ఐపీఎల్ 19వ సీజన్లో రాజస్థాన్ రాయల్స్ రాయల్ ఎంట్రీ! గువాహటి బర్సపుర స్టేడియం వేదికగా జరిగిన మ్యాచులో పసుపు దళం (CSK) బ్యాటర్ల వెన్నులో వణుకు పుట్టిస్తూ.. ఐదుసార్లు ఛాంపియన్గా నిలిచిన సీఎస్కే ను చిత్తుచిత్తుగా ఓడించింది. రవీంద్ర జడేజా స్పిన్ మాయాజాలం, రాజస్థాన్ కుర్రాడు వైభవ్ సూర్యవంశీ వీరబాదుడు ముందు ధోని సైన్యం చేతులెత్తేసిన ఈ మ్యాచ్ హైలైట్స్ మీకోసం!
చెన్నై కకావికలం.. చెలరేగిన రాయల్స్ బౌలర్లు!
సోమవారం రాత్రి జరిగిన ఈ హై-వోల్టేజ్ మ్యాచ్లో రాజస్థాన్ రాయల్స్ టాస్ గెలిచి ముందుగా బౌలింగ్ ఎంచుకుంది. కెప్టెన్ రియాన్ పరాగ్ తీసుకున్న ఈ నిర్ణయం ఎంత పక్కాగా వర్కౌట్ అయిందో రాయల్స్ బౌలర్లు నిరూపించారు. బంతి పట్టుకున్న ప్రతి బౌలర్ నిప్పులు చెరిగారు! రవీంద్ర జడేజా (2/18), జోఫ్రా ఆర్చర్ (2/19), నండ్రె బర్గర్ (2/26) ల భయంకరమైన బౌలింగ్ ధాటికి చెన్నై సూపర్ కింగ్స్ బ్యాటర్లు పేకమేడలా రాలిపోయారు. ఈ విధ్వంసానికి సీఎస్కే కేవలం 19.4 ఓవర్లలో 127 పరుగులకే ఆలౌట్ అయి ఘోరంగా విఫలమైంది. ఈ ఇన్నింగ్స్లో జెమీ ఓవర్టన్ (43) దే టాప్ స్కోర్ అంటే చెన్నై పరిస్థితి అర్థం చేసుకోవచ్చు.
పెవిలియన్కు క్యూ కట్టిన పసుపు దళం!
సొంత గడ్డపై రాజస్థాన్ బౌలర్లు మొదటి ఓవర్ నుంచే చెలరేగిపోయారు. ఈ సీజన్లో రాజస్థాన్ నుంచి చెన్నైకి మారిన స్టార్ బ్యాటర్ సంజూ శాంసన్ (6) భారీ అంచనాలతో క్రీజులోకి వచ్చాడు. కానీ, బర్గర్ వేసిన రెండో ఓవర్లో ఆ ఊహించని అద్భుత బంతికి శాంసన్ క్లీన్ బౌల్డ్ అయి అభిమానులను తీవ్ర నిరాశకు గురిచేశాడు.
2020 తర్వాత ఒక ఐపీఎల్ సీజన్ ఆరంభ మ్యాచ్లో సంజూ కనీసం హాఫ్ సెంచరీ చేయకపోవడం ఇదే తొలిసారి! ఆ తర్వాత మూడో ఓవర్లోనే జోఫ్రా ఆర్చర్ తనదైన శైలిలో రుతురాజ్ గైక్వాడ్ (6) ను బౌల్డ్ చేసి చెన్నైకి మరో భారీ షాక్ ఇచ్చాడు. ఆ మరుసటి ఓవర్లోనే ఆయూశ్ను బర్గర్ డకౌట్ చేయగా.. సందీప్ శర్మ బౌలింగ్లో మాథ్యూ షార్ట్ (2) వెనుదిరిగాడు. పవర్ ప్లే ముగిసే సరికి చెన్నై స్కోరు 41/4 తో పీకల్లోతు కష్టాల్లో కూరుకుపోయింది.
పాత పగ తీర్చుకున్న జడేజా?
ఇక 8వ ఓవర్లో బంతినందుకున్న రవీంద్ర జడేజా.. గత సీజన్ వరకు తాను ఆడిన పాత ఫ్రాంచైజీ చెన్నైపైనే కసి తీర్చుకున్నాడా అన్నంత భయంకరంగా బౌలింగ్ చేశాడు! ఒకే ఓవర్లో సర్ఫరాజ్ (17), శివమ్ దూబె (6) వికెట్లు పడగొట్టి సీఎస్కేని కోలుకోలేని దెబ్బ కొట్టాడు. ఈ సీజన్ వేలంలో ఏకంగా రూ. 14 కోట్లు పెట్టి చెన్నై కొనుగోలు చేసిన కార్తీక్ శర్మ (18) సైతం బ్రిజేశ్ బౌలింగ్లో 11వ ఓవర్లో ఎల్బీడబ్ల్యూగా వెనుదిరిగాడు. అసలు చెన్నై కనీసం 100 పరుగులైనా చేస్తుందా అనిపించిన తరుణంలో.. చివర్లో జెమీ ఓవర్టన్ తన మెరుపులతో జట్టుకు కాస్త గౌరవప్రదమైన స్కోరు అందించాడు.
సూర్యవంశీ వీరవిహారం.. రాజస్థాన్ సునాయాస విజయం!
128 పరుగుల స్వల్ప లక్ష్యాన్ని ఛేదించడానికి బరిలోకి దిగిన రాజస్థాన్ ఏమాత్రం తడబడలేదు. కేవలం మూడు రోజుల క్రితమే 15వ ఏట అడుగుపెట్టిన ఐపీఎల్ సంచలనం వైభవ్ సూర్యవంశీ (17 బంతుల్లో 52, 4 ఫోర్లు, 5 సిక్సర్లు) క్రీజులోకి రాగానే శివతాండవం చేశాడు. ఎదుర్కొన్న తొలి బంతినే పుల్ షాట్ ఆడబోయి మిడ్ వికెట్ వద్ద కార్తీక్ క్యాచ్ వదిలేయడంతో బతికిపోయిన ఈ కుర్రాడు.. ఆ తర్వాత ఇక వెనక్కి తిరిగి చూడలేదు!
హెన్రీ వేసిన ఓవర్లో భారీ సిక్సర్ బాదిన వైభవ్.. కంబోజ్ ఐదో ఓవర్లో ఏకంగా 4, 4, 6 బాది బౌలర్లకు చుక్కలు చూపించాడు. నూర్ అహ్మద్కు వరుసగా రెండు సిక్సర్లతో స్వాగతం పలికి కేవలం 15 బంతుల్లోనే తన అర్ధ శతకాన్ని పూర్తి చేసుకుని రికార్డు సృష్టించాడు! పవర్ ప్లే ముగిసేసరికే రాజస్థాన్ విజయం ఖాయమైపోయింది.
ధాటిగా ఆడే క్రమంలో ఏడో ఓవర్లో కంబోజ్ బౌలింగ్లో వైభవ్ ఔట్ కావడంతో చెన్నైకి కాస్త బ్రేక్ దొరికింది. ఆ తర్వాత వచ్చిన ధ్రువ్ జురెల్ (18) కూడా వేగంగా ఆడినా ఎక్కువసేపు క్రీజులో నిలవలేదు. కానీ, యశస్వి జైస్వాల్ (38 నాటౌట్), కెప్టెన్ రియాన్ పరాగ్ (14 నాటౌట్) బాధ్యతాయుతంగా ఆడి.. రాజస్థాన్ను 12.1 ఓవర్లలోనే కేవలం 2 వికెట్లు కోల్పోయి అద్భుత విజయ తీరాలకు చేర్చారు.
బౌలర్ల ఆధిపత్యం.. 15 ఏళ్ల కుర్రాడి వీరవిహారం వెరసి.. ఐపీఎల్ 19వ సీజన్ ఆరంభంలోనే రాజస్థాన్ రాయల్స్ ప్రత్యర్థులకు గట్టి వార్నింగ్ ఇచ్చింది. మరి ఐదుసార్లు ఛాంపియన్ అయిన చెన్నై ఈ ఘోర పరాజయం నుంచి ఎలా కోలుకుంటుందో చూడాలి!
Also Read:
నసీమ్ షాకు పీసీబీ భారీ షాక్: రూ. 68 లక్షల జరిమానా!పీఎస్ఎల్లో బాల్ టాంపరింగ్ కలకలం.. ఫఖర్ జమాన్పై సంచలన ఆరోపణలు!
13 ఏళ్ల శాపవిమోచనం.. రోహిత్ వీరవిహారంతో ముంబైకి రికార్డు విజయం!
ముంబైకి షాక్.. వాంఖడేలో కేకేఆర్ పరుగుల సునామీ! 220 టార్గెట్
రోహిత్ సంచలన రికార్డు: 19 సీజన్లూ ఆడిన ఏకైక 'క్యాప్డ్' ప్లేయర్
