జింబాబ్వేతో జరుగుతున్న రెండో టెస్టులో దక్షిణాఫ్రికా బ్యాటర్ వియాన్ ముల్డర్ అద్భుత ప్రదర్శన కనబరిచాడు. మొదటి టెస్టులో 264 పరుగులతో నాటౌట్‌గా నిలిచిన ముల్డర్, ఆదివారం (జూలై 6, 2025) ప్రారంభమైన రెండో టెస్టులోనూ తొలి రోజే అజేయ డబుల్ సెంచరీ (264* నాటౌట్; 259 బంతుల్లో 34 ఫోర్లు, 3 సిక్స్‌లు) సాధించి సత్తా చాటాడు. దీంతో దక్షిణాఫ్రికా తొలి ఇన్నింగ్స్‌లో 88 ఓవర్లలో 4 వికెట్ల నష్టానికి 465 పరుగుల భారీ స్కోరు చేసింది.
కెప్టెన్‌గా తొలి మ్యాచ్‌లోనే ముల్డర్ వన్డే తరహా ఆట
ఈ మ్యాచ్‌తో సౌతాఫ్రికా జట్టుకు తొలిసారి సారథ్యం వహిస్తున్న ముల్డర్, వన్డే మ్యాచ్‌ను తలపించేలా బ్యాటింగ్ చేశాడు. ఎదుర్కొన్న బంతుల కంటే ఎక్కువ పరుగులు చేసి, బౌండరీలను సునాయాసంగా బాదాడు. జట్టు స్కోరు 11 పరుగుల వద్ద టోని డి జార్జి (10), 24 పరుగుల వద్ద సెనొక్వనే (3) వంటి ఓపెనర్లు వెనుదిరిగినప్పుడు, వన్‌డౌన్‌లో బ్యాటింగ్‌కు దిగిన ముల్డర్ జింబాబ్వే బౌలర్లను చిత్తుచేశాడు.
బెడింగ్‌హామ్ (82; 7 ఫోర్లు)తో కలిసి మూడో వికెట్‌కు 184 పరుగులు జోడించి రెండో సెషన్‌లోనే సెంచరీ పూర్తి చేసుకున్నాడు. మూడో సెషన్‌లో ప్రిటోరియస్ (78; 7 ఫోర్లు, 3 సిక్స్‌లు)తో కలిసి నాలుగో వికెట్‌కు 217 పరుగులు జోడించాడు. దీంతో చివరి సెషన్‌లో అతని డబుల్ సెంచరీ, జట్టు 400 పరుగుల మార్క్‌ను వేగంగా అందుకున్నాయి. తొలిరోజు ఆట ముగిసే సమయానికి ముల్డర్, బ్రెవిస్ (15 బ్యాటింగ్) క్రీజులో ఉన్నారు. జింబాబ్వే బౌలర్లలో తనాక చివంగా 2 వికెట్లు తీయగా, మతిగిము, మసకద్జా చెరో వికెట్ పడగొట్టారు.
కెప్టెన్‌గా ప్రపంచ రికార్డు బద్దలు కొట్టిన ముల్డర్
కెప్టెన్ హోదాలో ఆడిన తొలి టెస్టులో, తొలి ఇన్నింగ్స్‌లో అత్యధిక వ్యక్తిగత స్కోరు (264 నాటౌట్) చేసిన ఆటగాడిగా వియాన్ ముల్డర్ చరిత్ర సృష్టించాడు. ఈ క్రమంలో, న్యూజిలాండ్ కెప్టెన్ గ్రాహమ్ డౌలింగ్ (239 రన్స్; 1968లో టీమిండియాపై) పేరిట ఉన్న ఆల్-టైమ్ ప్రపంచ రికార్డును ముల్డర్ బద్దలు కొట్టాడు.
టెస్టు కెప్టెన్‌గా తొలి ఇన్నింగ్స్‌లోనే అత్యధిక స్కోర్లు సాధించిన ఆటగాళ్లు:
- వియాన్ ముల్డర్ (సౌతాఫ్రికా) - 2025లో జింబాబ్వేపై 264* రన్స్ (బులవాయో)
- గ్రాహమ్ డౌలింగ్ (న్యూజిలాండ్) - 1968లో టీమిండియాపై 239 రన్స్ (క్రైస్ట్‌చర్చ్)
- శివ్‌నరైన్ చందర్‌పాల్ (వెస్టిండీస్) - 2005లో సౌతాఫ్రికా మీద 203* రన్స్ (జార్జ్‌టౌన్)
- క్లెమ్ హిల్ (ఆస్ట్రేలియా) - 1910లో సౌతాఫ్రికాపై 191 రన్స్ (సిడ్నీ)
- జో రూట్ (ఇంగ్లండ్) - 2017లో సౌతాఫ్రికాపై 190 రన్స్ (లార్డ్స్)
- అలిస్టర్ కుక్ (ఇంగ్లండ్) - 2017లో బంగ్లాదేశ్‌పై 173 రన్స్ (చట్టోగ్రామ్)
- విజయ్ హజారే (ఇండియా) - 1954లో ఇంగ్లండ్‌పై 164* రన్స్ (ఢిల్లీ)
- క్లైవ్ లాయిడ్ (వెస్టిండీస్) - 1974లో టీమిండియాపై 163 రన్స్ (బెంగళూరు)
ముల్డర్ సాధించిన మరికొన్ని రికార్డులు
టెస్టు మ్యాచ్ తొలి రోజున అత్యధిక పరుగులు చేసిన దక్షిణాఫ్రికా బ్యాటర్‌గా ముల్డర్ రికార్డు నెలకొల్పాడు. హెర్షెల్ గిబ్స్ (228; 2003లో పాకిస్తాన్‌పై కేప్‌టౌన్‌లో) పేరిట ఉన్న రికార్డును ముల్డర్ సవరించాడు.
టెస్టు మ్యాచ్ తొలి రోజున అత్యధిక పరుగులు చేసిన మూడో బ్యాటర్‌గా ముల్డర్ (264*) ఘనత వహించాడు. ఈ జాబితాలో డాన్ బ్రాడ్‌మన్ (309; 1930లో ఇంగ్లండ్‌పై లీడ్స్‌లో), వీరేంద్ర సెహ్వాగ్ (284; 2009లో శ్రీలంకపై ముంబైలో), డాన్ బ్రాడ్‌మన్ (271; 1934లో ఇంగ్లండ్‌పై లీడ్స్‌లో) తొలి మూడు స్థానాల్లో ఉన్నారు.
టెస్టు మ్యాచ్ తొలి రోజున దక్షిణాఫ్రికా చేసిన అత్యధిక స్కోరు (465) ఇదే కావడం విశేషం. 2003లో పాకిస్తాన్‌తో కేప్‌టౌన్‌లో జరిగిన టెస్టులో తొలి రోజు దక్షిణాఫ్రికా 3 వికెట్లకు 445 పరుగులు చేసింది.
క్లీన్ స్వీప్ లక్ష్యంగా ప్రోటిస్
ప్రపంచ టెస్టు ఛాంపియన్‌షిప్ నయా ఛాంపియన్ సౌతాఫ్రికా, రెండు టెస్టులు ఆడేందుకు జింబాబ్వేలో పర్యటిస్తోంది. బులవాయో వేదికగా జరుగుతున్న ఈ సిరీస్‌ తొలి మ్యాచ్‌లో పర్యాటక ప్రొటిస్ జట్టు జింబాబ్వేను 328 పరుగుల తేడాతో చిత్తుగా ఓడించింది. ఇక రెండో టెస్టులోనూ అదే ఫలితం పునరావృతం చేసి 2-0తో సిరీస్‌ను క్లీన్ స్వీప్ చేయాలని పట్టుదలగా ఉంది.
