శీతాకాలంలో చర్మం పొడిబారడం, పగలడం, దురద వంటి సమస్యలు సాధారణం. అయితే, ఈ కాలంలో చర్మాన్ని మృదువుగా, తేమగా ఉంచడంలో క్యారెట్ అద్భుతంగా పనిచేస్తుంది. క్యారెట్ను ఉపయోగించి చర్మాన్ని ఎలా సంరక్షించుకోవాలో ఇప్పుడు తెలుసుకుందాం.
పొడి చర్మం కోసం క్యారెట్ ఫేస్ ప్యాక్
పొడి చర్మం ఉన్నవారు సగం క్యారెట్ను తురిమి మిక్సీలో పేస్ట్గా చేసుకోవాలి. ఈ పేస్ట్లో ఒక టీస్పూన్ తేనె, ఒక టీస్పూన్ పాలు కలిపి బాగా కలపాలి. ఈ మిశ్రమాన్ని మీ చర్మానికి లేదా ముఖానికి ఫేస్ ప్యాక్గా వేసుకోవచ్చు. 15 నిమిషాల తర్వాత చల్లని నీటితో కడిగేయాలి. ఇలా చేయడం వల్ల చర్మం తేమగా మారి, పగుళ్లను నివారిస్తుంది.
జిడ్డు చర్మం (ఆయిలీ స్కిన్) కోసం క్యారెట్ ప్యాక్
జిడ్డు చర్మం ఉన్నవారికి కూడా క్యారెట్లు చాలా ప్రయోజనకరంగా ఉంటాయి. క్యారెట్లలో ఉండే విటమిన్ 'ఎ' చర్మం నుండి అధిక నూనెను తొలగించి, చర్మాన్ని మృదువుగా చేస్తుంది. ఒక కప్పు క్యారెట్ జ్యూస్లో ఒక టేబుల్ స్పూన్ పెరుగు, ఒక టేబుల్ స్పూన్ శనగపిండి, ఒక టేబుల్ స్పూన్ నిమ్మరసం కలిపి బాగా కలపాలి. ఈ మిశ్రమాన్ని ముఖానికి, మెడకు ప్యాక్గా వేసుకుని 30 నిమిషాల పాటు ఆరనివ్వాలి. ఆ తర్వాత గోరువెచ్చని నీటితో కడిగేస్తే జిడ్డు చర్మం సమస్య తగ్గుతుంది.
డెడ్ స్కిన్ తొలగింపునకు
చర్మంపై ఉండే మృత కణాలను (డెడ్ స్కిన్ సెల్స్) తొలగించి, చర్మాన్ని తాజాగా మార్చడానికి క్యారెట్ జ్యూస్, పెరుగు, గుడ్డులోని తెల్లసొనను సమపాళ్లలో కలిపి ముఖానికి రాసుకోవాలి. 15 నిమిషాల తర్వాత గోరువెచ్చని నీటితో కడిగేస్తే చర్మం కాంతివంతంగా, యవ్వనంగా మారుతుంది.
సన్ ప్రొటెక్షన్ స్ప్రేగా
సూర్యరశ్మి, దుమ్ము, ధూళి నుండి చర్మాన్ని రక్షించుకోవడానికి క్యారెట్ జ్యూస్, రోజ్ వాటర్ను సమపాళ్లలో కలిపి స్ప్రే బాటిల్లో నింపుకోవాలి. దీన్ని సన్ ప్రొటెక్షన్ స్ప్రేగా ఉపయోగించవచ్చు.
చర్మ సౌందర్యం కోసం
క్యారెట్ జ్యూస్, అలోవెరా జ్యూస్లను కలిపి రాసుకోవడం వల్ల చర్మ సౌందర్యం పెరుగుతుంది. ఇది చర్మాన్ని మృదువుగా ఉంచి, పగలకుండా చూస్తుంది. దీంతో మీరు మరింత యవ్వనంగా కనిపిస్తారు.
