ఉపాధి కోసం గల్ఫ్ దేశాలకు వెళ్లిన తమ పిల్లలు, బంధువుల పరిస్థితి ఏంటోనని ఆంధ్రప్రదేశ్లోని లక్షలాది కుటుంబాలు ప్రస్తుతం బిక్కుబిక్కుమంటూ గడుపుతున్నాయి. పశ్చిమాసియాలో ఇరాన్-ఇజ్రాయెల్ మధ్య భీకర యుద్ధం జరుగుతుండటంతో ఎయిర్ పోర్టులన్నీ మూతపడి ప్రయాణికులు తీవ్ర ఇబ్బందులు పడుతున్నారు. ఈ ఆందోళనకర పరిస్థితుల మధ్య సామాన్య కుటుంబాలకు ధైర్యం చెబుతూ ఏపీ ప్రభుత్వం రంగంలోకి దిగింది. గల్ఫ్లో చిక్కుకున్న తెలుగువారిని సురక్షితంగా తీసుకొచ్చేందుకు ఢిల్లీ వేదికగా భారీ ఆపరేషన్ ప్రారంభించింది. అసలు ఎయిర్ పోర్టుల్లో ఇరుక్కున్న వారికి ప్రభుత్వం చేస్తున్న సాయం ఏంటి, అత్యవసరమైతే మీ వాళ్లు ఎవరిని కాంటాక్ట్ చేయాలో ఇప్పుడు చూద్దాం.
ఢిల్లీలో కంట్రోల్ రూమ్.. టెన్షన్ పడాల్సిన పనిలేదు
యుద్ధ వాతావరణం నేపథ్యంలో ముఖ్యమంత్రి నారా చంద్రబాబు నాయుడు ఎప్పటికప్పుడు పరిస్థితులను పర్యవేక్షిస్తున్నారు. అత్యవసర పరిస్థితుల్లో ఉన్న ప్రవాసాంధ్రులను రక్షించేందుకు ఢిల్లీలోని ఏపీ భవన్లో ప్రత్యేక కంట్రోల్ రూమ్ ఏర్పాటు చేశారు. ఏపీ ఎన్ఆర్ఐ వ్యవహారాల శాఖ మంత్రి కొండపల్లి శ్రీనివాస్ ఈ కంట్రోల్ రూమ్ ద్వారా సహాయక చర్యలను సమన్వయం చేస్తున్నారు. ఎయిర్ పోర్టుల్లో చిక్కుకున్న వారికి ఆంధ్రప్రదేశ్ నాన్ రెసిడెంట్ తెలుగు సొసైటీ (APNRTS) కో ఆర్డినేటర్ల ద్వారా తాత్కాలిక వసతి, భోజన సదుపాయాలు కల్పిస్తూ ప్రభుత్వం అండగా నిలుస్తోంది.
గల్ఫ్ దేశాల్లో ఇబ్బందులు పడుతున్న వారు లేదా ఇక్కడ ఏపీలో ఉన్న వారి కుటుంబ సభ్యులు వెంటనే ఏపీ ఎన్ఆర్టీఎస్ హెల్ప్లైన్ నంబర్ 0863-2340678 కు కాల్ చేసి సహాయం పొందవచ్చు. అలాగే +91 85000 27678 అనే వాట్సాప్ నంబర్ ద్వారా కూడా సమాచారం అందించవచ్చని ప్రభుత్వం సూచించింది. ఫోన్ సిగ్నల్స్ లేని ప్రాంతాల్లో ఉన్నవారు helpline@apnrts.com కు ఈమెయిల్ చేయడం ద్వారా నేరుగా ప్రభుత్వ అధికారులతో మాట్లాడే వెసులుబాటు కల్పించారు. స్థానికంగా ఉన్న ఇండియన్ ఎంబసీ అధికారులు కూడా ఎప్పటికప్పుడు తెలుగు పౌరులకు అండగా నిలుస్తున్నారు.
బహ్రెయిన్లో 50 వేల మంది తెలుగువారు
మరోవైపు గల్ఫ్ దేశమైన బహ్రెయిన్లోనే సుమారు 50 వేల మందికి పైగా ఏపీకి చెందినవారు ఉపాధి పొందుతున్నారు. ఇందులో ముఖ్యంగా నర్సీపట్నం ప్రాంతం నుంచి వెళ్లిన వారే ఎక్కువగా ఉండటంతో వారి కుటుంబాల్లో తీవ్ర ఆందోళన నెలకొంది. ఈ నేపథ్యంలో ఏపీ అసెంబ్లీ స్పీకర్ చింతకాయల అయ్యన్నపాత్రుడు నేరుగా బహ్రెయిన్లో ఉన్న ఎన్నారై ప్రతినిధి శెట్టి సతీశ్కు ఫోన్ చేసి అక్కడి తెలుగువారి యోగక్షేమాలను ఆరా తీశారు. ఎవరూ భయపడవద్దని, అప్రమత్తంగా ఉంటూ స్థానిక ప్రభుత్వ సూచనలు పాటించాలని ఆయన ధైర్యం చెప్పారు. ఆపదలో ఉన్నవారిని ఏపీ ప్రభుత్వం కచ్చితంగా ఆదుకుంటుందని స్పీకర్ భరోసా ఇచ్చారు.
ప్యానిక్ వద్దు.. ఎంబసీకి సమాచారం ఇవ్వండి!
యుద్ధం పేరుతో వాట్సాప్ లో వచ్చే ఫేక్ వీడియోలు చూసి ఇక్కడ ఉన్న కుటుంబ సభ్యులు అనవసరంగా ఆందోళన చెందవద్దు. ప్రభుత్వం ఏర్పాటు చేసిన వాట్సాప్, హెల్ప్ లైన్ నంబర్లను వెంటనే గల్ఫ్ దేశాల్లో ఉన్న మీ బంధువులకు షేర్ చేయండి. ఫ్లైట్స్ క్యాన్సిల్ అయినా కంగారు పడకుండా, అధికారుల సూచన మేరకు సురక్షిత ప్రాంతాల్లో లేదా ఏపీఎన్ఆర్టీఎస్ ఏర్పాటు చేసిన తాత్కాలిక షెల్టర్లలో ఉండటం ఉత్తమం. ఆపదలో ఉన్న ప్రతి పౌరుడిని క్షేమంగా రక్షించేందుకు ప్రభుత్వం అప్రమత్తంగా ఉందన్న వాస్తవాన్ని గ్రహించి, అధికారులకు సరైన సమాచారం అందిస్తూ ధైర్యంగా ఉండండి!
