదే శాశ్వతం!" అని కుండబద్దలు కొట్టారు.
అసెంబ్లీ చేసిన ఈ తీర్మానంతో రాజధానికి చట్టబద్ధంగా, రాజ్యాంగబద్ధంగా తిరుగులేని దృఢత్వం వస్తుందని ఆయన స్పష్టం చేశారు. "ఆంధ్రప్రదేశ్కు ఏపీ దేహమైతే.. అమరావతి గుండెకాయ. ఇది ఆంధ్రప్రదేశ్ ఆత్మ. ఆమరావతి అందరిదీ అని ప్రతి ఒక్కరూ గుండెల మీద చెయ్యేసుకుని గర్వంగా చెప్పుకునేలా ఈ నగర నిర్మాణం చేస్తాం" అని ఉద్వేగభరితంగా తెలిపారు. నాడు ఉమ్మడి ఆంధ్రప్రదేశ్లో సైబరాబాద్ నగరాన్ని తెలుగు జాతి భవిష్యత్తు కోసం ఎలాగైతే ఏర్పాటు చేశానో, ఇప్పుడూ అదే కసితో పనిచేస్తున్నానని ఆయన చెప్పుకొచ్చారు.
ఆదాయం సృష్టిస్తాం.. మూడు మెగా సిటీలతో విశ్వరూపం!
"నేను నాలుగోసారి సీఎంగా బాధ్యతలు చేపట్టా. 48 సంవత్సరాల సుదీర్ఘ రాజకీయ జీవితంలో ఉన్నా. నా లక్ష్యం ఎప్పుడూ ఒక్కటే! ఆ రోజు ఉమ్మడి రాష్ట్రంలో సైబరాబాద్ను అభివృద్ధి చేసి జాతికి అంకితం చేశా. ఈ రోజు మన అమరావతిని సైతం ప్రపంచం గర్వించేలా తయారుచేసుకుంటున్నాం. ఇది బెస్ట్ లివబుల్ సిటీ (నివసించడానికి అనువైన అత్యుత్తమ నగరం). ఇక్కడే రాష్ట్రాన్ని నడిపించే ఆదాయాన్ని సృష్టిస్తాం. ఈ రాష్ట్ర అభివృద్ధి, పేదల సంక్షేమానికి ఇక్కడి నుంచి వచ్చే ఆదాయాన్నే ఖర్చు చేసే పరిస్థితికి తీసుకొస్తాం" అని సీఎం చంద్రబాబు స్పష్టం చేశారు.
దేశంలో ఇప్పుడున్న నగరాలన్నీ ఎప్పుడో ఒకప్పుడు పాతకాలంలో కట్టిన నగరాలని, ఇటీవల కాలంలో కట్టిన ఏకైక నగరం హైదరాబాద్ మాత్రమేనని ఆయన గుర్తుచేశారు. కానీ, అమరావతి భవిష్యత్ నగరమని, దీనిని 'వరల్డ్ బెస్ట్' నగరంగా తయారుచేసి తీరుతామని ఆయన ప్రతిజ్ఞ చేశారు. ప్రపంచంలో, దేశంలో ఎన్ని లేటెస్ట్ టెక్నాలజీలు ఉన్నాయో.. వాటన్నింటినీ అమరావతికి తీసుకొస్తామన్నారు. రాష్ట్రాన్ని కేవలం అమరావతికే పరిమితం చేయకుండా.. విశాఖపట్నం రీజియన్, అమరావతి రీజియన్, తిరుపతి రీజియన్లుగా విభజించి.. ఈ మూడు ప్రాంతాలను మూడు అద్భుతమైన మెగా సిటీలుగా అభివృద్ధి చేస్తామని బాబు తన విజన్ను ఆవిష్కరించారు.
జగన్పై సెటైర్లు.. పోలవరం పూర్తికి డెడ్లైన్!
ఈ సందర్భంగా ప్రతిపక్ష నేత వైఎస్ జగన్మోహన్ రెడ్డి (పేరు ప్రస్తావించకుండా)పై చంద్రబాబు సెటైర్లు వేశారు. "ఇప్పుడున్న ప్రతిపక్ష నాయకుడు అసలు రాష్ట్ర విభజన సమయంలో ఎక్కడున్నాడో ఎవరికీ తెలియదు. అప్పుడు తన స్టాండ్ ఏమిటో కూడా కనీసం చెప్పలేదు" అని ఎద్దేవా చేశారు. రాష్ట్రానికి జీవనాడి అయిన పోలవరం ప్రాజెక్టుపై కూడా ఆయన కీలక ప్రకటన చేశారు. వచ్చే ఏడాది అత్యంత వైభవంగా జరిగే గోదావరి పుష్కరాల కంటే ముందే.. పోలవరం ప్రాజెక్టును సంపూర్ణంగా పూర్తి చేసి జాతికి అంకితమిస్తామని ఆయన శపథం చేశారు.
కేంద్ర హోంశాఖకు చేరిన తీర్మానం కాపీ
చరిత్రపుటల్లో నిలిచిపోయేలా రాష్ట్ర శాసనసభ ప్రత్యేక సమావేశంలో ఆమోదం పొందిన ఈ తీర్మానం కాపీని.. అసెంబ్లీ జనరల్ సెక్రటరీ శనివారం సాయంత్రమే హుటాహుటిన కేంద్ర హోం కార్యదర్శి, కేంద్ర హోం మంత్రి, అలాగే ఏపీ సీఎస్కు పంపించారు. ఈ కీలక సమాచారాన్ని రాష్ట్ర సమాచార, పౌర సంబంధాల విభాగం (ఐ అండ్ పీఆర్) ఒక అధికారిక ప్రకటన ద్వారా విడుదల చేసింది.
అమరావతి కేవలం ఇటుకలు, సిమెంట్తో కడుతున్న నగరం కాదు.. అది ఐదు కోట్ల ఆంధ్రుల ఆశల సౌధం! అసెంబ్లీ తీర్మానంతో లభించిన ఈ చట్టబద్ధత.. అమరావతిని ఇకపై రాజకీయ ప్రకంపనలకు అతీతమైన ఒక శాశ్వత రాజధానిగా నిలబెట్టబోతోంది. ఆంధ్రుడి కలను నిజం చేసే ఆ 'క్వాంటమ్ వ్యాలీ' కోసం ప్రపంచం ఎదురుచూస్తోంది!
Also Read:
గరికపాటి కోడిగుడ్డు వివాదం: సంచలన వ్యాఖ్యలు చేసిన మాజీ భార్య!అరటి రైతుల కోసం రంగంలోకి షర్మిల.. స్టీరింగ్ పట్టిన ఏపీసీసీ చీఫ్!
వైసీపీని వెంటాడుతున్న 11 అంకె: పార్లమెంట్లో గది మార్పించుకున్న ఎంపీలు!
విశాఖ సాక్షిగా వైసీపీ గర్జన: షర్మిల, సునీతలపై వరుదు కళ్యాణి ఫైర్
ArcelorMittal Steel Plant AP | ఒక్క జూమ్ కాల్.. ఒక తల్లి కన్నీరు.. అనకాపల్లిలో ఉక్కు సంకల్పానికి పునాది వేసిన నారా లోకేశ్!
