అగ్రరాజ్యం అమెరికానే వణికించేలా ఆకాశంలో ఒక అదృశ్య నేత్రం కాపలా కాస్తోంది. పశ్చిమాసియా రణరంగంలో అమెరికా సైనిక స్థావరాలపై ఇరాన్ చేస్తున్న భీకర దాడుల వెనుక ఉన్న ఆ రహస్య శక్తి ఏంటో ఎట్టకేలకు బట్టబయలైంది. అవును, అమెరికా-ఇరాన్ యుద్ధంలో డ్రాగన్ కంట్రీ చైనా నేరుగా ఎంట్రీ ఇచ్చింది. ఇరాన్కు సహాయం చేస్తూ అమెరికా సైనికుల కదలికలను చైనా ఉపగ్రహాలు గుట్టుచప్పుడు కాకుండా పసిగడుతున్నాయన్న సంచలన నివేదిక ఇప్పుడు ప్రపంచ పటంలో పెను ప్రకంపనలు సృష్టిస్తోంది. ఈ మైండ్ బ్లాంక్ అయ్యే సీక్రెట్ ఆపరేషన్ గుట్టు ఏంటో ఇక్కడ చదవండి.
ఆకాశంలో డ్రాగన్ కన్ను.. సీక్రెట్గా ఇరాన్ చేతికి!
పశ్చిమాసియాలో ఇరాన్, అమెరికా మధ్య జరుగుతున్న యుద్ధంలో చైనా సైనిక సహాయం చేస్తోందన్న వాదనలకు ఇప్పుడు బలమైన సాక్ష్యాలు దొరికాయి. గల్ఫ్ దేశాల వ్యాప్తంగా ఉన్న అమెరికా సైనిక స్థావరాల సమాచారాన్ని సేకరించేందుకు, ఇరాన్ గత ఏడాది అత్యంత రహస్యంగా ఒక చైనా ఉపగ్రహాన్ని చేజిక్కించుకుందని 'ఫైనాన్షియల్ టైమ్స్' నివేదిక బాంబు పేల్చింది.
చైనాకు చెందిన ఎర్త్ ఐ కంపెనీ (Earth-i) ఈ 'TEE-01B' ఉపగ్రహాన్ని అత్యంత సాంకేతికతతో అభివృద్ధి చేసి ప్రయోగించింది. ఆ తర్వాత ఇస్లామిక్ రివల్యూషనరీ గార్డ్ కార్ప్స్ (IRGC) ఏరోస్పేస్ ఫోర్స్ దీనిని పూర్తిగా తమ ఆధీనంలోకి తీసుకుంది. అమెరికా అధ్యక్షుడు డొనాల్డ్ ట్రంప్ ఎప్పటినుంచో ఆరోపిస్తున్నట్లుగానే, ఇరాన్కు చైనా భారీగా సైనిక సాయం చేస్తోందన్న విషయం ఈ పరిణామంతో అక్షర సత్యంగా మారింది.
'ఇన్-ఆర్బిట్ డెలివరీ' వ్యూహం.. గ్రౌండ్ స్టేషన్లు సైతం!
విదేశాలకు ఎవరికీ అనుమానం రాకుండా ఉపగ్రహాలను అప్పగించేందుకు చైనా 'ఇన్-ఆర్బిట్ డెలివరీ' అనే పక్కా పద్ధతిని వాడుతోంది. అంటే, స్వదేశంలో ప్రయోగించిన ఉపగ్రహాలను అంతరిక్షంలో విజయవంతంగా కక్ష్యలోకి చేర్చిన తర్వాత మాత్రమే వాటి కంట్రోల్ను విదేశీ కొనుగోలుదారులకు బదిలీ చేస్తుంది. సరిగ్గా ఇదే పద్ధతిలో ఇరాన్ కమాండర్ల చేతికి ఈ ఉపగ్రహం వెళ్లింది. దీంతో ఆ ప్రాంతంలోని కీలకమైన అమెరికా సైనిక స్థావరాలపై నిరంతరం నిఘా ఉంచే బాధ్యతను ఇరాన్ ఈ ఉపగ్రహానికి అప్పగించింది.
ఈ చీకటి ఒప్పందంలో భాగంగా, ఆసియా, లాటిన్ అమెరికా సహా పలు ఇతర ప్రాంతాలలో నెట్వర్క్ కార్యకలాపాలు నిర్వహిస్తున్న చైనా ఆధారిత 'ఎంపోసాట్' (Emposat) నడుపుతున్న వాణిజ్య గ్రౌండ్ స్టేషన్ల యాక్సెస్ను కూడా ఇరాన్లోని ఐఆరీజీసీ దళాలకు చైనా కల్పించడం గమనార్హం.
నిఘా పెట్టిన మరుక్షణమే.. బూడిదైన అమెరికా స్థావరాలు!
ఈ ఎస్-టైపు చైనా ఉపగ్రహం మార్చి 13, 14, 15 తేదీల్లో సౌదీ అరేబియాలోని ప్రిన్స్ సుల్తాన్ వైమానిక స్థావరం ఫోటోలను అత్యంత స్పష్టంగా చిత్రీకరించినట్లు సమాచారం. ఆ ఫోటోలు అందిన వెంటనే, సరిగ్గా మార్చి 14వ తేదీన ఆ వైమానిక స్థావరంలోని అమెరికా యుద్ధ విమానాలపై ఇరాన్ భీకర దాడులు చేసి ధ్వంసం చేసింది. ఈ విషయాన్ని స్వయంగా డొనాల్డ్ ట్రంప్ సైతం అంగీకరించక తప్పలేదు.
ఇది కేవలం సౌదీకే పరిమితం కాలేదు. జోర్డాన్లోని మువాఫక్ సల్తీ ఎయిర్ బేస్, బహ్రెయిన్ రాజధాని మనమాలో ఉన్న అమెరికా ఫిఫ్త్ ఫ్లీట్ నావల్ హెడ్ క్వార్టర్స్ సమీప ప్రాంతాలు, అలాగే ఇరాక్లోని ఎర్బిల్ ఎయిర్పోర్ట్ లాంటి కీలక ప్రాంతాలను కూడా ఈ TEE-01B ఉపగ్రహం పర్యవేక్షించింది. అది నిఘా పెట్టిన కొద్ది క్షణాల్లోనే వాటిపై ఇరాన్ దాడులు చేసినట్టు ప్రకటించడం వెనుక ఎంతటి పక్కా స్కెచ్ ఉందో అర్థం చేసుకోవచ్చు.
పౌర మౌలిక సదుపాయాలపై గురి.. పశ్చిమ దేశాల ఆందోళన
కేవలం అమెరికా సైనిక స్థావరాలే కాకుండా.. యునైటెడ్ అరబ్ ఎమిరైట్స్లోని ఖోర్ ఫకన్ కంటెయినర్ పోర్టు, క్విదఫా విద్యుత్ డీసాల్టినేషన్ ప్లాంట్, ప్రపంచంలోనే అతిపెద్ద అల్యూమినియం ప్లాంట్లలో ఒకటైన బహ్రెయిన్లోని అల్బా ప్లాంట్ లాంటి గల్ఫ్ దేశాల పౌర మౌలిక సదుపాయాలను కూడా ఇది నిశితంగా గమనించింది.
దీనిపై పశ్చిమ దేశాలకు చెందిన ఓ మాజీ నిఘా అధికారి సంచలన వ్యాఖ్యలు చేశారు. బీజింగ్ ప్రభుత్వ అధికారిక అనుమతి లేకుండా ఏ చైనా ప్రైవేట్ సంస్థ కూడా ఇటువంటి ఉపగ్రహాన్ని ఎట్టిపరిస్థితుల్లోనూ ప్రయోగించలేదని ఆయన స్పష్టం చేశారు. నేరుగా తమ ప్రమేయం ఎక్కడా బయటపడకుండా అన్ని జాగ్రత్తలు తీసుకుంటూనే, ఇరాన్కు చైనా ఈ నిఘా సమాచారాన్ని అందిస్తోందన్నది కొంతకాలంగా స్పష్టమవుతోందని ఆయన తేల్చి చెప్పారు.
వణుకుతున్న గల్ఫ్.. రష్యా కూడా రంగంలోకి!
ఇరాన్ తన పొరుగు దేశాలపై పదేపదే భయంకరమైన క్షిపణులు, డ్రోన్లతో దాడులు చేస్తున్న ఈ విపత్కర వేళ.. దానికి చైనా ఉపగ్రహ సమాచారాన్ని ఉపయోగించినట్లు వచ్చిన నివేదికలు ఇప్పుడు గల్ఫ్ వ్యాప్తంగా తీవ్ర ఆందోళనలను పెంచుతున్నాయి. గల్ఫ్ ప్రాంతంలో చైనాకు ఉన్న బలమైన ఆర్థిక సంబంధాల వల్ల ఈ పరిణామం మరింత ప్రాధాన్యత సంతరించుకుంది. ఇదిలా ఉండగా, ఫిబ్రవరి 28న ఇరాన్పై దాడులు ప్రారంభమైన తర్వాత అమెరికా, ఇజ్రాయెల్ లక్ష్యాలపై రష్యా ఉపగ్రహ నిఘా సమాచారాన్ని కూడా ఇరాన్ భారీగా పొందినట్టు గత నివేదికలు సూచించాయి.
అయితే, ఇరాన్కు తాము సైనిక, నిఘా మద్దతు ఇస్తున్నామనే ప్రచారాన్ని చైనా పదేపదే ఖండిస్తూ నాటకాలాడుతోంది. కానీ అమెరికా మాత్రం చాలా కాలంగా ఇరాన్ బాలిస్టిక్ క్షిపణి కార్యక్రమానికి చైనా మద్దతు ఇస్తోందని, వాటి తయారీకి ఉపయోగపడే కీలకమైన విడిభాగాలను అందజేస్తోందని బలంగా ఆరోపిస్తోంది.
అగ్రరాజ్యాల మధ్య సాగుతున్న ఈ అంతరిక్ష గూఢచర్యం.. భూమ్మీద మూడో ప్రపంచ యుద్ధానికి ఆజ్యం పోస్తోంది. ఆకాశంలో కదిలే ప్రతి చైనా ఉపగ్రహం వెనుక అమెరికా వినాశనానికి ఇరాన్ వేస్తున్న పక్కా స్కెచ్ దాగి ఉండటం ఇప్పుడు గ్లోబల్ వార్ కు సరికొత్త నిర్వచనం ఇస్తోంది. ప్రత్యక్ష యుద్ధం కంటే పరోక్షంగా శత్రువుకు దొరుకుతున్న ఈ సాంకేతిక బలమే ఇప్పుడు డొనాల్డ్ ట్రంప్ను నిద్రపోనివ్వడం లేదు!
