బుమ్రా నోరు జారాడు.. ఆ మాట స్టంప్ మైక్‌లో రికార్డ్ అయ్యింది! కానీ ఈ వివాదంపై సఫారీ టీమ్ రియాక్షన్ చూసి అందరూ ఆశ్చర్యపోతున్నారు.
భారత పేసర్ జస్‌ప్రీత్ బుమ్రా, దక్షిణాఫ్రికా కెప్టెన్ టెంబా బవుమా మధ్య చోటుచేసుకున్న స్టంప్ మైక్ వివాదంపై దక్షిణాఫ్రికా బ్యాటింగ్ కోచ్ యాష్‌వెల్ ప్రిన్స్ చాలా తేలికగా స్పందించారు. ఈ ఘటనను తాము పెద్దదిగా చూడటం లేదని, దీనిపై తమ జట్టులో ఎలాంటి చర్చ జరగదని తేల్చిచెప్పారు.
స్టంప్ మైక్‌లో దొరికిన బుమ్రా.. "బౌనా భీ హై"!
ఈడెన్ గార్డెన్స్‌ వేదికగా జరుగుతున్న తొలి టెస్టు తొలి రోజు ఆటలో ఈ ఘటన జరిగింది. దక్షిణాఫ్రికా ఇన్నింగ్స్ 13వ ఓవర్‌లో బుమ్రా బౌలింగ్‌లో బవుమాపై ఎల్బీడబ్ల్యూ అప్పీల్ రాగా, అంపైర్ దాన్ని తిరస్కరించాడు. డీఆర్ఎస్ తీసుకోవాలా వద్దా అని వికెట్ కీపర్ రిషభ్ పంత్‌తో చర్చిస్తున్న సమయంలో.. "బౌనా భీ హై" (పొట్టిగా కూడా ఉన్నాడు) అని బుమ్రా అన్న మాటలు స్టంప్ మైక్‌లో రికార్డయ్యాయి.
హిందీలో 'బౌనా' అనే పదాన్ని మరుగుజ్జు వ్యక్తులను ఉద్దేశించి, అవమానకరంగా వాడతారు. ఇది ఇప్పుడు వివాదాస్పదంగా మారింది.
"మేం పట్టించుకోం": సఫారీ కోచ్
ఈ వివాదంపై తొలిరోజు ఆట అనంతరం యాష్‌వెల్ ప్రిన్స్ మాట్లాడుతూ.. "ఈ విషయం ఇప్పుడే నా దృష్టికి వచ్చింది. దీనిపై మేం ఎలాంటి చర్చ చేయబోం. మైదానంలో జరిగిన వాటిని మేం సమస్యగా చూడటం లేదు" అని తెలిపారు. దక్షిణాఫ్రికా జట్టు దీనిపై ఎలాంటి అధికారిక ఫిర్యాదు చేయడం లేదని కూడా స్పష్టం చేసింది.
విఫలమైన బవుమా
ఇక, కాలి గాయం నుంచి కోలుకుని టెస్టు కెప్టెన్‌గా తిరిగి జట్టులోకి వచ్చిన టెంబా బవుమా ఈ మ్యాచ్‌లో తీవ్రంగా నిరాశపరిచాడు. వివాదం జరిగిన కాసేపటికే, అతను 11 బంతుల్లో కేవలం 3 పరుగులు మాత్రమే చేసి కుల్‌దీప్ యాదవ్ బౌలింగ్‌లో ఔటయ్యాడు.
బుమ్రా వ్యాఖ్యలు సోషల్ మీడియాలో వివాదాస్పదమైనప్పటికీ, దక్షిణాఫ్రికా జట్టు దీనిని పెద్దది చేయకుండా స్పోర్టివ్‌గా తీసుకోవడంతో, ఈ వివాదం ఇక్కడితో ముగిసినట్లేనని భావిస్తున్నారు.
