అమెరికాలోని టెక్సాస్‌ రాష్ట్రంలో గత కొన్ని రోజులుగా కురుస్తున్న భారీ వర్షాలు బీభత్సం సృష్టిస్తున్నాయి. ఎడతెరిపి లేకుండా కురుస్తున్న వర్షాల కారణంగా గ్వాడలూప్‌ నది ఉప్పొంగి, భారీ వరదలకు దారితీసింది. దీంతో జనజీవనం పూర్తిగా అస్తవ్యస్తమైంది. ఈ వరదల తీవ్రతను తెలియజేసే షాకింగ్‌ వీడియోలు ప్రస్తుతం వెలుగులోకి వస్తున్నాయి.
క్షణాల్లో కనుమరుగైన రోడ్డు
కింగ్స్‌ల్యాండ్‌ ప్రాంతంలో కురిసిన భారీ వర్షాలకు ఒక్కసారిగా వరద పోటెత్తింది. కేవలం కొన్ని నిమిషాల్లోనే ఒక రోడ్డు పూర్తిగా నీట మునిగి కనుమరుగైంది. ఈ ఘటన జరిగిన సమయంలో రోడ్డుపై ఎవరూ లేకపోవడంతో పెను ప్రమాదం తప్పింది. కేవలం పది నిమిషాల్లోనే ఆ ప్రాంతం మొత్తం వరద నీటితో నదిలా మారిపోయింది. దీనికి సంబంధించిన వీడియో ప్రస్తుతం సోషల్ మీడియాలో వైరల్‌గా మారింది.
పెరుగుతున్న మృతుల సంఖ్య, గల్లంతైనవారి కోసం గాలింపు
ఈ వరదల కారణంగా మరణించిన వారి సంఖ్య 82కు చేరింది. సుమారు 41 మంది గల్లంతయ్యారు. కెర్‌ కౌంటీలో మృతి చెందిన వారిలో 40 మంది పెద్దలు, 28 మంది చిన్నారులు ఉన్నారు. ఈ నెల 4న కేవలం నిమిషాల వ్యవధిలోనే వరద ఉద్ధృతమై, పలు రోడ్లు పూర్తిగా ధ్వంసమయ్యాయి. గల్లంతైన వారిలో 10 మంది బాలికలు, ఒక కౌన్సిలర్‌ ఉన్నట్లు అధికారులు తెలిపారు. వీరి కోసం గాలింపు చర్యలు కొనసాగుతున్నాయి. ఇప్పటి వరకు 850 మందిని సురక్షితంగా కాపాడినట్లు అధికారులు వెల్లడించారు.
నాయకుల పరామర్శ
ఈ విషాద ఘటనపై భారత ప్రధాని నరేంద్ర మోదీ మృతుల కుటుంబాలకు ప్రగాఢ సానుభూతి తెలిపారు. అమెరికా అధ్యక్షుడు డొనాల్డ్ ట్రంప్ వరద ప్రభావిత ప్రాంతాల్లో పర్యటించి పరిస్థితిని సమీక్షించనున్నారు.
A timelapse video shows the speed at which deadly floodwaters rose over a causeway in Texas. The video recorded the scene for around 50 minutes, according to the timecode https://t.co/qqaiRP5TR6 pic.twitter.com/4oKX3xHr5e
— Reuters (@Reuters) July 7, 2025
