భాగ్యనగరంలో 'హైడ్రా' పేరు వింటేనే అక్రమార్కుల గుండెల్లో రైళ్లు పరిగెడుతున్నాయి. బుల్డోజర్ల చప్పుడు వింటే కబ్జాదారుల వెన్నులో వణుకు పుడుతోంది. ఇదే సమయంలో సామాన్యుల్లోనూ తమ ఇళ్లు, ప్లాట్ల పరిస్థితి ఏంటన్న ఆందోళన తీవ్రస్థాయిలో నెలకొంది. ఈ ఉత్కంఠకు, భయాలకు శాశ్వత చెక్ పెడుతూ గ్రేటర్ హైదరాబాద్ వాసులకు 'హైడ్రా' ఒక అతిపెద్ద తీపికబురు అందించింది. ఎవరెన్ని వదంతులు సృష్టించినా సామాన్యుడి సొంతింటి కలను తాము కూల్చబోమని స్పష్టం చేస్తూ హైడ్రా ఒక సంచలన ప్రకటన విడుదల చేసింది.
ఆ ఇళ్లు, ప్లాట్ల జోలికి అస్సలు వెళ్లం!
గ్రేటర్ హైదరాబాద్ పరిధిలోని యూఎల్సీ (అర్బన్ ల్యాండ్ సీలింగ్) భూముల్లోని పాత లేఔట్లలో ఇళ్లు నిర్మించుకున్నా.. లేదా భవిష్యత్తు కోసం ఖాళీ ప్లాట్లు కొనుక్కున్నా.. ఎట్టి పరిస్థితుల్లోనూ వాటి జోలికి హైడ్రా వెళ్లదని అధికారికంగా స్పష్టం చేసింది. యూఎల్సీ భూముల్లోని ఆ పాత లే అవుట్లలో ప్లాట్లు రెగ్యులరైజ్ కాకపోయినా సరే, ఆ ఖాళీ ప్లాట్లపై తాము ఎలాంటి కూల్చివేత చర్యలు తీసుకోబోమని ప్రజలకు కొండంత భరోసా ఇచ్చింది. హైడ్రా ఏర్పడటానికి ముందు అంటే జులై 19, 2024 కంటే ముందు నిర్మించిన నివాసాలను ఎట్టి పరిస్థితుల్లోనూ కూల్చబోమని ఇప్పటికే పలుమార్లు చెప్పిన విషయాన్ని మరోసారి గట్టిగా గుర్తు చేసింది. రాష్ట్ర ప్రభుత్వ నిర్ణయం మేరకే హైడ్రా ఈ విధానాన్ని తూచా తప్పకుండా కొనసాగిస్తోందని వెల్లడించింది.
తక్కువ ధరకు కొట్టేసే కుట్ర.. ఆ ఫేక్ ప్రచారం నమ్మొద్దు!
హైడ్రా దాడుల భయాన్ని క్యాష్ చేసుకోవడానికి కొందరు బడా కబ్జాదారులు పక్కా స్కెచ్ వేశారు. యూఎల్సీ భూముల్లోని లే అవుట్లలో రెగ్యులరైజ్ కాని ప్లాట్లను హైడ్రా తీసుకుని నేరుగా ప్రభుత్వానికి అప్పగిస్తుందని.. సామాన్యులను భయభ్రాంతులకు గురిచేస్తూ తీవ్రమైన దుష్ప్రచారం చేస్తున్నారు.
హైడ్రా పేరు చెప్పి భయపెట్టి, మీ సొంత ఇంటి స్థలాన్ని కారుచౌకగా, తక్కువ ధరకు సొంతం చేసుకోవాలనే అతిపెద్ద కుట్రకోణం దీని వెనుక దాగి ఉందని, ప్రజలు ఈ వాస్తవాన్ని గ్రహించాలని హైడ్రా సూచించింది. యూఎల్సీ భూముల్లో వెలసిన లే అవుట్లలో ఖాళీగా ఉన్న ప్లాట్లను ఎవరైనా ఆక్రమించుకునేందుకు ప్రయత్నిస్తే వారి మాటలను అస్సలు నమ్మవద్దని నగర ప్రజలను కోరింది. ఈ విషయంలో ఏ చిన్న సందేహం ఉన్నా.. ఎవరి మాటలో వినకుండా నేరుగా హైడ్రా కార్యాలయానికి వచ్చి తమ అనుమానాలు నివృత్తి చేసుకోవాలని అధికారులే స్వయంగా ఆహ్వానిస్తున్నారు.
మా టార్గెట్ ఒక్కటే.. ఆక్రమణలకు చెక్!
హైడ్రా అసలు లక్ష్యం పేదవాడి ఇళ్లు కాదు.. ప్రజా ఆస్తులను దోచుకుంటున్న కబ్జాదారులే! లే అవుట్ల నిబంధనల ప్రకారం వేసిన రహదారులు, పచ్చని పార్కులు, ప్రజా అవసరాలకు ఉద్దేశించిన కమ్యూనిటీ స్థలాలు ఆక్రమణల పాలు కాకుండా హైడ్రా కంటికి రెప్పలా కాపాడుతుందని మరోసారి స్పష్టం చేసింది. ఈ మధ్య కాలంలో శేరిలింగంపల్లి మండలం కొండాపూర్ గ్రామంలోని పలు యూఎల్సీ భూముల్లో వేసిన లే అవుట్లలో పార్కులు, రహదారులు, ప్రజా అవసరాలకు ఉద్దేశించిన స్థలాల ఆక్రమణలను మాత్రమే తాము తొలగించామని హైడ్రా వివరించింది.
కొండాపూర్ గ్రామంలోని రాజరాజేశ్వరనగర్, ఓయూ కాలనీ, రాఘవేంద్ర కాలనీలోని పార్కులు, ఇతర ప్రజా స్థలాల ఆక్రమణల తొలగింపే తమ పారదర్శకతకు సజీవ నిదర్శనమని హైడ్రా గుర్తు చేసింది. కూకట్పల్లి మండలం హైదర్నగర్లోని యూఎల్సీ భూముల్లో వెలసిన గోపాల్నగర్ లే అవుట్లో ఆక్రమణకు గురైన పార్కును కూడా సరిగ్గా ఇదే మాదిరిగా హైడ్రా కాపాడి ప్రజలకు అప్పగించింది.
రెండు నెలల్లో చెరువులకు కొత్త కళ.. రంగంలోకి రంగనాథ్!
హైదరాబాద్ మహానగరంలో కనుమరుగవుతున్న చెరువులకు పూర్వ వైభవం తీసుకురావడంపై హైడ్రా ప్రత్యేక దృష్టి సారించింది. చెరువుల చుట్టూ ఉన్న ప్రభుత్వ భూముల గురించి పూర్తి స్థాయిలో లోతైన విచారణ జరిపి.. వాటిని తక్షణమే స్వాధీనం చేసుకుని చెరువు అభివృద్ధిలో భాగం చేయాలని అధికారులను హైడ్రా కమిషనర్ ఏవీ రంగనాథ్ కఠినంగా ఆదేశించారు. శనివారం నాడు మాదాపూర్లోని తమ్మిడికుంటతో పాటు సున్నం చెరువును ఆయన స్వయంగా సందర్శించారు.
అక్కడ చెరువుల పునరుద్ధరణ పనులు జరుగుతున్న తీరును ఆయన క్షేత్ర స్థాయిలో నిశితంగా పరిశీలించి.. అధికారులకు కీలకమైన ఆదేశాలు జారీ చేశారు. యుద్ధ ప్రాతిపదికన కేవలం రెండు నెలల్లోనే ఈ చెరువుల అభివృద్ధి పనులు పూర్తి చేయాలని డెడ్ లైన్ విధించారు. చెరువుల చుట్టూ తిష్టవేసిన ఆక్రమణదారుల పత్రాలను క్షుణ్ణంగా పరిశీలించి కఠిన చర్యలు తీసుకోవాలని ఆదేశించారు. అంగుళం ప్రభుత్వ భూమి కూడా అన్యాక్రాంతం కాకుండా ఉక్కుపాదం మోపి కాపాడాలని దిశానిర్దేశం చేశారు.
ప్రజా ఆస్తులను రక్షించడం, పచ్చటి చెరువులకు ప్రాణం పోయడమే లక్ష్యంగా హైడ్రా వేస్తున్న ఈ ఉక్కు అడుగులు.. భాగ్యనగర భవిష్యత్తు ముఖచిత్రాన్ని మార్చేయబోతున్నాయి అనడంలో ఎలాంటి సందేహం లేదు!
Also Read:
Singareni Workers : సింగరేణిపై ఏసీబీ విచారణా? భట్టి విక్రమార్కపై కవిత ఫైర్!Fridge Blast: నిర్మల్లో ఫ్రిడ్జ్ పేలి ఇద్దరు మృతి
Greenfield Highway: కొత్త గ్రీన్ఫీల్డ్ హైవేతో ఇక సూపర్ ఫాస్ట్ జర్నీ!
TGSRTC Bus Terminal: గాజులరామారంలో 100 ఎకరాల టెర్మినల్
Hyderabad Drug Bust: తారామతి రిసార్ట్పై ఈగల్ దాడి!
