ఆస్కార్ రేసు నుంచి నేరుగా టాలీవుడ్ తెరపైకి! ఆనంద్ దేవరకొండతో 'లాపతా' బ్యూటీ సంచలన ఎంట్రీ..
నితాన్షి గోయెల్.. ఈ పేరు చెబితే బహుశా వెంటనే గుర్తుపట్టకపోవచ్చు. కానీ, ‘ఫూల్ కుమారి’ అనగానే బాలీవుడ్ ప్రేక్షకుల మనసుల్లో ఒక అమాయకపు క్యూట్ ఫేస్ మెదులుతుంది. తన తొలి అడుగుతోనే ఏకంగా ఆస్కార్ దాకా వెళ్లి సంచలనం సృష్టించింది ఈ నోయిడా బ్యూటీ. కేవలం 17 ఏళ్ల వయసులోనే సినీ దిగ్గజాలు సైతం కలలు కనే ప్రతిష్ఠాత్మక ‘ఐఫా’ అవార్డును కొల్లగొట్టి చరిత్ర సృష్టించింది. ఆస్కార్, ఐఫా లాంటి మైలురాళ్లను అవలీలగా దాటేసిన ఈ క్రేజీ హీరోయిన్.. ఇప్పుడు ఆనంద్ దేవరకొండ సరసన ‘తక్షకుడు’ సినిమాతో టాలీవుడ్లో గ్రాండ్ ఎంట్రీ ఇస్తోంది. ఈ సందర్భంగా నితాన్షి పంచుకున్న ఆసక్తికరమైన సినీ ప్రయాణం మీకోసం!
తొమ్మిదేళ్లకే బుల్లితెర ఎంట్రీ.. మోడలింగ్లో మెరుపులు
ముంబైలో ఒక క్యూట్ మోడల్గా తన అద్భుతమైన కెరీర్ను ప్రారంభించింది నితాన్షి. చిన్న వయసులోనే తనదైన చరిష్మాతో ఆకట్టుకున్న ఈ భామ.. 2015లో ‘మిస్ పాంటలూన్స్ జూనియర్ ఐకాన్’ టైటిల్ను సొంతం చేసుకుంది. ఆ తర్వాత బిబా, అమూల్ వంటి ప్రతిష్టాత్మక బ్రాండ్స్కు అంబాసిడర్గా మారి యాడ్స్లో సందడి చేసింది. తనకంటూ ఒక ప్రత్యేక గుర్తింపు తెచ్చుకుని, కేవలం తొమ్మిదేళ్ల లేత వయసులోనే బుల్లితెరకు పరిచయమై ప్రేక్షకులను మంత్రముగ్ధులను చేసింది.
17 ఏళ్లకే ఐఫా.. అమ్మ త్యాగాలకే నా అంకితం!
నటీనటుల జీవితంలో ఒక్కసారైనా ‘ఐఫా’ అవార్డును ముద్దాడాలని ప్రతి ఒక్కరూ బలంగా కలలు కంటారు. కానీ, నితాన్షి మాత్రం తన మొదటి సినిమాకే, అది కూడా కేవలం 17 ఏళ్ల వయసులో ఆ ప్రతిష్ఠాత్మక అవార్డును అందుకుని విమర్శకుల ప్రశంసల వర్షం కురిపించుకుంది. ఈ అపురూపమైన క్షణాలను తన జీవితంలో ఎప్పటికీ మర్చిపోలేనని ఆమె ఎమోషనల్ అయింది. తన యాక్టింగ్ కెరీర్ కోసం ఎన్నో నిద్రలేని రాత్రులు గడిపి, ఎన్నో త్యాగాలు చేసిన తన కన్నతల్లికే ఆ ఐఫా అవార్డును సగర్వంగా అంకితం చేసింది.
చదువులో ఫస్ట్.. నటనలోనూ బెస్ట్!
ఉత్తర్ప్రదేశ్లోని నోయిడాకు చెందిన నితాన్షి.. అటు చదువులోనూ, ఇటు నటనలోనూ ఎప్పుడూ ఫస్టే! చిన్నప్పటి నుంచే టీవీ స్క్రీన్ మీద కనిపించాలనీ, వేదికల మీద పెర్ఫార్మెన్స్ చేయాలనే బలమైన కోరిక ఆమెలో అగ్నిపర్వతంలా రగిలేది. స్కూల్లో జరిగే డ్యాన్స్, డ్రామా పోటీల్లో తప్పకుండా పాల్గొని బహుమతులు కొల్లగొట్టేది. ఎంత బిజీ షూటింగ్లలో ఉన్నా తన బాల్యాన్నేమీ కోల్పోలేదని ఆమె చెబుతోంది. అయితే బాల్యాన్ని, వర్క్ని బ్యాలెన్స్ చేయడంలో కొన్ని కఠినమైన సవాళ్లు ఎదురైనా.. భవిష్యత్తుకు పనికొచ్చే ఎన్నో విలువైన పాఠాలు నేర్చుకున్నానని ధీమాగా చెబుతోంది.
నాన్న కన్న కల.. ముంబైకి మకాం
గ్లామర్ ఫీల్డ్లో నితాన్షి ఈ స్థాయికి చేరుకోవడానికి ఆమె తల్లిదండ్రులే అతిపెద్ద బలం. బీటౌన్లో సక్సెస్ సాధించడానికి, ఎదురైన సవాళ్లను ధైర్యంగా దాటడానికి కుటుంబం, స్నేహితులు, గురువులు ఆమెకు కొండంత అండగా నిలిచారు. నటనపై కూతురికి ఉన్న పిచ్చిని గమనించిన తల్లిదండ్రులు.. ఏమాత్రం ఆలోచించకుండా తాము చేస్తున్న పనులను సైతం వదిలేసి, ఆమె ఉజ్వల భవిష్యత్తు కోసం ఏకంగా ముంబైకి మకాం మార్చారు.
జూనియర్ రేఖ.. కానీ అనుకరణ వద్దు!
బాలీవుడ్ ఎవర్ గ్రీన్ బ్యూటీ, సీనియర్ నటి రేఖ అంటే నితాన్షికి ప్రాణం. ఆమె ముఖకవళికలు చూసి చాలామంది 'అచ్చం రేఖలా ఉన్నావు' అని మెచ్చుకునేవారు. దాంతో ఒకప్పుడు రేఖను బాగా ఇమిటేట్ చేసేది. కానీ, ఈ ప్రపంచంలో "మరో రేఖ పుట్టడం అనేది అసాధ్యం" అని రియలైజ్ అయిన తర్వాత, ఆమెను అనుకరించడం మానేసి నటనలో తనకంటూ ఒక ఒరిజినల్ స్టైల్ను క్రియేట్ చేసుకుంది.
ధోనీ బయోపిక్ నుంచి అమీర్ ఖాన్ పిలుపు వరకు..
సీరియల్స్ చేస్తున్నప్పుడే 'ఎంఎస్ ధోనీ: ది అన్టోల్డ్ స్టోరీ' చిత్రంలో ఒక చిన్న పాత్రతో వెండితెరకు పరిచయమైంది. ఆ తర్వాత 'లవ్ స్లీప్ రిపీట్', 'ఇన్సైడ్ ఎడ్జ్ 2' లాంటి పాపులర్ వెబ్ సిరీస్లలో తన సత్తా చాటింది. ఇక 'లాపతా లేడీస్' ఆడిషన్కు వెళ్లేనాటికి ఆమె తొమ్మిదో తరగతి చదువుతోంది. ఆడిషన్లో ఆమె పలికించిన అమాయకపు హావభావాలు చూసి బాలీవుడ్ మిస్టర్ పర్ఫెక్ట్ అమీర్ ఖాన్ ఫిదా అయిపోయారు. వెంటనే ఆమెను 'ఫూల్ కుమారి' పాత్రకు ఫైనల్ చేశారు. పరీక్షల విరామంలోనే ఆ సినిమా షూటింగ్ను కంప్లీట్ చేయడం విశేషం!
సక్సెస్ తలకెక్కలేదు.. ఆకాశమే హద్దు!
'లాపతా లేడీస్' సాధించిన పాన్ ఇండియా సక్సెస్ ఏమాత్రం తన తలకెక్కలేదని నితాన్షి ఎంతో వినయంగా చెబుతోంది. భవిష్యత్లో మరిన్ని అద్భుతమైన, ప్రేక్షకులకు గుర్తుండిపోయే సినిమాలు చేయాలన్నదే తన ఏకైక లక్ష్యమంటోంది. బాలీవుడ్, టాలీవుడ్ అన్న తేడా లేకుండా.. కంటెంట్ ఉన్న కథలైతే పెద్ద స్టార్ హీరోలతో పాటు యువ నటులతోనూ స్క్రీన్ షేర్ చేసుకునేందుకు తాను పూర్తిగా సిద్ధంగా ఉన్నానని ఈ యంగ్ సెన్సేషన్ ప్రకటించింది.
బాలీవుడ్ను మాయ చేసిన ఈ 'ఫూల్ కుమారి'.. టాలీవుడ్లో 'తక్షకుడు'తో ఎలాంటి మ్యాజిక్ క్రియేట్ చేయబోతోందో చూడాలంటే సినిమా రిలీజ్ అయ్యేదాకా ఆగాల్సిందే!
Also Read:
శర్వానంద్ 'బైకర్' హీరోయిన్ మాళవిక నాయర్ ఇంట్రెస్టింగ్ కబుర్లు!'ఆదర్శ కుటుంబం'లో పూజా హెగ్డే? వెంకటేష్-త్రివిక్రమ్ క్రేజీ అప్డేట్!
రణ్వీర్ సింగ్ రికార్డుల వేట.. 1000 కోట్ల దిశగా దూసుకుపోతున్న ధురంధర్ 2!
ఫర్మాన్ ఖాన్తో పెళ్లి.. లవ్ జిహాద్ ఆరోపణలపై మొనాలిసా భోస్లే ఏమందంటే?
ప్రభాస్తో ఆ పాత్ర చేయను.. నటి రాశి సంచలన కండిషన్!
