జ్వరమొచ్చిందని వీధి చివర ఉన్న క్లినిక్‌కి వెళ్తున్నారా? ఆ బోర్డు మీద ఉన్న పెద్ద డాక్టర్ పేరు చూసి గుడ్డిగా నమ్మేస్తే.. మీ ప్రాణాలకు మీరే స్వయంగా వెలకట్టుకున్నట్లే!
జనగామ జిల్లాలో ఇప్పుడు ప్రైవేటు వైద్యం ఒక భయంకరమైన మాఫియాగా అవతరించింది. రోగి ప్రాణాలను కాపాడటం కంటే, వారి రక్తం పీల్చి డబ్బు దండుకోవడమే ఏకైక లక్ష్యంగా ఈ దందా సాగుతోంది.
ఎలాంటి కనీస అర్హతలు, ప్రభుత్వ అనుమతులు లేకుండానే వీధికో క్లినిక్, సందుకో ల్యాబ్ పుట్టగొడుగుల్లా పుట్టుకొస్తున్నాయి. ఇటీవల జిల్లావ్యాప్తంగా క్వాక్ డాక్టర్లు (అర్హత లేని వ్యక్తులు) ఏకంగా శస్త్రచికిత్సలు చేసి అమాయకుల ప్రాణాలు తీస్తున్నా.. వైద్యారోగ్య శాఖ కనీసం నిద్ర కూడా లేవడం లేదు.
[FEATURED_IMAGE]బోర్డులపై సూపర్‌ స్పెషాలిటీ పేర్లు.. లోపల కాంపౌండర్ల సర్జరీలు
జనగామ జిల్లా కేంద్రంతో పాటు చుట్టుపక్కల పట్టణ ప్రాంతాల్లో భారీ ఫ్లెక్సీల మోసం జోరుగా సాగుతోంది. హైదరాబాద్, వరంగల్ లాంటి నగరాలకు చెందిన ప్రముఖ సర్జన్లు, సూపర్‌ స్పెషాలిటీ వైద్య నిపుణుల పేర్లతో ఆసుపత్రుల బోర్డులు దర్శనమిస్తాయి.
కానీ, తీరా లోపలికి వెళ్లి చూస్తే ఆ నిపుణులైన డాక్టర్ల జాడ ఎక్కడా కనిపించదు. ఆ బడా పేర్ల బోర్డులను అడ్డం పెట్టుకుని, ఏమాత్రం అర్హత లేని కాంపౌండర్లు, ఆర్‌‌ఎంపీ (RMP) డాక్టర్లు రోగుల శరీరాలను కోస్తూ సర్జరీలకు తెగబడుతున్నారు.
జనగామలో ప్రాణం తీసిన గర్భసంచి ఆపరేషన్
కొద్ది రోజుల క్రితం జనగామలో ఒక ప్రైవేటు వ్యక్తి నడుపుతున్న మెటర్నటీ ఆసుపత్రిలో జరిగిన దారుణమే ఈ మాఫియాకు సజీవ సాక్ష్యం. ఓ మహిళకు గర్భసంచి ఆపరేషన్ చేయగా, అది తీవ్రంగా వికటించి ఆమె అక్కడికక్కడే ప్రాణాలు వదిలింది.
దీనికి ప్రధాన కారణం.. ఆసుపత్రి బోర్డుపై ఉన్న సర్జన్ కాకుండా, కేవలం మత్తుమందు ఇచ్చే అనస్థీషియా డాక్టరే ఏకంగా ఆ శస్త్రచికిత్స చేయడం! ఈ దారుణం జరిగిన తర్వాత ఆసుపత్రి నిర్వాహకులు, ఆ డాక్టర్ కలిసి బాధితుల కుటుంబానికి కొంత డబ్బు ముట్టజెప్పి కేసును అత్యంత గుట్టుచప్పుడు కాకుండా మాఫీ చేసేశారు.
మెడికల్ షాపుల వెనుక బయటపడ్డ భయంకరమైన నిజాలు
గత నెల 24వ తేదీన స్టేషన్‌ఘన్‌పూర్‌ పట్టణంలో వైద్యారోగ్య శాఖ, ఔషధ నియంత్రణ శాఖ అధికారులు సంయుక్తంగా జరిపిన తనిఖీల్లో విస్తుపోయే నిజాలు వెలుగుచూశాయి. మెడికల్ షాపుల ముసుగులో జరుగుతున్న దారుణాలు ప్రజలను బెంబేలెత్తిస్తున్నాయి.
ఒక మెడికల్ దుకాణం వెనుక గదిలో ఎలాంటి అనుమతులు లేకుండా దొడ్డిదారిన ఏకంగా ఒక సీక్రెట్ క్లినిక్ నడుపుతున్నట్లు అధికారులు గుర్తించారు. మరో క్లినిక్‌లో ఎలాంటి లైసెన్సులు, కనీస నిబంధనలు పాటించకుండా రోగ నిర్ధారణ కేంద్రం (ల్యాబ్) ఏర్పాటు చేసి అమాయకుల రక్తంతో చెలగాటమాడుతున్నారు.
అనుమతులు లేని ఎక్స్-రేలు.. మొక్కుబడి నోటీసులు
మరొక కట్ల దవాఖానా (బోన్ సెట్టింగ్ క్లినిక్) లో దారుణం శృతిమించింది. అటామిక్ రెగ్యులేటరీ బోర్డ్ (ఏఈఆర్‌బీ) కనీస అనుమతులు లేకుండా, క్వాలిఫైడ్ టెక్నీషియన్లు లేకుండా ఎక్స్-రే యంత్రాన్ని ఇష్టారాజ్యంగా నడుపుతుండటంతో అధికారులు దాన్ని సీజ్ చేశారు.
ఇంత జరుగుతున్నా, కనీస అనుమతులు లేకుండా నడుస్తున్న ఆరు మెడికల్ దుకాణాలకు అధికారులు కేవలం 'షోకాజ్ నోటీసులు' ఇచ్చి చేతులు దులుపుకోవడం వారి నిర్లక్ష్యానికి అద్దం పడుతోంది. ఇప్పటికైనా జిల్లా కలెక్టర్ తక్షణమే స్పందించి, వైద్యాధికారులతో పకడ్బందీ తనిఖీలు చేయించి బాధ్యులపై కఠిన చర్యలు తీసుకోవాలని సామాన్యులు వేడుకుంటున్నారు.
ప్రభుత్వ అధికారులు ఎప్పుడు తనిఖీలు చేస్తారో, ఎప్పుడు చర్యలు తీసుకుంటారో అని ఎదురుచూస్తే మన ప్రాణాలకు మనమే ముప్పు తెచ్చుకున్నట్లు! ఆరోగ్యం విషయంలో గుడ్డి నమ్మకం పనికిరాదు. పెద్ద పెద్ద ఫ్లెక్సీలు, ఆకర్షణీయమైన బోర్డులు చూడగానే అది గొప్ప ఆసుపత్రి అని భ్రమపడకండి. మీ సొంత ఊర్లో, మీ వీధి చివర ఉన్న క్లినిక్‌లో మీకు వైద్యం చేసే డాక్టర్‌‌కు అసలు 'ఎంబీబీఎస్ (MBBS)' అర్హత ఉందా లేదా అని నిర్భయంగా అడగండి. కాంపౌండర్లు, ఆర్‌ఎంపీలు ఇచ్చే మందులు తాత్కాలిక ఉపశమనం ఇస్తాయేమో కానీ, సర్జరీలు చేసే స్థాయి వారికి లేదని గుర్తించండి. మీ ప్రాణం.. మీ బాధ్యత!
