ప్రపంచం మొత్తం ఇప్పుడు ఊపిరి బిగబట్టి చూస్తోంది. ఒకవైపు గడియారం ముల్లు కదులుతుంటే.. మరోవైపు పశ్చిమాసియాలో ఏ క్షణాన ఏం జరుగుతుందో తెలియని ఉత్కంఠ గుండెల్ని పిండేస్తోంది. పాకిస్థాన్ మధ్యవర్తిత్వంతో ఇస్లామాబాద్ వేదికగా జరిగిన శాంతి చర్చలు దారుణంగా విఫలం కావడంతో మూడో ప్రపంచ యుద్ధం ఖాయమనుకున్న తరుణంలో.. తెరపైకి మరో సంచలన పరిణామం దూసుకొచ్చింది. ఏప్రిల్ 21న ముగియనున్న రెండు వారాల కాల్పుల విరమణ గడువు సమీపిస్తున్న కొద్దీ.. అగ్రరాజ్యం అమెరికా, ఇరాన్ల మధ్య మరోసారి తెరవెనుక భీకర దౌత్య మథనం మొదలైంది. అసలు ఇప్పుడు తెర వెనుక ఏం జరగబోతోంది?
దిగివస్తేనే చర్చలు.. డెడ్లైన్కు ముందే డీల్!
ఇరు దేశాల మధ్య ఈ వారాంతంలో మరో విడత ప్రత్యక్ష చర్చలు జరిగే అవకాశం ఉన్నట్లు అంతర్జాతీయ మీడియా నివేదికలు ఇప్పుడు బాంబు పేల్చాయి. అమెరికా పెట్టిన డిమాండ్లకు లొంగిపోవడానికి ఇరాన్ గనక సిద్ధంగా ఉందని భావిస్తే, వెంటనే ప్రత్యక్ష చర్చలను తిరిగి ప్రారంభించడానికి అమెరికా అధ్యక్షుడు డొనాల్డ్ ట్రంప్ సుముఖంగా ఉన్నట్లు ఆ నివేదికలు కుండబద్దలు కొట్టాయి.
సరిగ్గా ఏప్రిల్ 21న కాల్పుల విరమణ గడువు ముగియక ముందే.. ఈ విధ్వంసకర యుద్ధానికి ముగింపు పలికేలా ఒక ఒప్పందానికి రావాలని అమెరికా, ఇరాన్లు తీవ్రంగా ఆలోచిస్తున్నాయని విశ్వసనీయ వర్గాలను ఉటంకిస్తూ 'అసోసియేటెడ్ ప్రెస్' (AP) సంచలన రిపోర్ట్ ఇచ్చింది.
మరో విడత చర్చల గురించి సంప్రదింపులు ఇంకా కొనసాగుతూనే ఉన్నాయని ముగ్గురు కీలక వ్యక్తులు వెల్లడించారు. ఈ సరికొత్త దౌత్య భేటీకి టెహ్రాన్, వాషింగ్టన్ రెండు దేశాలు అంగీకరించాయని మధ్యవర్తిత్వం వహిస్తున్న దేశానికి చెందిన ఒక దౌత్యవేత్త అధికారికంగా స్పష్టం చేశారు.
వేదిక ఎక్కడ? వాళ్లే అడిగారన్న ట్రంప్!
అయితే ఇస్లామాబాద్లో జరిగిన మొదటి దఫా చర్చల్లో పాల్గొన్న ప్రతినిధి బృందమే ఈసారి కూడా హాజరవుతుందా? లేదా? అన్నది మాత్రం ఇంకా అస్పష్టంగా ఉందని దౌత్యవేత్తలతో పాటు అమెరికా అధికారులు తెలిపారు.
తాజా సమాచారం ప్రకారం.. ఈ రెండో విడత భేటీకి వేదికలుగా ఇస్లామాబాద్, ఇస్తాంబుల్, జెనీవా నగరాలు పరిశీలనలో ఉన్నాయి. వేదిక, కచ్చితమైన సమయం ఇంకా నిర్ణయించకపోయినా.. ఈ కీలక చర్చలు గురువారం జరిగే అవకాశం ఉందని ఒక అమెరికా ఉన్నతాధికారి హింట్ ఇచ్చారు.
దీనికి ముందే డొనాల్డ్ ట్రంప్ విలేకరులతో మాట్లాడుతూ ఒక మైండ్ బ్లాంక్ అయ్యే విషయాన్ని లీక్ చేశారు. "అవతలి పక్షమే మమ్మల్ని స్వయంగా చర్చలకు ఆహ్వానించింది.. వారే ఇప్పుడు ఒక ఒప్పందం కుదుర్చుకోవాలని బలంగా కోరుకుంటున్నారు" అని ట్రంప్ సగర్వంగా ప్రకటించడం ఈ మొత్తం ఎపిసోడ్లో అత్యంత కీలకంగా మారింది.
బంతి ఇరాన్ కోర్టులోనే.. జేడీ వాన్స్ కామెంట్స్
ఇస్లామాబాద్ శాంతి చర్చల సందర్భంగా యుద్ధాన్ని ముగించడానికి అమెరికా తన వైపు నుంచి ఒక అడుగు ముందుకు వేసిందని, ఇక చర్చలను ముందుకు తీసుకెళ్లాల్సిన బాధ్యత పూర్తిగా ఇరాన్దేనని అగ్రరాజ్యం ఉపాధ్యక్షుడు జేడీ వాన్స్ స్పష్టం చేశారు.
ఆయన ఫాక్స్ న్యూస్తో మాట్లాడుతూ ఎన్నో ఆసక్తికర విషయాలు పంచుకున్నారు. "అక్కడి పరిస్థితులు పూర్తిగా చేజారిపోయాయని నేను ఏమాత్రం చెప్పను. కొన్ని విషయాలు చాలా సక్రమంగానే జరిగాయని నేను భావిస్తున్నాను. ఆ భేటీలో మేము చాలా పురోగతి సాధించాం" అని వాన్స్ బాంబు పేల్చారు.
"వారు కూడా మా దిశగా కొన్ని సానుకూల అడుగులు వేశారు.. అందుకే మాకు కొన్ని మంచి సంకేతాలు అందాయని మేము గట్టిగా చెప్పగలం. కానీ, ఒప్పందానికి చేరుకోవడానికి వారు తగినంత దూరం వెళ్లలేదు" అని అమెరికా ఉపాధ్యక్షుడు కుండబద్దలు కొట్టారు.
గత శనివారం ఇస్లామాబాద్ వేదికగా 47 ఏళ్ల సుదీర్ఘ విరామం తర్వాత అమెరికా, ఇరాన్ల మధ్య మొదటిసారి జరిగిన ఈ ప్రత్యక్ష చర్చలు.. ఎటువంటి తుది ఒప్పందం లేకుండానే ముగిసిన సంగతి తెలిసిందే.
అగ్రరాజ్యాల అహంకారానికీ, ఇరాన్ ఆధిపత్య పోరుకీ మధ్య నలిగిపోతున్న పశ్చిమాసియాకు ఈ గురువారం అత్యంత కీలకం! 47 ఏళ్ల శత్రుత్వం ఒక్క మీటింగ్లో సమసిపోదు, కానీ ఏప్రిల్ 21 డెడ్లైన్ అనే కత్తి రెండు దేశాల మెడల మీదా వేలాడుతోంది. ట్రంప్ చెబుతున్నట్లు ఇరాన్ నిజంగానే దిగివచ్చి డీల్ కుదుర్చుకుంటుందా? లేక ఇదంతా యుద్ధానికి ముందున్న ప్రశాంతతా? అంతిమ విజయం శాంతిదా, లేక వినాశనానిదా అన్నది రాబోయే కొద్ది గంటల్లో తేలిపోనుంది!
Also Read:
మూడో పక్షం జోక్యం వద్దు.. ఇరాన్ అంశంపై అమెరికాకు చైనా స్ట్రాంగ్ వార్నింగ్125 ఏళ్ల చరిత్రలో తొలిసారి: ఆస్ట్రేలియా ఆర్మీ చీఫ్గా మహిళ!
గూగుల్ ఏఐ ఎంత పని చేసింది.. వర్చువల్ భార్య కోసం యువకుడి ఆత్మహత్య!
రోజుకు రూ.4700 కోట్ల నష్టం.. అమెరికా దెబ్బకు చితికిపోతున్న ఇరాన్!
5 దేశాలకు ఇరాన్ దిమ్మతిరిగే వార్నింగ్: నష్టపరిహారం ఇవ్వాల్సిందే!
