బడి గంట మోగింది.. పుస్తకాల బరువు దించింది.. వేసవి సెలవులు వచ్చేశాయన్న ఆనందంతో మీ ఇంట్లో పిల్లలు గంతులేస్తున్నారా? అయితే, ఆ ఆనందం వెనుక పొంచి ఉన్న అదృశ్య మృత్యువు గురించి ప్రతి తల్లిదండ్రీ తక్షణమే తెలుసుకోవాలి! సెలవులు రాగానే పిల్లలను బంధువుల ఇళ్లకు పంపిస్తాం, లేదా వీధుల్లో స్నేహితులతో ఆడుకోమని స్వేచ్ఛగా వదిలేస్తాం. "మన కళ్లెదుటే ఆడుకుంటున్నారు కదా" అన్న ఆ ఒక్క చిన్న నిర్లక్ష్యం.. ఈ వేసవిలో ఎంతో మంది తల్లిదండ్రులకు జీవితకాలపు కడుపుకోతను మిగులుస్తోందన్న చేదు వాస్తవాన్ని మనం ఎందుకు విస్మరిస్తున్నాం?
వార్తలు మొత్తుకుంటున్నా.. మారని తీరు
వేసవి రాగానే అధికారుల నుంచి మీడియా వరకు "పిల్లల విషయంలో జాగ్రత్త" అని కోడై కూస్తుంటారు. ఎలాంటి ప్రమాదాలు పొంచి ఉన్నాయో పదే పదే హెచ్చరిస్తుంటారు. అయినా సరే, తెలుగు రాష్ట్రాల్లో ప్రతిరోజూ విషాదాలు చూస్తూనే ఉన్నాం.
ఎక్కడో ఒకచోట ఈతకు వెళ్లి ప్రాణాలు వదిలిన చిన్నారులు.. కుక్కల దాడిలో బలైపోయిన పసిప్రాణాలు.. ఈ వార్తలు రోజూ చూస్తూనే ఉన్నాం. మన పిల్లలు సేఫ్గానే ఉన్నారు కదా అని గుడ్డిగా నమ్మకండి. సరదాగా గడపాల్సిన సెలవులు.. జీవితాంతం వెంటాడే విషాద గుర్తులుగా మారకూడదంటే ప్రతిక్షణం అప్రమత్తంగా ఉండాల్సిందే.
నీటి అడుగున పొంచి ఉన్న మృత్యువు
ఎండలు మండిపోతుంటే పిల్లలకు ముందుగా గుర్తొచ్చేది స్విమ్మింగ్ పూల్స్, ఊరి చెరువులు, బావులు. స్నేహితులతో కలిసి ఆడుతూ పాడుతూ వెళ్లే ఆ ప్రయాణం.. పెద్దల పర్యవేక్షణ లేకపోతే మృత్యుఒడికి చేరుస్తుంది. నీటికి పిల్లల అమాయకత్వం తెలియదు.
ఈత వచ్చినా, రాకపోయినా.. కచ్చితంగా నైపుణ్యం ఉన్న పెద్దలు లేకుండా పిల్లలను నీటి దరిదాపులకు కూడా పంపొద్దు. తోడుగా వెళ్లేందుకు ఎవరూ లేకపోతే, అసలు పిల్లలను ఈతకే పంపకండి. ఒక పూట ఈత కొట్టకపోతే వచ్చే నష్టం లేదు, కానీ నీట మునిగితే ఆ ప్రాణాన్ని మళ్లీ తీసుకురాలేం!
ఎండల పిచ్చి.. వీధి కుక్కల ఉన్మాదం
ఈ ఎండల తీవ్రత కేవలం మనుషులనే కాదు, జంతువులనూ దారుణంగా దెబ్బతీస్తోంది. మండుతున్న ఎండలకు వీధి కుక్కలు మానసికంగా తీవ్రంగా డిస్టర్బ్ అయి, పిచ్చి పట్టినట్లు ప్రవర్తిస్తాయని వెటర్నరీ వైద్యులు బలంగా హెచ్చరిస్తున్నారు.
ఆడుకోవడానికే కదా అని గుంపులు గుంపులుగా ఉన్న వీధి కుక్కల మధ్యకు పిల్లలను ఒంటరిగా వదిలేస్తే.. రేపు జరగరాని ఘోరం జరిగితే ఆ బాధ్యత ఎవరిది? ఇప్పటికే ఎన్నో పసిప్రాణాలు వీధి కుక్కల కోరలకు బలైన విషాద ఘటనలు మన కళ్ల ముందే ఉన్నాయి. ఈ సీజన్లో పిల్లలపై కుక్కల దాడులు విపరీతంగా పెరిగిపోతున్నాయన్న వాస్తవాన్ని గ్రహించండి.
పిల్లలు అడిగారని వేల రూపాయలు పెట్టి ఖరీదైన బొమ్మలు కొనిస్తాం, సమ్మర్ క్యాంపులకు పంపిస్తాం.. కానీ వాళ్ల ప్రాణాలకు రక్షణ కవచంగా నిలబడాల్సిన కనీస బాధ్యతను మాత్రం గాలికి వదిలేస్తున్నాం. "మా పిల్లాడే కదా, స్నేహితులతోనే ఉన్నాడుగా ఏమవదులే" అనే అతివిశ్వాసమే మన పాలిట అసలైన శత్రువు. ఈ వేసవిలో మీ పిల్లలకు స్వేచ్ఛను ఇవ్వండి, కానీ అది మీ కనుసన్నల్లోనే, మీ పర్యవేక్షణలోనే ఉండేలా చూసుకోండి. మీ ఇంటి దీపం ఆరుబయట ఆడుకునేటప్పుడు కాస్త జాగ్రత్త.. ఎందుకంటే, గాలికి ఆరిపోయిన దీపాన్ని మళ్లీ వెలిగించగలం కానీ, నిర్లక్ష్యంతో దూరమైన ప్రాణాన్ని తిరిగి తేలేం!
Also Read:
మీలో టాలెంట్ ఉన్నా ఎందుకు వెనుకబడి ఉన్నారో తెలుసా? కారణం ఇదే!జీవితంలో ఎదురుదెబ్బ తగిలిందా? అయితే మళ్ళీ ఇలా బౌన్స్ బ్యాక్ అవ్వండి!
అతిగా ఆలోచించడం (Overthinking) ఆపడం ఎలా? సింపుల్ ట్రిక్స్
5 AM క్లబ్: ఉదయం 5 గంటలకే నిద్రలేస్తే జీవితం ఎలా మారుతుంది?
మోటివేషన్ కంటే సెల్ఫ్ డిసిప్లిన్ ఎందుకు గొప్పదో తెలుసా?
