గ్రౌండ్లో క్రికెటర్ల బ్యాటింగ్ కంటే ముందే, కర్ణాటక రాజకీయ నేతల పంతం నెగ్గింది! "మేము వీఐపీలం, సామాన్యుల్లా క్యూలో నిలబడేదే లేదు" అని భీష్మించుకుకూర్చున్న కర్ణాటక అధికార పార్టీ ఎమ్మెల్యేల బెదిరింపులు ఎట్టకేలకు ఫలించాయి. సామాన్యుడు టికెట్ కోసం అహోరాత్రులు పోరాడుతుంటే.. ప్రజాప్రతినిధులు మాత్రం తమ పవర్తో దర్జాగా వీఐపీ పాస్లు కొల్లగొట్టారు!
క్యూ లైన్లకు గుడ్బై.. వీఐపీలకు రెడ్ కార్పెట్!
ఐపీఎల్ టికెట్ల కోసం సామాన్య అభిమానులు ఆన్లైన్లో, స్టేడియం క్యూ లైన్లలో చెమటోడుస్తుంటే.. ఎమ్మెల్యేలు మాత్రం ఉచితంగా టికెట్లు పొందనున్నారు. కర్ణాటక రాష్ట్ర క్రికెట్ అసోసియేషన్ (KSCA) ఈ ప్రజాప్రతినిధుల డిమాండ్కు తలొగ్గింది. కేఎస్సీఏ అధ్యక్షుడు, టీమిండియా మాజీ ఫాస్ట్ బౌలర్ వెంకటేష్ ప్రసాద్ స్వయంగా ముఖ్యమంత్రి సిద్ధరామయ్యను కలిసి ఈ ఉచిత టికెట్ల బంపర్ ఆఫర్ను అధికారికంగా ప్రకటించారు.
సీఎం సార్ మ్యాచ్కు రావాలి.. ఎమ్మెల్యేలకు తలా మూడు టికెట్లు!
శనివారం నాడు బెంగళూరులోని చిన్నస్వామి స్టేడియం దద్దరిల్లేలా సీజన్ తొలి మ్యాచ్ జరగబోతోంది. డిఫెండింగ్ ఛాంపియన్ ఆర్సీబీ, సన్రైజర్స్ హైదరాబాద్ జట్లు అమీతుమీ తేల్చుకోనున్న ఈ బ్లాక్ బస్టర్ మ్యాచ్కు రావాల్సిందిగా సీఎం సిద్ధరామయ్యను వెంకటేష్ ప్రసాద్ ఘనంగా ఆహ్వానించారు.
ఇదే క్రమంలో, ఎమ్మెల్యేలు, మంత్రులకు చిన్నస్వామి స్టేడియంలో అత్యున్నత వీఐపీ స్టేటస్తో ఉచితంగా మ్యాచ్ చూసే రాజభోగం కల్పించనున్నారు. ఈ స్టేడియంలో జరిగే ప్రతి మ్యాచ్కు ఒక్కో ఎమ్మెల్యేకు, మంత్రికి ఏకంగా మూడు టికెట్ల చొప్పున సమర్పించుకోనున్నట్లు కేఎస్సీఏ స్పష్టం చేసింది.
నిన్నటి రచ్చ.. రంగంలోకి డీకే శివకుమార్!
అసలు ఈ ఉచిత టికెట్ల వర్షం కురవడం వెనుక సరిగ్గా ఒక రోజు ముందు జరిగిన పెద్ద పొలిటికల్ డ్రామానే ఉంది. రాష్ట్ర ఎమ్మెల్యేలకు కేఎస్సీఏ ఏమాత్రం గౌరవం ఇవ్వడం లేదని, సామాన్యుల లాగే క్యూలో నిలబడమనడం ఏంటని నేతలు అగ్గిమీద గుగ్గిలమయ్యారు. పరిస్థితి చేయిజారిపోతుండటంతో కర్ణాటక డిప్యూటీ సీఎం డీకే శివకుమార్ రంగంలోకి దిగారు. ప్రజాప్రతినిధులకు కనీసం ఒక్కొక్కరికి రెండేసి టికెట్లు ఉచితంగా ఇవ్వాల్సిందిగా ఆయన కర్ణాటక క్రికెట్ బోర్డుకు సూచించారు. ఉప ముఖ్యమంత్రి ఎంట్రీతో దిగొచ్చిన కేఎస్సీఏ, అడిగిన రెండుకు బదులు ఏకంగా మూడు ఉచిత టికెట్లు ఇచ్చేందుకు సలాం కొట్టింది.
డిఫెండింగ్ ఛాంపియన్ ఆర్సీబీ.. రాయ్పూర్ ట్విస్ట్!
గతేడాది ఐపీఎల్ సీజన్లో అద్భుతమైన ఆటతీరుతో రాయల్ చాలెంజర్స్ బెంగళూరు (ఆర్సీబీ) కప్పు కొట్టి డిఫెండింగ్ ఛాంపియన్గా అవతరించిన సంగతి తెలిసిందే. అయితే, ఈసారి వారు తమ ఏడు హోం మ్యాచ్లలో కేవలం ఐదింటిని మాత్రమే సొంత గడ్డ చిన్నస్వామి స్టేడియంలో ఆడుతున్నారు. దీని వెనుక ఒక విషాద నేపథ్యం ఉంది. గత ఏడాది విజయోత్సవ సంబరాల్లో జరిగిన ఘోర విషాదం కారణంగా.. అసలు ఈసారి చిన్నస్వామిలో మ్యాచ్లు నిర్వహించేందుకు అనుమతి లభిస్తుందా లేదా అనే అనుమానాలు తీవ్రంగా వ్యక్తమయ్యాయి.
మాటకు కట్టుబడి.. కొత్త మైదానంలోకి..
ఈ టెన్షన్ల నేపథ్యంలో, ఆర్సీబీ ఫ్రాంచైజీ తొలుత తమ హోం గ్రౌండ్ను రాయ్పూర్కు మార్చాలని ముందుగా నిర్ణయించింది. అయితే, ఆ తర్వాత పరిణామాలు మారి చిన్నస్వామి స్టేడియంలో మ్యాచ్ల నిర్వహణకు పచ్చజెండా ఊపారు. కానీ, అప్పటికే తాము ఇచ్చిన మాటకు కట్టుబడి, రెండు మ్యాచ్లను రాయ్పూర్ వేదికగా ఆడేందుకు ఆర్సీబీ సిద్ధమైంది.
గ్రౌండ్లో క్రికెటర్లు కప్పు కోసం చెమటోడుస్తుంటే.. బయట ఏసీ రూముల్లో కూర్చున్న రాజకీయ నేతలు మాత్రం తమ హోదాను అడ్డం పెట్టుకుని ఉచిత వీఐపీ టికెట్ల కోసం ఆడిన ఈ మైండ్ గేమ్.. క్యూ లైన్లలో నిలబడే సగటు క్రికెట్ అభిమానికి మిగిల్చిన అతిపెద్ద వెక్కిరింత!
