పాత భవనాల్లోకి అడుగుపెట్టగానే ఏదో తెలియని భయం మిమ్మల్ని వెన్నాడుతోందా? చుట్టూ ఎవరూ లేకపోయినా ఎవరో పక్కనే ఉన్నారన్న వణుకు పుడుతోందా? అయితే మీరు దెయ్యాల గురించి భయపడాల్సిన అవసరం లేదు. ఈ భయం వెనుక ఉన్న అసలు వాస్తవం తెలిస్తే మీరు కచ్చితంగా ఆశ్చర్యపోతారు. ఇది దెయ్యాల పనే కాదు.. కంటికి కనిపించని, చెవికి వినిపించని ఒక శాస్త్రీయ కారణం మీ మానసిక ప్రశాంతతను ఎలా దెబ్బతీస్తుందో ప్రతి సామాన్యుడూ తెలుసుకోవాల్సిన కఠోర వాస్తవం ఇది!
దెయ్యాలు కాదు.. ఇదంతా 'ఇన్ఫ్రాసౌండ్' మాయ!
Scientists Reveal How Infrasound In Old Buildings Triggers Stress And Ghostly Feelings : ప్రతిష్టాత్మక సైన్స్ జర్నల్ 'ఫ్రాంటియర్స్ ఇన్ బిహేవియరల్ న్యూరోసైన్స్' (Frontiers in Behavioral Neuroscience) తాజాగా వెల్లడించిన నిజాలు దెయ్యాల కథలను పూర్తిగా తలకిందులు చేస్తున్నాయి. పాత భవనాల్లో తలెత్తే ఈ భయానక భావనకు 'ఇన్ఫ్రాసౌండ్' (Infrasound) అని పిలిచే అత్యంత తక్కువ పౌనఃపున్యం కలిగిన శబ్ద తరంగాలే ప్రధాన కారణమని శాస్త్రవేత్తలు తేల్చిచెప్పారు.
ఈ శబ్దాలు మన చెవికి అస్సలు వినిపించవు. కానీ అవి అదృశ్యంగానే మన శరీరంలోని ఒత్తిడి స్థాయిలను అమాంతం పెంచేసి, మన మూడ్ను పూర్తిగా డల్ చేస్తాయి.
అడ్డుగోడలను ఛేదించే సైలెంట్ వైబ్రేషన్స్!
సాధారణంగా 20 హెర్ట్జ్ (Hertz) కంటే తక్కువ స్థాయిలో ఉండే శబ్దాలను ఇన్ఫ్రాసౌండ్ అంటారు. ఇవి మనుషుల చెవులకు వినిపించే స్థాయి కంటే చాలా తక్కువ. చెవికి వినిపించకపోయినా, ఈ ప్రకంపనలు ఎంతటి మందపాటి గోడలనైనా, అడ్డంకులనైనా అత్యంత సునాయాసంగా చొచ్చుకుని పోగలవు.
పాత ఇళ్లలో ఉండే పైపులు, అరిగిపోయిన వెంటిలేషన్ సిస్టమ్స్, పారిశ్రామిక యంత్రాలు ఇలాంటి ఇన్ఫ్రాసౌండ్ను నిరంతరం ఉత్పత్తి చేస్తూనే ఉంటాయి. అలాగే తుఫాన్లు, భూకంపాలు, అగ్నిపర్వతాలు బద్దలైనప్పుడు మరియు ఆకాశంలో అరోరాలు (నార్తర్న్ లైట్స్) ఏర్పడినప్పుడు కూడా ప్రకృతిలో సహజంగానే ఇలాంటి శబ్దాలు ఉద్భవిస్తాయి.
మానసిక భ్రమే.. పారానార్మల్ ఆక్టివిటీ
కెనడాలోని మాక్ఈవాన్ (MacEwan) యూనివర్సిటీకి చెందిన మనస్తత్వ శాస్త్రవేత్త, ఈ పరిశోధన సీనియర్ రచయిత రాడ్నీ ష్మాల్ట్జ్ ఈ విషయంపై సంచలన నిజాలు వెల్లడించారు. పాత భవనాలు లేదా దెయ్యాలు ఉన్నాయని ప్రచారంలో ఉన్న ఇళ్లలోకి వెళ్లినప్పుడు.. అక్కడి పాత పైపులు, వెంటిలేషన్ నుంచి వచ్చే ఇన్ఫ్రాసౌండ్ కారణంగానే ఆ తెలియని ఆందోళన కలుగుతుందని ఆయన స్పష్టం చేశారు.
ముందే ఆ ఇంట్లో దెయ్యం ఉందన్న అపోహతో ఉన్నవారు, ఆ శబ్దాల వల్ల కలిగే శారీరక అసౌకర్యాన్ని చూసి నిజంగానే దెయ్యం ఉందని భ్రమపడతారని ఆయన కుండబద్దలు కొట్టారు.
36 మందిపై సంచలన ప్రయోగం.. పెరిగిన కార్టిసాల్!
ఈ ప్రభావాన్ని ప్రాక్టికల్గా నిరూపించేందుకు పరిశోధన బృందం ఒక అద్భుతమైన ప్రయోగం చేసింది. 36 మంది అండర్ గ్రాడ్యుయేట్ విద్యార్థులను ఒక గదిలో ఒంటరిగా కూర్చోబెట్టి, వారికి ప్రశాంతమైన లేదా ఆందోళన కలిగించే సంగీతాన్ని వినిపించారు. కానీ వారిలో సగం మందికి మాత్రం, వారికి తెలియకుండానే దాచిన సబ్వూఫర్ల ద్వారా 18 హెర్ట్జ్ స్థాయి ఉన్న ఇన్ఫ్రాసౌండ్ను ప్లే చేశారు.
ప్రయోగం పూర్తయ్యాక వారి మానసిక స్థితిని అంచనా వేస్తూ సర్వే చేయించారు. అంతేకాకుండా వారి లాలాజల నమూనాలను సేకరించి కార్టిసాల్ (Cortisol) స్థాయిలను కొలిచారు. కార్టిసాల్ అనేది మన శరీరం ఒత్తిడికి గురైనప్పుడు విడుదల చేసే ఒక హార్మోన్.
ఊహించని ఫలితాలు.. మేల్కొన్న ప్రాచీన అలారం!
ఈ ప్రయోగం ఫలితాలు అందరినీ విస్మయానికి గురిచేశాయి. ఇన్ఫ్రాసౌండ్ ప్రభావానికి గురైన విద్యార్థులు.. తాము ఎంతో చిరాకుగా, అసౌకర్యంగా ఫీల్ అయ్యామని చెప్పారు. వారు విన్నది ప్రశాంతమైన మ్యూజిక్ అయినప్పటికీ, అది వారికి చాలా బాధాకరంగా, విషాదంగా అనిపించింది.
ముఖ్యంగా, ఆ శబ్దాలు వినని వారితో పోలిస్తే వీరిలో 'కార్టిసాల్' హార్మోన్ భారీగా పెరిగిపోయినట్లు వైద్య పరీక్షల్లో తేలింది. ఆశ్చర్యకరమైన విషయం ఏమిటంటే, ఆ గదిలో ఇన్ఫ్రాసౌండ్ ప్లే అయినట్లు ఏ ఒక్క విద్యార్థీ పసిగట్టలేకపోయాడు. అల్బెర్టా యూనివర్సిటీకి చెందిన న్యూరోసైంటిస్ట్, ప్రధాన రచయిత కాలే స్కాటెర్టీ (Kale Scatterty) ఈ ఫలితాలపై విశ్లేషణ చేస్తూ.. ఇన్ఫ్రాసౌండ్ ఊహించిన దానికంటే చాలా రెట్లు ఎక్కువగా మనిషిలోని చిరాకును, కార్టిసాల్ను పెంచిందని స్పష్టం చేశారు.
భూకంపాలు, సునామీలు వచ్చే ముందు జంతువులు వింతగా ప్రవర్తించినట్లే.. మనుషుల మెదడు కూడా ఇలాంటి శబ్దాలు రాగానే ప్రమాదాన్ని పసిగట్టి అప్రమత్తం అయ్యేలా రూపొంది ఉంటుందని పరిశోధకులు బలంగా నమ్ముతున్నారు. దెయ్యం ఉందన్న ఫీలింగ్.. వాస్తవానికి మన శరీరంలోని ప్రాచీన 'అలారం సిస్టమ్' ట్రిగ్గర్ అవ్వడం వల్లే కలుగుతుంది!
నిత్యం ఇంట్లో గానీ, ఆఫీసులో గానీ మీకు తెలియని చిరాకు, అలసట, నెగెటివ్ ఆలోచనలు వస్తున్నాయంటే దానికి కారణం మీ చుట్టూ ఉన్న పాత భవనాలే కావొచ్చు! ఈ సైలెంట్ వైబ్రేషన్స్ మీ మానసిక ఆరోగ్యాన్ని ఎలా దెబ్బతీస్తాయో ఈ అధ్యయనం తేల్చిచెప్పింది. కాబట్టి పాత ఇళ్లలో నివసించేవారు వెంటిలేషన్ సిస్టమ్స్, పాత పైపులను ఎప్పటికప్పుడు బాగుచేయించుకోవడం ఉత్తమం. ఈ ప్రయోగంలో చిన్న శాంపిల్ సైజ్ ఉన్నా, రాబోయే రోజుల్లో భవన నిర్మాణాల డిజైన్లను, నాయిస్ రెగ్యులేషన్స్ను (శబ్ద కాలుష్య నిబంధనలు) ఈ నిజాలు సమూలంగా మార్చేయడం ఖాయం!
Also Read:
Artemis II Mission | చరిత్ర సృష్టించిన నాసా: భూమికి చేరుకున్న ఆర్టెమిస్-2 వ్యోమగాములుగంటకు 38వేల కి.మీ వేగం: జాబిల్లి వైపు ఆర్టెమిస్-2 పరుగులు!
What If : భూమికి గురుత్వాకర్షణ లేకపోతే ఏమవుతుంది?
మరణం తర్వాత జీవితం.. సైన్స్ ఏం చెబుతోంది?
What If Scenario : నదులు సముద్రానికి దారి మరచిపోతే ఏమవుతుంది? | Rivers and Oceans
