ఎక్కడో పశ్చిమాసియాలో ఇరాన్, ఇజ్రాయెల్ దేశాలు బాంబులు వేసుకుంటుంటే.. ఇక్కడ మన దేశంలో భయం గుప్పిట్లో బతకాల్సిన పరిస్థితి ఎందుకు వస్తోందో తెలుసా? ఇరాన్ సుప్రీం లీడర్ ఖమేనీ మృతితో రగులుతున్న యుద్ధం సెగ, ఇప్పుడు నేరుగా మన భారతదేశ అంతర్గత భద్రతను కుదిపేస్తోంది. ఢిల్లీ నుంచి గల్లీ వరకు ఎప్పుడు ఎక్కడ ఏం జరుగుతుందోనని కేంద్ర హోంశాఖ అన్ని రాష్ట్రాలకు అత్యవసర హై అలర్ట్ జారీ చేసింది. అసలు ఈ విదేశీ యుద్ధం పేరుతో మన దేశంలో పేలుళ్లకు కుట్ర చేస్తున్నదెవరు, సామాన్యుడిగా మనం ఏయే ప్రాంతాలకు వెళ్లేటప్పుడు అప్రమత్తంగా ఉండాలో ఇప్పుడు చూద్దాం.
మన దేశంలో ఆందోళనలు.. కశ్మీర్లో ఇంటర్నెట్ బంద్
ఇజ్రాయెల్, అమెరికా దాడుల్లో ఇరాన్ సుప్రీం లీడర్ ఖమేనీ మరణించడాన్ని జీర్ణించుకోలేక ప్రపంచవ్యాప్తంగా షియా వర్గాలు ఆందోళనలకు దిగుతున్నాయి. దీని ప్రభావం మన దేశంపైనా తీవ్రంగా పడుతోంది. సోమవారం నాడు కూడా జమ్మూ కశ్మీర్ తో పాటు ఉత్తరప్రదేశ్, కర్ణాటక, న్యూఢిల్లీ లాంటి పలు రాష్ట్రాల్లో ముస్లింలు పెద్ద ఎత్తున రోడ్లపైకి వచ్చి నిరసన కార్యక్రమాలు, హింసాత్మక ఘర్షణలకు దిగుతున్నారు. పరిస్థితి చేయి దాటకుండా ఉండేందుకు కశ్మీర్ లోయలోని లాల్ చౌక్, బడ్గాం, పుల్వామా లాంటి ప్రాంతాల్లో పోలీసులు కఠిన ఆంక్షలు విధించి, ముందు జాగ్రత్తగా మొబైల్ ఇంటర్నెట్ సేవలను సైతం పూర్తిగా నిలిపివేశారు.
అప్రమత్తమైన కేంద్రం.. టార్గెట్గా ఎంబసీలు
దేశవ్యాప్తంగా ఈ ఆందోళనలు తీవ్రరూపం దాల్చుతుండటంతో కేంద్ర హోంశాఖ అన్ని రాష్ట్రాల పోలీసు బాస్లను తీవ్రంగా హెచ్చరించింది. ఈ నిరసనలను అడ్డుపెట్టుకుని ఇరాన్ అనుకూల రాడికల్స్, ఐఎస్ఐఎస్, అల్-ఖైదా లాంటి అంతర్జాతీయ ఉగ్రవాద సంస్థలు మన దేశంలో భారీ దాడులకు కుట్ర పన్నే ప్రమాదం ఉందని స్పష్టం చేసింది. ముఖ్యంగా మన దేశంలో ఉన్న అమెరికా, ఇజ్రాయెల్ ఎంబసీలు, కాన్సులేట్లు, ఆయా దేశాలకు చెందిన వ్యాపార సంస్థలే లక్ష్యంగా ఉగ్రవాదులు పేలుళ్లకు పాల్పడే అవకాశం ఉందని ఇంటెలిజెన్స్ వర్గాలు పసిగట్టాయి. సోషల్ మీడియాలో రెచ్చగొట్టే ప్రసంగాలు చేస్తున్న రాడికల్స్, ఇరాన్ అనుకూల విద్యార్థి సంఘాలపై డేగకన్ను వేయాలని హోంశాఖ స్పష్టమైన ఆదేశాలు జారీ చేసింది.
పర్యాటక ప్రాంతాల్లో ముప్పు.. సీసీటీవీలతో నిఘా
విదేశీ పర్యాటకులు, ముఖ్యంగా అమెరికా మరియు ఇజ్రాయెల్ జాతీయులు ఎక్కువగా సందర్శించే పర్యాటక ప్రాంతాల్లో, ప్రధాన నగరాల్లోని రద్దీ ప్రదేశాల్లో ఐఈడీ పేలుడు పదార్థాలు అమర్చే ముప్పు ఉందని కేంద్రం రాష్ట్రాలను అప్రమత్తం చేసింది. ఆయా ప్రాంతాల్లో భద్రతను కట్టుదిట్టం చేయాలని, సీసీటీవీల ద్వారా అనుమానాస్పద కదలికలను ఎప్పటికప్పుడు గమనించాలని సూచించింది. మతపరమైన ఉద్రిక్తతలు తలెత్తకుండా ముందస్తుగా కఠిన చర్యలు తీసుకోవాలని, అనుమానితులను తనిఖీ చేయాలని పోలీసు యంత్రాంగాన్ని కేంద్రం ఆదేశించింది.
సోషల్ మీడియా ఫేక్ వార్తలతో జాగ్రత్త.. పబ్లిక్ ప్లేసుల్లో అలర్ట్!
విదేశాల్లో జరుగుతున్న ఈ మతపరమైన, రాజకీయ యుద్ధాలను మన దేశంలోకి తెచ్చి అల్లర్లు సృష్టించాలని తీవ్రవాద శక్తులు కాచుకుని కూర్చున్నాయి. ఒక సామాన్యుడిగా మనం చేయాల్సిన మొదటి పని.. వాట్సాప్, ఫేస్బుక్లలో వచ్చే రెచ్చగొట్టే ఫేక్ వీడియోలను గుడ్డిగా ఫార్వార్డ్ చేయకపోవడం. అలాగే రాబోయే కొద్ది రోజుల పాటు రద్దీగా ఉండే పర్యాటక ప్రాంతాలకు, విదేశీ ఎంబసీలు, విదేశీ వ్యాపార సంస్థలు ఉండే ఏరియాలకు వెళ్లేటప్పుడు కాస్త అప్రమత్తంగా ఉండటం మన ప్రాణాలకు ఎంతో శ్రీరామరక్ష. అనుమానాస్పదంగా ఏమైనా కనిపిస్తే వెంటనే పోలీసులకు సమాచారం ఇవ్వడం ప్రతి పౌరుడి బాధ్యత!
