మెగా డాటర్ నిహారిక కొణిదెల నిర్మాణంలో వస్తున్న సరికొత్త యూత్‌ఫుల్ ఎంటర్‌టైనర్‌కు 'పాకెట్ రాకెట్స్' అనే క్రేజీ టైటిల్‌ను ఫిక్స్ చేశారు. గ్యాంబ్లింగ్ నేపథ్యంలో తెరకెక్కుతున్న ఈ సినిమా ఫస్ట్ లుక్, కాన్సెప్ట్ పోస్టర్‌ను మేకర్స్ అఫీషియల్‌గా రిలీజ్ చేశారు. త్రినాథ్ వర్మ, శ్రియా కొంతం జంటగా నటిస్తుండగా.. సీనియర్ నటుడు జేడీ చక్రవర్తి ఓ కీలక పాత్ర పోషిస్తున్నారు. ఇప్పటికే షూటింగ్ పూర్తి చేసుకున్న ఈ ప్రాజెక్ట్ టీజర్ త్వరలోనే ప్రేక్షకుల ముందుకు రాబోతోంది.
[FEATURED_IMAGE]గ్యాంబ్లింగ్ ప్రపంచంలోకి కుర్రాడు
'కమిటీ కుర్రోళ్లు' లాంటి బ్లాక్ బస్టర్ హిట్ తర్వాత నిహారిక కొణిదెల తన పింక్ ఎలిఫెంట్ పిక్చర్స్, మాక్సిమం సిటీ స్టూడియోస్ బ్యానర్లపై నిర్మిస్తున్న తాజా చిత్రం 'పాకెట్ రాకెట్స్'. విదేశాల్లో పైచదువులు చదవాలనే కలతో ఓ యువకుడు డబ్బు కోసం గ్యాంబ్లింగ్ (జూదం) ప్రపంచంలోకి అడుగుపెట్టడం.. ఆ తర్వాత అతనికి ఎలాంటి సవాళ్లు ఎదురయ్యాయనే ఆసక్తికరమైన పాయింట్‌తో దర్శకుడు రుద్ర అత్రి ఈ చిత్రాన్ని ఉత్కంఠభరితంగా తెరకెక్కించారు.
జేడీ చక్రవర్తి పవర్ ఫుల్ రోల్
తాజాగా మేకర్స్ రిలీజ్ చేసిన టైటిల్, కాన్సెప్ట్ పోస్టర్ సినిమాపై మంచి బజ్‌ను క్రియేట్ చేస్తోంది. ఇందులో 'కమిటీ కుర్రోళ్లు' ఫేమ్ త్రినాథ్ వర్మ, నూతన నటుడు నిర్మల్ హీరోలుగా నటిస్తుండగా.. 'శుభం' బ్యూటీ శ్రియా కొంతం కథానాయికగా అలరించనుంది. ముఖ్యంగా ప్రముఖ నటుడు జేడీ చక్రవర్తి ఈ చిత్రంలో ఒక పవర్ ఫుల్ పాత్రలో కనిపించబోతుండటం సినిమాపై అంచనాలను పెంచుతోంది. అవసరాల శ్రీనివాస్ లాంటి టాలెంటెడ్ నటులు కూడా ఈ సినిమాలో భాగమయ్యారు.
సైలెంట్‌గా షూటింగ్ కంప్లీట్!
ఎలాంటి హడావుడి లేకుండా ఈ యూత్‌ఫుల్ ఎంటర్‌టైనర్ షూటింగ్‌ను చిత్ర యూనిట్ విజయవంతంగా పూర్తి చేసేసింది. ప్రస్తుతం పోస్ట్ ప్రొడక్షన్ పనులు శరవేగంగా జరుగుతున్నాయి. త్వరలోనే ఈ మూవీ అదిరిపోయే టీజర్‌తో పాటు రిలీజ్ డేట్‌ను కూడా అధికారికంగా ప్రకటించి, బాక్సాఫీస్ వద్ద తమ లక్‌ను పరీక్షించుకునేందుకు 'పాకెట్ రాకెట్స్' టీమ్ రెడీ అవుతోంది.
