ట్రెండ్స్ ఫాలో అవ్వడం వేరు.. ట్రెండ్ సెట్ చేయడం వేరు. పవర్ స్టార్ పవన్ కళ్యాణ్ స్టైల్ అంటేనే తెలుగు రాష్ట్రాల్లో యువతకు అదొక పిచ్చి. 20 ఏళ్ల క్రితం ఆయన వేసిన డబుల్ షర్టులు, కార్గో ప్యాంట్లు ఇప్పటికీ యూత్‌కు ఫేవరెట్ ఫ్యాషనే. అయితే 'బాలు' సినిమాలో ఆయన వేసుకున్న ఒక ప్యాంట్ గురించి అప్పట్లో ఊళ్లకు ఊళ్లు మాట్లాడుకున్నాయి. ఆ ప్యాంట్ ఖరీదు 70 వేలట కదా అని అప్పట్లో అందరూ ఆశ్చర్యపోయారు. ఇన్నేళ్ల తర్వాత ఆ ప్యాంట్ వెనుక ఉన్న ఒక మైండ్ బ్లోయింగ్ సీక్రెట్‌ను రేణు దేశాయ్ బయటపెట్టారు. ప్రపంచంలోనే కేవలం ఐదుగురి దగ్గర మాత్రమే ఉన్న ఆ అరుదైన ప్యాంట్ వెనుక ఉన్న రెండో ప్రపంచ యుద్ధం కథేంటో చూద్దాం.
[FEATURED_IMAGE]ఆ ప్యాంట్ ఖరీదు 70 వేలా?
పవన్ కళ్యాణ్ సినిమాల్లో కనిపించిన స్టైలింగ్ అంటే అప్పటి యువత ప్రాణం పెట్టేది. హూడీలు, కార్గో ప్యాంట్లు, ఒక షర్ట్ మీద మరో షర్ట్ వేయడం లాంటి ప్రయోగాలను ఆయన ఎంత క్యాజువల్‌గా పరిచయం చేశారో తెలిసిందే. అయితే ‘బాలు’ సినిమాలో పవన్ ధరించిన ప్యాంట్ మాత్రం అప్పట్లో విపరీతమైన చర్చకు దారితీసింది. ఆ ప్యాంట్ ధర ఏకంగా రూ.70 వేల వరకు ఉంటుందనే ప్రచారం అప్పట్లో జరిగింది.
రెండో ప్రపంచ యుద్ధం నాటి క్లాత్!
తాజాగా రేణు దేశాయ్ చేసిన వ్యాఖ్యలతో ఆ ప్యాంట్ వెనుక ఉన్న అసలు రహస్యం బయటపడింది. ‘బాలు’ సినిమా కోసం పవన్ స్టైలింగ్ విషయంలో ఆమె ప్రత్యేక శ్రద్ధ తీసుకున్నారట. ఆ సినిమాలో పవన్ వాడిన ప్యాంట్ సాధారణమైనది కాదని, అలాంటి ప్యాంట్లు ప్రపంచంలో కేవలం ఐదు మాత్రమే ఉన్నాయని రేణు దేశాయ్ వెల్లడించారు. రెండో ప్రపంచ యుద్ధం సమయంలో మిలిటరీ వాడిన వస్త్రంతో ఆ ప్యాంట్‌ను తయారు చేయడం దాని స్పెషాలిటీ.
లండన్‌లో పవన్, షారుఖ్ షాపింగ్!
పవన్ కళ్యాణ్ దుస్తుల ఎంపిక విషయంలో తాను ఎంతో కేర్ తీసుకునేదాన్నని రేణు దేశాయ్ తెలిపారు. లండన్‌లోని ఓ ప్రముఖ ఫ్యాషన్ షాపింగ్ మాల్‌లో పవన్ కోసం బ్రాండెడ్ దుస్తులు కొనుగోలు చేసేవారట. ఆసక్తికరమైన విషయం ఏంటంటే.. అదే మాల్‌కు బాలీవుడ్ కింగ్ షారుఖ్ ఖాన్ కోసం దర్శకుడు కరణ్ జోహార్ కూడా షాపింగ్ చేయడానికి వచ్చేవారట.
అందుకే ఇద్దరి లుక్స్‌లో ఆ పోలికలు..
ఒకే మాల్‌లో, ఒకే బ్రాండ్ దుస్తులు కొనడం వల్లే ఆ సమయంలో పవన్, షారుఖ్ స్టైలింగ్‌లో కొన్ని పోలికలు కనిపించేవని రేణు దేశాయ్ గుర్తుచేసుకున్నారు. వీరిద్దరి లుక్స్‌కు సంబంధించిన ఫొటోలు అప్పట్లో ఎంతోమంది అభిమానుల దృష్టిని ఆకర్షించేవి. ఇప్పుడు ఆ లండన్ షాపింగ్ ముచ్చట్లు, బాలు సినిమా ప్యాంట్ స్పెషాలిటీస్ సోషల్ మీడియాలో పవన్ అభిమానులకు సరికొత్త కిక్ ఇస్తున్నాయి.
సోషల్ మీడియా, ఇన్‌స్టాగ్రామ్ రీల్స్ లేని ఆ రోజుల్లోనే పవన్ కళ్యాణ్ వాడిన బట్టలు, వేసిన స్టెప్పులు యూత్‌లో ఒక కల్ట్ ఫ్యాషన్‌గా మారాయి. ప్రపంచ యుద్ధం నాటి క్లాత్‌తో చేసిన ప్యాంట్‌ను ఆ రోజుల్లోనే ఏరికోరి తెప్పించారంటే ఆయన స్టైలింగ్‌పై రేణు దేశాయ్ పెట్టిన ఎఫర్ట్ ఏంటో అర్థమవుతోంది. ఇప్పుడున్న యంగ్ హీరోలు వందల కోట్లు పెట్టి సినిమాలు తీస్తున్నా.. పవన్ కళ్యాణ్ వింటేజ్ స్టైల్‌ను, ఆ స్వాగ్‌ను మ్యాచ్ చేయడం ఎవరి తరం కాదన్నది అక్షర సత్యం!
