అప్పుల భారం తగ్గించుకునేందుకు చంద్రబాబు సర్కార్ మాస్టర్ ప్లాన్ వేసింది. వడ్డీల మోతకు చెక్ పెడుతూనే.. విశాఖ గూగుల్ ప్రాజెక్ట్‌కు కేబినెట్ గ్రీన్ సిగ్నల్ ఇచ్చింది!
ఆంధ్రప్రదేశ్ మంత్రిమండలి సమావేశంలో రాష్ట్ర ఆర్థిక పరిస్థితిని గాడిలో పెట్టేందుకు, పారిశ్రామిక ప్రగతిని పరుగులు పెట్టించేందుకు పలు కీలక నిర్ణయాలు తీసుకున్నారు. ముఖ్యంగా, గతంలో 11 నుంచి 12 శాతం వంటి అధిక వడ్డీ రేట్లకు తెచ్చిన అప్పులు ఇప్పుడు రాష్ట్ర ఖజానాకు గుదిబండగా మారాయి. అయితే, ఇటీవల రాష్ట్ర క్రెడిట్ రేటింగ్ మెరుగుపడటంతో, సీఎం చంద్రబాబు అధికారులకు వ్యూహాత్మక ఆదేశాలు జారీ చేశారు.
మార్కెట్‌లో ప్రస్తుతం తక్కువ వడ్డీకే రుణాలు దొరుకుతున్నందున, పాత అధిక వడ్డీ రుణాలను కొత్తవాటితో మార్పిడి (Swap) చేసుకోవాలని సూచించారు. ఈ 'స్వాప్' విధానం ద్వారా వడ్డీల రూపంలో వృధాగా పోయే కోట్లాది రూపాయల ప్రజాధనం ఆదా అవుతుందని ప్రభుత్వం భావిస్తోంది.
ఫైర్ సేఫ్టీ ఫీజు నుంచి విముక్తి
మరోవైపు, ప్రజాసేవలో ఉన్న పలు కీలక ప్రభుత్వ సంస్థలకు ఆర్థిక వెసులుబాటు కల్పిస్తూ కేబినెట్ ఆమోదం తెలిపింది. ఫైర్ సేఫ్టీ ఎన్ఓసీ (NOC) కోసం చెల్లించాల్సిన ముందస్తు జాగ్రత్తల రుసుము నుంచి ఈ కింది సంస్థలకు మినహాయింపు ఇచ్చారు:
మంగళగిరి ఎయిమ్స్ (AIIMS)
రాష్ట్రంలోని అన్ని ప్రభుత్వ ఆసుపత్రులు, ప్రభుత్వ భవనాలు
కేంద్ర ప్రభుత్వ సంస్థలు
ఏపీ జెన్కో, ఏపీపీడీసీఎల్ (APPDCL) థర్మల్ పవర్ స్టేషన్లు
గూగుల్ ప్రాజెక్ట్‌కు అదానీ, ఎయిర్‌టెల్ జత!
ఇక రాష్ట్ర ప్రతిష్టను పెంచే విశాఖ గూగుల్ డేటా సెంటర్ ప్రాజెక్టు పనులను వేగవంతం చేసేందుకు ప్రభుత్వం సిద్ధమైంది. గూగుల్ అనుబంధ సంస్థ 'రైడన్ ఇన్ఫోటెక్' అభ్యర్థన మేరకు.. ఈ ప్రాజెక్టు నిర్మాణంలో పాలుపంచుకునేందుకు ఆరు భాగస్వామ్య కంపెనీలకు (అదానీ ఇన్‌ఫ్రా, అదానీ కోనెక్స్, భారతీ ఎయిర్‌టెల్ తదితర సంస్థలు) కేబినెట్ గ్రీన్ సిగ్నల్ ఇచ్చింది. అయితే, కొత్త కంపెనీలు చేరినా పెట్టుబడి, నాణ్యత, ప్రాజెక్టు డెడ్‌లైన్ వంటి పాత ఒప్పంద నిబంధనల్లో ఎలాంటి మార్పు ఉండదని ప్రభుత్వం స్పష్టం చేసింది.
