అమెరికా రక్షణ మంత్రి పీటర్ హెగ్సెత్ నిన్నటి దాకా 'అంతులేని యుద్ధాలు వద్దు' అని నీతులు చెప్పి.. ఇప్పుడు స్వయంగా ఇరాన్ పై భీకర యుద్ధాన్ని ఎందుకు సమర్థిస్తున్నారు? ప్రపంచాన్ని నాశనం చేసే ఈ యుద్ధంలో అమెరికా గెలుస్తోందని ఆయన ఎందుకు ప్రగల్భాలు పలుకుతున్నారు? ఎక్కడో అమెరికా, ఇరాన్ కొట్టుకుంటే మనకెందుకు అనుకోకండి. అగ్రరాజ్యాల ఈ ఇగోల యుద్ధం వల్ల క్రూడాయిల్ రేట్లు పెరిగి, మన దైనందిన జీవితంపై, రేపు ఉదయం మనం కొట్టించే పెట్రోల్ ధరలపై నేరుగా ప్రభావం పడుతుంది. అసలు పీటర్ హెగ్సెత్ వెనుక ఉన్న వివాదాలేంటి? ట్రంప్ సర్కార్ ఆడుతున్న ఈ డేంజరస్ గేమ్ ఏంటో ఇప్పుడు తెలుసుకుందాం.
శాంతి కపోతం నుంచి యుద్ధ డేగలా మారిన వైనం!
ఒకప్పుడు 'రెజీమ్ చేంజ్' (ప్రభుత్వాలను కూల్చడం), లక్ష్యం లేని యుద్ధాలను తీవ్రంగా వ్యతిరేకించిన పెంటగాన్ చీఫ్ పీటర్ హెగ్సెత్.. ఇప్పుడు ఇరాన్ పై డొనాల్డ్ ట్రంప్ చేస్తున్న దాడులను గట్టిగా వెనకేసుకొస్తున్నారు.
"అమెరికా కనికరం లేకుండా, దారుణంగా దెబ్బకొడుతూ గెలుస్తోంది. శత్రువుల సామర్థ్యాలను నాశనం చేయడం ఇప్పుడే మొదలుపెట్టాం" అంటూ హెగ్సెత్ సంచలన వ్యాఖ్యలు చేశారు.
మీడియాను సైతం ఆయన వదల్లేదు. "ఇది ఇరాక్ కాదు, ఇది అంతులేని యుద్ధం కాదు.. ఇది ట్రంప్ మార్క్ వార్" అంటూ విమర్శకులకు స్ట్రాంగ్ కౌంటర్ ఇచ్చారు.
ఆరుగురు అమెరికా సైనికుల బలి..
పీటర్ హెగ్సెత్ హయాంలో అమెరికా చేసిన ఐదో అతిపెద్ద సైనిక ఆపరేషన్ ఈ ఇరాన్ యుద్ధం. గతంలో యెమెన్ రెబల్స్, ఇరాన్ అణు కేంద్రాలు, డ్రగ్స్ బోట్లు, వెనిజులా అధ్యక్షుడు మాదురోపై దాడులు ఆయన కనుసన్నల్లోనే జరిగాయి.
ఇప్పటిదాకా అమెరికా వైపు పెద్దగా ప్రాణనష్టం జరగకపోయినా, ఈ ఇరాన్ యుద్ధంలో మాత్రం ఇప్పటికే ఆరుగురు అమెరికా సైనికులు ప్రాణాలు కోల్పోయారు.
అయినా సరే, ఏమాత్రం వెనక్కి తగ్గని ఆయన.. మీడియా కేవలం ఇరాన్ డ్రోన్ దాడులను, నెగెటివ్ వార్తలను మాత్రమే హైలైట్ చేస్తూ అధ్యక్షుడు ట్రంప్ను బ్యాడ్ చేయాలని చూస్తోందని ఆయన ఆరోపించారు.
వివాదాల సుడిగుండంలో పెంటగాన్ చీఫ్
45 ఏళ్ల పీటర్ హెగ్సెత్ గతంలో ఫాక్స్ న్యూస్ కో-హోస్ట్ గా పనిచేశారు. 18 ఏళ్లు నేషనల్ గార్డ్లో సైనికుడిగా సేవలు అందించిన ఈయన చుట్టూ ఎన్నో వివాదాలున్నాయి.
ఎన్జీవో నిధుల దుర్వినియోగం, విపరీతమైన మద్యపానం, మహిళపై లైంగిక దాడి ఆరోపణలు ఆయన రక్షణ మంత్రి పదవి చేపట్టే సమయంలో తీవ్ర దుమారం రేపాయి.
యెమెన్ దాడుల సమయంలో రహస్య సమాచారాన్ని పొరపాటున ఓ జర్నలిస్టుకు వాట్సాప్ (సిగ్నల్) గ్రూపులో షేర్ చేసి అడ్డంగా బుక్కయ్యారు. డ్రగ్స్ బోటుపై దాడి సమయంలో ప్రాణాలతో మిగిలిన నావికులను సైతం దారుణంగా చంపించడం తీవ్ర విమర్శలకు దారితీసింది. అంతేకాకుండా, ఎలాంటి వివరణ ఇవ్వకుండానే చార్లెస్ బ్రౌన్ లాంటి సీనియర్ మిలిటరీ జనరల్స్ ను పదవుల నుంచి తొలిగించి సంచలనం సృష్టించారు.
డిసెంబర్లో జరిగిన డిఫెన్స్ ఫోరమ్లో "శాంతే మా లక్ష్యం" అని చెప్పిన హెగ్సెత్.. మూడు నెలలు తిరగకముందే ఇరాన్ పై భీకర యుద్ధానికి దిగడం అమెరికా ద్వంద్వ వైఖరికి అద్దం పడుతోంది. "ఈ యుద్ధం మేం మొదలుపెట్టలేదు కానీ, ట్రంప్ హయాంలో మేమే ముగిస్తాం" అని ఆయన చెప్పడం చూస్తుంటే ఇప్పట్లో ఈ మారణహోమం ఆగేలా లేదు. అగ్రరాజ్యాల పంతం వల్ల గ్లోబల్ ఎకానమీ కుప్పకూలడం ఖాయం.
