‘టిల్లు స్క్వేర్’ సంచలన విజయం తర్వాత వరుస ఫ్లాపులు, భారీ ప్రాజెక్టులు ఆగిపోవడంతో ఏడాది పాటు వెండితెరకు దూరమైన ‘స్టార్ బాయ్’ సిద్ధు జొన్నలగడ్డ ఇప్పుడు సరికొత్త వ్యూహంతో కమ్‌బ్యాక్ ఇచ్చేందుకు సిద్ధమయ్యారు. ‘జాక్’, ‘తెలుసు కదా’ నిరాశపరచడంతో పాటు ‘బ్యాడ్స్’, ‘కోహినూర్ పార్ట్-1’ సినిమాలు పక్కన పడటంతో కథల ఎంపికలో తప్పులను సరిదిద్దుకున్న సిద్ధు.. తాజాగా సుకుమార్ రైటింగ్స్-బన్నీ వాస్ చిత్రంతో పాటు దర్శకుడు స్వరూప్ ఆర్ఎస్‌జే సినిమాను లైన్‌లో పెట్టి తిరిగి ఫామ్ అందుకునేందుకు కసరత్తు చేస్తున్నారు.
[FEATURED_IMAGE]
‘డీజే టిల్లు’, ‘టిల్లు స్క్వేర్’ చిత్రాలతో బాక్సాఫీస్ వద్ద సరికొత్త సెన్సేషన్ క్రియేట్ చేసి, యూత్‌లో తిరుగులేని క్రేజ్‌తో ‘స్టార్ బాయ్’ అనిపించుకున్నారు సిద్ధు జొన్నలగడ్డ. ముఖ్యంగా ‘టిల్లు స్క్వేర్’ ఏకంగా రూ. 60 కోట్లకు పైగా షేర్ రాబట్టడంతో టాలీవుడ్‌లో ఆయన మార్కెట్ ఒక్కసారిగా ఆకాశానికి చేరింది. స్వతహాగా మంచి రచయిత కూడా అయిన సిద్ధు, ఆ తర్వాత మాత్రం కథల ఎంపికలో అంచనాలు తప్పి గడ్డు పరిస్థితులను ఎదుర్కొన్నారు. ఫలితంగా ఏడాది కాలంగా సిల్వర్ స్క్రీన్‌పై ఆయన సందడి కనిపించకుండా పోయింది.
ఫ్లాపుల దెబ్బ.. ఆగిపోయిన రెండు భారీ ప్రాజెక్టులు!
‘టిల్లు స్క్వేర్’ తర్వాత ఫామ్ కోల్పోయిన దర్శకుడు బొమ్మరిల్లు భాస్కర్‌తో సిద్ధు చేసిన ‘జాక్’ బాక్సాఫీస్ వద్ద కనీసం రూ. 10 కోట్లు కూడా రాబట్టలేక భారీ డిజాస్టర్‌గా నిలిచింది. ఆ తర్వాత కాస్ట్యూమ్ డిజైనర్ నీరజ కోనను దర్శకురాలిగా పరిచయం చేస్తూ చేసిన రొమాంటిక్ ఎంటర్‌టైనర్ ‘తెలుసు కదా’ 2025 దసరాకు విడుదలై ప్రేక్షకులను మెప్పించలేకపోయింది. కేవలం హీరోగానే కాకుండా రవితేజ ‘మిస్టర్ బచ్చన్’, సుమంత్ ‘మహేంద్రగిరి వారాహి’ చిత్రాల్లో చేసిన అతిథి పాత్రలు సైతం నిరాశపరిచాయి.
మరోవైపు సిద్ధు కెరీర్‌లో ఇంతటి గ్యాప్ రావడానికి రెండు క్రేజీ సినిమాలు క్యాన్సిల్ అవ్వడం కూడా ప్రధాన కారణమైంది. ‘టిల్లు’ చిత్రాలను నిర్మించిన సితార ఎంటర్‌టైన్‌మెంట్స్ సంస్థ, ‘టిల్లు క్యూబ్’కు బదులుగా ‘కృష్ణ అండ్ హిస్ లీలా’ ఫేమ్ రవికాంత్ పేరేపు దర్శకత్వంలో ‘బ్యాడ్స్’ అనే ఫ్రెష్ ప్రాజెక్ట్‌ను ప్రకటించినా అది పట్టాలెక్కలేదు. అలాగే కోహినూర్ వజ్రాన్ని భారత్‌కు తిరిగి తీసుకొచ్చే ఇంట్రెస్టింగ్ కాన్సెప్ట్‌తో, 2026 సంక్రాంతి లక్ష్యంగా ప్రకటించిన భారీ బడ్జెట్ చిత్రం ‘కోహినూర్ పార్ట్-1’ సైతం బడ్జెట్ కారణాల వల్ల ఆగిపోయింది.
స్వరూప్ ఆర్ఎస్‌జే, సుకుమార్ రైటింగ్స్‌తో సాలిడ్ కమ్‌బ్యాక్ ప్లాన్!
గత ఏడాది కాలంలో ఎదురైన చేదు అనుభవాల నుంచి కీలక పాఠాలు నేర్చుకున్న సిద్ధు జొన్నలగడ్డ, ఇప్పుడు ఆ లోటును భర్తీ చేసేందుకు రెండు ఆసక్తికర ప్రాజెక్టులను లైన్‌లో పెట్టారు. అందులో ఒకటి ‘ఏజెంట్ సాయి శ్రీనివాస ఆత్రేయ’ ఫేమ్ స్వరూప్ ఆర్ఎస్‌జే దర్శకత్వంలో రూపొందుతున్న చిత్రం. వైవిధ్యమైన కథనంతో ఆకట్టుకునే స్వరూప్, సిద్ధు కోసం ఒక పక్కా ఎంటర్‌టైనింగ్ స్క్రిప్ట్‌ను సిద్ధం చేసినట్లు తెలుస్తోంది.
మరోవైపు సుకుమార్ రైటింగ్స్, బన్నీ వాస్ సంయుక్తంగా నిర్మిస్తున్న కొత్త సినిమా బుధవారం హైదరాబాద్‌లో లాంఛనంగా ప్రారంభమైంది. మోహన్ బి దర్శకత్వం వహిస్తున్న ఈ చిత్రం థీమ్ పోస్టర్ చూస్తుంటే సిద్ధు ఈసారి పూర్తిస్థాయి రొమాంటిక్ లవ్ స్టోరీతో రాబోతున్నట్లు స్పష్టమవుతోంది. ‘ఆయ్’, ‘రాకాస’ చిత్రాలతో అలరించిన నయన్ సారిక ఇందులో కథానాయికగా నటిస్తుండగా, జీవీ ప్రకాష్ కుమార్ సంగీతం అందిస్తున్నారు. మరి ఈ రెండు సినిమాలతోనైనా స్టార్ బాయ్ మళ్లీ తన పాత బాక్సాఫీస్ ఫామ్‌ను అందుకుంటారో లేదో చూడాలి.
