ఉరుకులు పరుగుల జీవితంలో ఉదయం లేచినప్పటి నుంచి రాత్రి పడుకునే వరకు ఏదో ఒక టార్గెట్ వెంట పరిగెత్తడం నేటి సమాజంలో మనకు అలవాటుగా మారిపోయింది. కానీ, 'హస్లింగ్' పేరుతో అదేపనిగా కష్టపడటం ఎప్పుడైనా మనల్ని శారీరకంగా, మానసికంగా కుంగదీస్తుందా? తాజాగా తీవ్రమైన తుంటి గాయంతో విశ్రాంతి తీసుకుంటున్న నేషనల్ క్రష్ రష్మిక మందన్న చేసిన వ్యాఖ్యలు ప్రతి సామాన్యుడిని ఆలోచింపజేస్తున్నాయి. క్షణం తీరిక లేకుండా పనిచేయడమే అసలైన జీవితం అనుకునే వారు, ఒకసారి చిన్న బ్రేక్ తీసుకుంటే కలిగే ప్రశాంతత ఎలాంటిదో రష్మిక మాటల్లోనే అర్థం చేసుకోవచ్చు.
[FEATURED_IMAGE]
'పుష్ప', 'యానిమల్' లాంటి వరుస బ్లాక్బస్టర్స్తో పాన్ ఇండియా రేంజ్లో స్టార్డమ్ ఎంజాయ్ చేస్తున్న రష్మిక.. 'మైసా' చిత్ర షూటింగ్ సమయంలో ఊహించని విధంగా గాయపడిన సంగతి తెలిసిందే. ప్రస్తుతం ఇంటికే పరిమితమైన ఆమె, ఈ బ్రేక్ వల్ల తన వ్యక్తిగత జీవితంపై తనకున్న దృక్పథం ఎలా మారిందో ఇన్స్టాగ్రామ్ వేదికగా అభిమానులతో పంచుకున్నారు. ఒకప్పుడు విరామం లేకుండా గంటల తరబడి పనిచేయడాన్ని ఎంతో ఇష్టపడిన తనకు, ఇప్పుడు ఆ తీవ్రమైన శ్రమ గురించి ఆలోచిస్తేనే భయం వేస్తోందని ఆమె ఓపెన్గా చెప్పారు.
అనుకోని పరిస్థితుల వల్ల జీవితంలో కాస్త వేగం తగ్గించాల్సి వచ్చినప్పుడు, బతుకు అంటే కేవలం పరుగెత్తడం మాత్రమే కాదని తనకు అర్థమైందని రష్మిక వెల్లడించారు. ఉదయం అలారం లేకుండా నిద్రలేవడం, పుస్తకాలు చదవడం, పజిల్స్ ఆడటం, ముఖ్యంగా తన పెంపుడు కుక్క 'ఆరా'తో సమయం గడపడం తన శరీరానికి, మనసుకు ఎంతో మేలు చేస్తుందని ఆమె వివరించారు. నిత్యం ఒత్తిడితో గడిపే వారు అప్పుడప్పుడు తమ పనులకు బ్రేక్ ఇవ్వడం ఏమాత్రం తప్పు కాదంటూ సమాజానికి ఒక మంచి సందేశాన్ని ఇచ్చారు.
రష్మిక చెప్పిన ఈ మాటలు కేవలం గ్లామర్ ఫీల్డ్లో ఉన్న సెలబ్రిటీలకే కాదు, ఈఎంఐలు, ఆఫీస్ టార్గెట్ల కోసం నిరంతరం మెషిన్లలా శ్రమిస్తున్న ప్రతి సామాన్యుడికి ఒక గొప్ప పాఠం. 'హస్టిల్ కల్చర్' పేరుతో నిద్రను, ఆరోగ్యాన్ని పణంగా పెట్టి పనిచేయడం లాంగ్ రన్లో అత్యంత ప్రమాదకరం. శరీరం అలిసిపోయినప్పుడు కచ్చితంగా దానికి విరామం ఇవ్వాలి. బ్రేక్ తీసుకోవడం అంటే జీవితంలో ఆగిపోవడం కాదు.. మనసుకు నచ్చిన పనులు చేస్తూ, మరింత వేగంగా ముందుకు వెళ్లడానికి రీఛార్జ్ అవ్వడమే అని రష్మిక ఉదంతం స్పష్టం చేస్తోంది.
