బిడ్డ పుట్టగానే ఇంట్లో సంబురాలు మొదలవుతాయి. కానీ, ఆ సంతోషం నడుమ ఆసుపత్రిలో ప్రసవం జరిగిన కొన్ని గంటలకే పసికందు ఏడుస్తుంటే తల్లిదండ్రుల మనసు కలుక్కుమంటుంది. అప్పుడే పుట్టిన శిశువుకు ఒక ఇంజెక్షన్ ఎందుకు వేస్తున్నారని చాలామందికి సందేహం కలుగుతుంది. అయితే, అది సాధారణ టీకా కాదు.. ఆ నవజాత శిశువు ప్రాణాలను నిలబెట్టే ఒక అద్భుతమైన రక్షణ కవచం.
విటమిన్ K ఎందుకు అంత కీలకం?
సాధారణంగా మన శరీరంలో ఎక్కడైనా గాయమైతే రక్తం గడ్డకట్టడానికి విటమిన్ K అత్యంత అవసరం. కానీ, కొత్తగా పుట్టిన పిల్లల శరీరంలో ఈ విటమిన్ నిల్వలు దాదాపు శూన్యంగా ఉంటాయి. తల్లి గర్భంలో ఉన్నప్పుడు మాయ (ప్లాసెంటా) ద్వారా ఈ విటమిన్ తగినంతగా శిశువుకు చేరదు. అందుకే బిడ్డ భూమి మీద పడిన వెంటనే బయటి నుంచి దీనిని ఇంజెక్షన్ రూపంలో అందించాల్సి వస్తుంది.
నిర్లక్ష్యం చేస్తే మెదడుపై తీవ్ర ప్రభావం
ఒకవేళ అపోహలతో ఈ ఇంజెక్షన్ ఇవ్వకపోతే విటమిన్ K లోపం వల్ల 'విటమిన్ కె డెఫిషియెన్సీ బ్లీడింగ్' (VKDB) అనే ప్రాణాంతక పరిస్థితి తలెత్తవచ్చు. దీనివల్ల నవజాత శిశువు శరీరంలో ఎవరికీ తెలియకుండా అంతర్గత రక్తస్రావం జరుగుతుంది. ముఖ్యంగా మెదడులో లేదా పేగుల్లో రక్తం కారడం ప్రారంభమైతే అది శిశువు ప్రాణాలకే ముప్పుగా మారుతుందని, జీవితకాలం పాటు మెదడు దెబ్బతినే ప్రమాదం ఉందని వైద్య నిపుణులు తీవ్రంగా హెచ్చరిస్తున్నారు.
తల్లి పాలలో ఈ విటమిన్ దొరకదా?
తల్లి పాలు శిశువుకు అమృతం లాంటివి, అందులో ఎలాంటి సందేహం లేదు. కానీ, ప్రారంభ దశలో వచ్చే ముర్రుపాలలో విటమిన్ K తగినంత మోతాదులో ఉండదు. అలాగే, పెద్దవారిలో పేగుల్లో ఉండే కొన్నిరకాల మంచి బ్యాక్టీరియా సహజంగానే విటమిన్ K ను ఉత్పత్తి చేస్తుంది. నవజాత శిశువుల పేగుల్లో అప్పటికి ఆ బ్యాక్టీరియా వృద్ధి చెందకపోవడం వల్ల, తొలి రోజుల్లో బయటి నుంచే ఆ విటమిన్ ఇవ్వడం తప్పనిసరి అవుతుంది.
భవిష్యత్తుకు భరోసా.. తల్లిదండ్రుల బాధ్యత
కేవలం ఒకే ఒక్క విటమిన్ K ఇంజెక్షన్.. పసిప్రాయంలో పొంచి ఉన్న అతిపెద్ద ప్రమాదం నుంచి బిడ్డను కాపాడుతుంది. కొన్నిసార్లు అవగాహన లేక లేదా ఇంట్లోనే ప్రసవం జరిగినప్పుడు ఈ ఇంజెక్షన్ మిస్ అయ్యే ప్రమాదం ఉంటుంది. అందుకే, మీ బిడ్డకు ఈ రక్షణ కవచం అందిందో లేదో వైద్యులను అడిగి మరీ నిర్ధారించుకోవడం ప్రతి తల్లిదండ్రుల కనీస బాధ్యత. బిడ్డకు పూర్తి స్థాయి ఆరోగ్యాన్ని అందించడానికి ఇదే తొలి అడుగు.
Also Read:
గాఢ నిద్ర కోసం మ్యూజిక్ థెరపీ: నిద్ర మాత్రలకు ఇక సెలవు!చెవుల్లో ఎప్పుడూ కీచురాళ్ల రొద వినిపిస్తోందా? నిర్లక్ష్యం చేస్తే వినికిడి లోపం తప్పదు.. Tinnitus లక్షణాలు, చికిత్స!
నిశ్శబ్దంగా దాడి చేసే ప్రోస్టేట్ క్యాన్సర్: PSA Test ఎందుకు ముఖ్యం, నిపుణులు ఏమంటున్నారు?
చెడు కొలెస్ట్రాల్కు శాశ్వత చెక్! గుండెపోటు రాకుండా ఐఐటీ బాంబే శాస్త్రవేత్తల సరికొత్త ఆవిష్కరణ
